Filipenses 2 - Nuevo Testamento Tzeltal de Amatenango

Chꞌin a yakꞌ sba te Cristoe, jich mukꞌ skꞌoplal a kꞌot

¹ Jich yuꞌun, teme ya yaꞌbeyex spuersa awoꞌtanik te Cristoe, sok teme ya sjunutesbeyex awoꞌtanike te skꞌuxul yoꞌtane, sok teme sjoyinejex te Espiritue, sok teme ay slekil awoꞌtanik sok kꞌux ya awaꞌiy abaike,

² a me junubuk xan koꞌtan awuꞌunik te tutꞌil jun awoꞌtan abaik ya xꞌanexe. Jun nax me xkꞌoex ta skuenta te xkꞌuxul awoꞌtanike, sok jun nax me awoꞌtan abaik, sok jun nax me te tutik ya anopike.

³ Ma me ayuk tuti ya apasik ta skuenta tsalaw sok ta skuenta toybael. Chꞌin me ya skꞌan ya awakꞌ abaik, y ta juju-tul jaꞌ me mukꞌ skꞌoplal awuꞌunik te yanetike te tutꞌil te jaꞌat mismoe.

⁴ Ma me machꞌa stukel nax ta sle te tutꞌil lek ay ae; ya skꞌan te ya sle te tutꞌil lek ay ekꞌa te yanetike.

⁵ Te jaꞌexe junuk nax mismo te tut ya anopike te tutꞌil ay yuꞌun te Cristoe Jesuse:

⁶ Te tutꞌil jun ay sok te Diose, ma jaꞌuk tulan skꞌoplal a bajt ta yoꞌtan te pajal ay sok te Diose.

⁷ Sinoke la yijkitay sba te tutꞌil ay stukele, y jich a yakꞌ sba tutꞌil jꞌaꞌtel, sok ayin jich tutꞌil winik.

⁸ Te tutꞌil jich a yakꞌ sba tutꞌil winike, kꞌax chꞌin a yakꞌ sba, sok la xchꞌuun te ya xbajt ta milel, jaꞌ te kꞌexlaltik sba te milel ta kruse.

⁹ Jaꞌ yuꞌun, Dios a yakꞌ te mas mukꞌ ya xkꞌot ta jkuentae, y te mas ben lek yuꞌun ta spisil te winketike.

¹⁰ Yuꞌun ta skuenta te Jesuse ya skejan sbaik ta spisil te machꞌatik aylan ta chꞌulchane sok te ay ta balmilale y sok te ay ta yeꞌtal balmilale.

¹¹ Y ta spisil ya me yalik te jaꞌ ajwalil stukel ta Jesucristo. Yuꞌun jich me ay slekilal ya xkꞌot a te Dios Tatile.

Te machꞌatik xchꞌuunejik te Cristoe lus kꞌoemik ta balmilal

¹² Jaꞌ yuꞌun, kermanotak te ben kꞌuxex ta koꞌtane, jich tutꞌil la achꞌuunbikon jmantal sil tiempo te kꞌalal joyinejex to aye, te ora to, aunke lom jakal ayon, jich me mas ya skꞌan ya achꞌuunbikon te jmantale. Oꞌtaninaik me te akolelike, xiꞌaik me, nijkꞌuk me te awoꞌtanike.

¹³ Yuꞌun te Diose stukel me ya yaꞌbeyex te tutik lek ya anopike, y stukel ya skoltayex bael ta spasel te tut ya skꞌan yoꞌtane.

¹⁴ Spisil te tut ya apasike ma me sokuk pleto sok ma me xjajch kꞌop awuꞌunik.

¹⁵ Jich me maꞌyuk machꞌa ay smul sok maꞌyuk palta ay awuꞌunik a. Jich me ya xꞌanex tutꞌil yal-xnichꞌan Dios ta yolil te gente te ma lekuk sok te ma tsaꞌamuk yoꞌtanike. Yuꞌun jich kꞌoemex ta yolilik tutꞌil ekꞌetik te ya xtil ta ijkꞌal kꞌinal ta balmilale.

