Filipenses 3 - Nuevo Testamento Tzeltal de Amatenango

Ben tsaꞌam te ya jnaꞌbetik sba te Cristoe

¹ Jich yuꞌun, kermanotak, junuk me awoꞌtanik ta skuenta te Kajwaltike. Yuꞌun ma wokoluk ya kaꞌiy te ya jchaꞌalonbeyex xan te tut la jtsꞌibabeyexe, yuꞌun jich me ya ataik koltayel a.

² Ila me abaik yuꞌun te gente te jachik tutꞌil tsꞌiꞌetik te ma tsaꞌamuk yaꞌtelike. Ila me abaik yuꞌun te machꞌa ya sbojbeyex ta atiꞌbalulike.

³ Porke te machꞌatik batsꞌi yichꞌojik sirkunsisione joꞌotik abi, yuꞌun jchꞌuunejtik te Diose ta skuenta te Espíritu, y ben jun koꞌtantik te ayotikix ta skuenta te Cristo Jesuse. Ma jaꞌuk ya kichꞌtik ta jkuenta te tutik ya spasbot te jtiꞌbalultike.

⁴ Teme ay machꞌa jich ya yichꞌ ta jkuenta te tutꞌil ay ta skuenta te stiꞌbalule, kꞌax to xan jich ya spas ya kal euk.

⁵ Yuꞌun la yaꞌbelon sirkunsision ta waxkebal kꞌaal te ayinon ae. Joꞌon stsꞌumbalon te israeletike, ayon ta skuenta jtijkꞌ te stsꞌumbal Benjamine, jꞌhebreoon y xnichꞌanon hebreoetik. Te tutꞌil jich kꞌoem ta koꞌtan te mantaliletike, ayon ta skuenta jtijkꞌ fariseo.

⁶ Sok te tutꞌil tulan skꞌoplal kꞌoem ta koꞌtane, jich a jtentalan te hermanoetike. Te tutꞌil juꞌem kuꞌun xchꞌuunel te mantaliletike, maꞌyuk machꞌa ya xjuꞌ ya stabon palta.

⁷ Pero ta spisil to te bayal skꞌoplal ta koꞌtan ta nail to, te ora to ta skuenta te Cristoe ni maꞌyukix skꞌoplal kuꞌun.

⁸ Sok jich maꞌyukix stuunel ta koꞌtan spisil. Jaꞌ nax ben tsaꞌam stukel ta ya jnaꞌbey sba te Kajwal Cristo Jesuse. Ta skuenta te Cristoe la jchꞌayix jilel spisil. Y ta spisil jich ya jkuyix ta kꞌaꞌpal, yuꞌun jich me ay stuunel kuꞌun te Cristoe,

⁹ sok te jun nax ya xkꞌoon soke. Ma jaꞌuk ya jle tutꞌil ya xlekubon ta skuenta xchꞌuunel te mantaliletike, sino ke jaꞌ nax ta skuenta xchꞌuunel te Cristoe. Dios a yakꞌonix ta libre yuꞌun jmul ta skuenta te xchꞌuunel koꞌtane.

¹⁰ Te tut ya jkꞌane, jaꞌ te yauk jnaꞌbey sba te Cristoe, sok te yauk kaꞌiy tutꞌil ay te spoder te la yichꞌ chaꞌkusesel yuꞌune, sok te pajaluk ya xkꞌax jwokol soke, y asta jich ya xkꞌoon ekꞌa te tutꞌil a laje.

¹¹ Jaꞌ ayon ta smaliyel te ya jta ekꞌa te chaꞌkuxel yuꞌun te animaetike.

Spasel puersa te ba ya xkꞌootike

¹² Ma jkꞌan ya kal te juꞌemix kuꞌun ta spisile, ni te lom tojix ayone. Pero sigue ayon bael ta smaliyel te ya xkꞌo jtae, jaꞌ sluwar te la staon ta primero te Cristo Jesuse.

¹³ Kermanotak, ma yauk kal te joꞌon mismo jtaojixe. Te tut ya jpase ya jchꞌay jilel ta koꞌtan te tut jilemix ta jpate, y jaꞌ me ya kakꞌ puersa te ya xkꞌo jta te tutꞌ ayon baele.

¹⁴ Yuꞌun jich me ya xkꞌoon te ba ya xkꞌoone, y ya me xkꞌo kichꞌ te jmajtan te ya yaꞌbotik te Diose ta skuenta te Cristo Jesuse.

¹⁵ Ta jpisiltik te machꞌatik te jtaojtikix lek xchꞌuunel koꞌtantike ya me skꞌan ya jnaꞌtik te jich aye. Teme ay tut yan anopojik te jaꞌexe, Dios me ya yakꞌ anaꞌik.

¹⁶ Jaꞌ yuꞌun, jich tutꞌil kꞌoemix ta koꞌtantike, jich me ya skꞌan ya jpastik.

¹⁷ Kermanotak, sigue me xꞌanopik te tutꞌ ayone, y jaꞌ me xꞌatꞌumik te machꞌatik jich stꞌumojik te tutꞌil la kakꞌtik awilike.

¹⁸ Bayal buelta a kalbeyexix, y te ora to ya jchaꞌalonbeyex xan sok kokꞌel, te ben bayal machꞌatik skontrainej te tutꞌil a cham ta krus te Cristoe,

¹⁹ y te slajibike, chꞌayel me ya xlaj jbajt. Te sdiosike jaꞌ te tut ya skꞌan te stiꞌbalulike, y jaꞌ stoyoj sbaik yuꞌun te tut ya xba akꞌek ta kꞌexlal yuꞌune. Jaꞌ nax ya snopik te tutik skuenta te balmilal to.

²⁰ Yan te joꞌotike jaꞌ jlumaltik te chꞌulchane. Y yipalotik ta smaliyel te ya xtal ta chꞌulchan te jKoltawaneje, jaꞌ te Kajwaltik Jesucristoe.

²¹ Ya me syanutesbotik bael te jtiꞌbalultik te maꞌyuk yipe, yuꞌun jich me ya xkꞌot te tutꞌil stiꞌbalul stukel te ben tsaꞌame. Y jich ya spas ta skuenta spoder te ya xjuꞌ yuꞌun spasel ta mantal spisil te tutik aye.