Filipenses 1 - Nuevo Testamento Tzeltal de Amatenango

Spajtil yoꞌtanik

¹ Joꞌon te jPabloon sok te jTimoteoe, te jꞌaꞌtelotik yuꞌun te Jesucristoe, la jtsꞌibatik te karta to yuꞌun te jayebex te ayex ta mukꞌul jtejklum Filipos te ayex ta skuenta Dios sok te jun nax ayex sok te Cristoe, ta apisilik sok te ansianoetik y sok te diakonetike.

² Te Jtatik Diose y sok te Kajwaltik Jesucristoe aꞌ yaꞌbeyex te slekil yoꞌtane sok te bujtsꞌan kꞌinal ta atojolike.

Te jPabloe la skꞌoponbe Dios te hermanoetike

³ Ya kalbe kola yal Dios awuꞌunik ta juju-mel te ya jnaꞌexe,

⁴ y te kꞌalal ya jkꞌopon Diose, sil tiempo bayal slekil koꞌtan ya jkꞌoponbeyex Dios ta apisilik te jaꞌexe.

⁵ Yuꞌun jun nax jchꞌuunejtik te lekil achꞌ kꞌope ta slijkibal to tal asta te ora to.

⁶ Seguro ayon yuꞌun Dios, te la slijkes ta pasel lekil aꞌtel ta atojolik, ya me sjuꞌutes slekil yaꞌtel jaꞌ to te tut kꞌaalil ya sujt tal te Jesucristoe.

⁷ Ben lek ya kaꞌiy te jich ayex ta koꞌtan ta apisilik te jaꞌexe, porke ben jkꞌanojex ta koꞌtan. Porke pajal kichꞌojtik mismo bendisionetik, aunke liꞌ ayonix ta prexo to, o manchuk me ya kichꞌ ikꞌel ta stojol te jꞌuꞌeletike yuꞌun jich me ya jkoltay jba y ya kal te skꞌoplal te kolele.

⁸ Yuꞌun Dios snaꞌoj te bayal kꞌuxex ta koꞌtan ta apisilik, jich tutꞌil kꞌuxotik ta yoꞌtan te Kajwaltik Jesucristoe.

⁹ Ya jkꞌan ta skꞌoponel Dios te yakuk xjul ta mas te skꞌuxul awoꞌtanike, sok bayal pꞌijilil, y sok spisil rasonil.

¹⁰ Yuꞌun jich ya anaꞌik stꞌujel sil tiempo te tut leke, sok jich ya xjuꞌ xkuxuyinex ta jun kuxlejal te ben sakubene, y maꞌyuk tut ay ta makel a te kꞌalal ya sujt tal te Cristoe.

¹¹ Yuꞌun ta skuenta te Jesucristoe ya me xchiknaj te ben lek awꞌatelik ta jaꞌexe. Jich me ya xꞌakꞌot ta jkuenta te Diose, sok lek skꞌoplal ya xkꞌot awuꞌunike.

Te jkuxlejale jaꞌ ta skuenta te Cristoe

¹² Kermanotak ya jkꞌan ya anaꞌik te tutik kꞌaxemix kuꞌune. Jaꞌa tal yuꞌun te ya xpujk xan ta mas a te skꞌoplal kolele.

¹³ Ta spisil te soltaroetik yuꞌun te palasioe y sok ta spisil te yanetik gentee snaꞌojik te ayon ta prexo yuꞌun te jchꞌuunej te Cristoe.

¹⁴ Y bayal te hermanoetik te la yilik te ayon ta prexoe ayix spuersa yoꞌtanik ta yalel tutꞌil ay skꞌoplal te kolele. Ni makꞌ xiꞌik y mas ay spuersa yoꞌtanik ta skuenta te Kajwaltike.

¹⁵ Batsꞌi jich te ay machꞌatik ya yalbe skꞌoplal Cristo sok il-oꞌtan y sok tsalaw. Pero ay yanetik sok slekil yoꞌtan ya yalbeyik skꞌoplal te Cristoe.