¹⁶ Jich me ya xjuꞌ awuꞌunik te tutꞌil ya awalbeyik ta jamal te skꞌoplal kuxuyinele. Jich te kꞌalal ya xtal te Cristoe, ben kontento ya sujton ta akuentaik, yuꞌun jnaꞌoj te ma jowiluk nax kakꞌoj puersa ta aꞌtel ta akuentaike.

¹⁷ Y manchuk me ya jmal jchꞌichꞌel yuꞌun jich me ya stsꞌakay a te smajtan Dios ya awakꞌike, jaꞌ bi jaꞌ te xchꞌuunel awoꞌtanike, ya xjunub koꞌtan yuꞌun y ya xjunub awoꞌtanik yuꞌun euk ta apisilik te jaꞌexe.

¹⁸ Jich junuk awoꞌtanik euk y ichꞌaik te tutꞌil ben jun koꞌtan yuꞌune.

Te jTimoteo sok te Epafroditoe

¹⁹ Teme jich ya skꞌan te Kajwaltik Jesuse, jnopoj te ya jtikonbeyex tal ta ora te jTimoteoe, yuꞌun jich me ya xjunub koꞌtan te ya kaꞌiy akꞌoplalik te jaꞌexe.

²⁰ Porke maꞌyuk yan te jich yoꞌtan te ya snop te tutꞌil ayone sok te batsꞌi jich ya snaꞌex te lekuk ya xkꞌoex te jaꞌexe.

²¹ Spisilik jaꞌ nax ya sleik te tut ya skꞌan yoꞌtanike, y ma jaꞌuk te tut ya skꞌan yoꞌtan te Jesucristoe.

²² Pero te jaꞌexe anaꞌojikix te ben lek ya xꞌaꞌtej te jTimoteoe, y te tutꞌil la yakꞌ sba ta abatinel te la sjoyinon ta yalel te lek achꞌ kꞌope. La skoltayon sok jich kꞌoem tutꞌil jnichꞌan.

²³ Jich yuꞌun ya me jtikon tal teme la kaꞌiy tutꞌil ya xbajt te ya xchapelone.

²⁴ Aunke xchꞌuunej koꞌtan ta skuenta Kajwaltik te joꞌon mismo ya xtal kilex ta orae.

²⁵ Sok la jnop te puersa ya jtikonbeyex tal te hermano Epafrodito, te joy ta aꞌtel sok ta tsalaw, te jaꞌex mismo la atikonbikon tal yuꞌun te ya kabatine.

²⁶ Yoꞌtanuk te ya xba yilex ta apisilik. Y ben yajtal yoꞌtan porke te jaꞌexe la awaꞌiyik te la sta chamele.

²⁷ Y batsꞌi jich te la sta chamele, y asta kꞌan chamuk. Pero Dios a kꞌuxutayot yuꞌun, y ma stukeluk nax sino ke jichon euk la kichꞌ kꞌuxutayel, yuꞌun jich me maꞌ stsob sba te yajtal koꞌtan ya kaꞌiye.

²⁸ Jaꞌ yuꞌun la jtikonbeyex tal ta ora nax yuꞌun te jaꞌexe ya me xjunub awoꞌtanik te ya xtal yilex xane. Y yuꞌun jich me maꞌyuk yajtal koꞌtan ekꞌa.

²⁹ Ikꞌaik me sok sbujtsꞌ awoꞌtanik jich tutꞌil hermano ta skuenta te Kajwaltike, sok akꞌaik me ta jkuenta sil tiempo te machꞌa pajal yoꞌtan soke.

³⁰ Yuꞌun chꞌin kꞌan chamuk te yakꞌoj sba ta abatinel yuꞌun te Cristoe. Ma xkꞌuxutay te xkuxlejal stukele te la yakꞌ sba ta mantaltesel kuꞌune. Jaꞌ ajelolik te jaꞌex te ma juꞌ awuꞌunik te la awakꞌ abaik ta mantaltesel kuꞌune.