¹⁶ Te machꞌatik sok skꞌuxul yoꞌtanik ya yalbeyik skꞌoplal te Cristoe, yuꞌun snaꞌojbeyik sluwar te Dios la yakꞌon liye yuꞌun ya kal ta jamal te skꞌoplal kolele.

¹⁷ Pero ay yanetik te ma junuk yoꞌtanike, te ya skꞌan stoyesik skꞌoplalik stukelik. Sok ya skꞌan yoꞌtanik te yauk jta xan ta mas jwokol te ayon ta prexoe.

¹⁸ Pero ma kocheluk me jun yoꞌtanik o ma junuk yoꞌtanik, ay ya yalbeyik skꞌoplal te Cristoe, y jaꞌto jaꞌ ben jun koꞌtan yuꞌun. Y max to xan ya xjunub koꞌtan,

¹⁹ yuꞌun jnaꞌoj ta spisil te jich aye yuꞌun jaꞌ ta skuenta te ya jta jkolel aye. Porke jnaꞌoj te ya akꞌoponbikon Dios te jaꞌexe y sok te ya skoltayon te Espíritu yuꞌun te Jesucristoe.

²⁰ Jich yuꞌun jaꞌ mukꞌ skꞌoplal ta koꞌtan te maꞌyuk tut ya jta kꞌexlal yuꞌune. Sinoke ya xjuꞌ xkꞌopojon sok spuersa koꞌtan ta sit ta spisilik. Y te ora to sok siluk tiempo ya me kakꞌ ta ichꞌel ta jkuenta te Cristoe. Chikan teme ya to xkuxuyinone o teme tey ya xlajonix aye.

²¹ Porke te tutꞌil kuxulone, jaꞌ ta skuenta te Cristoe; y teme chamone, jich la jpas ganar a.

²² Pero teme sigue kuxulon sok te jtiꞌbalule, ya xjuꞌ sigue lek ya xꞌaꞌtejon ta skuenta te Kajwaltike. Jich ma jnaꞌ te tut ya jtꞌuje.

²³ Yuꞌun ma jnaꞌ te ba ay te mas lek ta xchaꞌkajale. Koꞌtanuk te ya jkꞌan xchamonixe, yuꞌun jich ya xba joyinix a te Cristoe, yuꞌun jaꞌ mas lek ya kaꞌiy te jichuk ya xkꞌote.

²⁴ Pero jaꞌ xan lek ta akuentaik teme sigue kuxulon to sok te jtiꞌbalule.

²⁵ Jich yuꞌun te ya kale, ya to xkuxinon. Jich ya to xtal joyinex te jaꞌexe yuꞌun ya jkoltayex ta chꞌiel xan sok ya ataik butsꞌan kꞌinal sok te xchꞌuunel awoꞌtanike.

²⁶ Jich me ya xba joyinex xan ta yan buelta, skuenta yuꞌun jich ya me awalbey kola yal te Cristo Jesus ta jkuentae.

²⁷ Jaꞌ nax tulan skꞌoplal te ya xkuxuyinex jich tutꞌil ya yal te lek achꞌ kꞌop yuꞌun te Cristoe. Jich mismo teme tal kilex o teme maꞌ talone ya jkꞌan ya kaꞌiy te jaꞌex te sigue jun awoꞌtanik y te jun nax ayexe. Ya me apasik puersa ta apisilik te ya awakꞌik ta chꞌuunel te skꞌoplal kolele.

²⁸ Sok te ni makꞌ ya xiꞌex yuꞌun te machꞌa ya skontrainexe. Jaꞌ to jaꞌ jun seña te ya yilik te chꞌayel ya xlaj jbajt stukelike. Y mismo tiempo a, jaꞌ seña te ya xkolex te jaꞌexe, yuꞌun jich nix yaloj te Diose.

²⁹ Ma jaꞌuk nax a yaꞌbelex te ya achꞌuunik te Cristoe, sino ke jich yaꞌbelex ekꞌa te ya xkꞌax awokolik ta skuenta.

³⁰ Te jaꞌexe y sok te joꞌone pajal nax ya skꞌan jpastik puersa la awilik te nail to te tutꞌil la jpas puersae, y te ora to awaꞌiyejik te tutꞌil sigue ayon ta spasel puersae.