Filemón 1 - Nuevo Testamento Tzeltal de Amatenango

Spajtil-oꞌtanil

¹ Joꞌon jPabloon, te ayon ta prexo ta skaj te Cristo Jesuse, jun nax sok te hermano jTimoteoe, ya jtsꞌibabeyat te karta to, jaꞌat Filemon, te kꞌuxat ta koꞌtan sok te joy jbajtik ta aꞌtele,

² Sok albeya xkoltanuk te hermanoetik te ya stsob sbaik ta anae, jich tutꞌil te kermanatik xꞌApia y sok te kermanotik Arquipo te joy jbajtik sok ta stsalel te pukuje.

³ Te Jtatik Diose y sok te Kajwaltik Jesucristoe a me yaꞌbeyex te slekile y sok te butsꞌan kꞌinal ta atojolik te jaꞌexe.

Te skꞌuxul yoꞌtan y sok te xchꞌuunel yoꞌtan te Filemone

⁴ Sil tiempo ya kalbe kola yal te Dios kuꞌun te ya jnaꞌat ta skꞌoponel Diose.

⁵ Porke la kaꞌiy akꞌoplal, jaꞌ te skꞌuxul awoꞌtan y sok te xchꞌuunel awoꞌtan ta skuenta te Kajwaltik Jesuse, sok kaꞌiyoj skꞌoplal te xkꞌuxul awoꞌtan ta stojol spisil te machꞌatik jtejklumix yuꞌun te Diose.

⁶ Yuꞌun te jun kꞌoemotik ta skuenta te xchꞌuunel koꞌtantike, ya kalbe kola yal Dios te ya xkꞌo jnaꞌtik xan lek ta spisil te bendisionetik te ay kuꞌuntik ta skuenta te Cristo Jesuse.

⁷ Ben kontento ayon y ay spuersa koꞌtan yuꞌun te ay slekil awoꞌtane, porke jaꞌat ta akuenta, hermano, te mukꞌuben yoꞌtanik te hermanoetike.

Te jPablo ya skꞌanbe xkꞌuxultayel te Onésimo

⁸ Jaꞌ yuꞌun, te tutꞌil ay kaꞌtel ta apostol yuꞌun te Cristoe, ya xjuꞌ ya kalbeyat mantal te tut ya skꞌan ya apase.

⁹ Pero jaꞌ ya kalbeyat awokoluk ta skuenta te skꞌuxul awoꞌtane. Joꞌon jPabloon, te mamalonix, y te ora to ayon ta prexo ta skaj te Cristo Jesuse,

¹⁰ ya jkꞌanbeyat pawor yuꞌun te jꞌOnésimoe, te jnichꞌan kꞌoem ta skuenta Dios te liꞌ ayon sok ta prexoe.

¹¹ Te ay kꞌaale, te jꞌOnésimoe jaꞌ amoso te ma xtuun awuꞌune. Pero te ora to, ben lek ya xtuunix awuꞌun y sok ya xtuun kuꞌun.

¹² Ya jtikonbeyat tal ta achꞌ. Jich me xꞌawakꞌ ta jkuenta jich tutꞌil ya awakꞌon ta jkuenta te joꞌone.

¹³ Ya jkꞌan te liyuk ya sjoyinon ae, yuꞌun ya xtuun kuꞌun jich tutꞌil ajelol, te ayon to ta prexo ta skaj te lekil achꞌ kꞌope.

¹⁴ Pero ma jkꞌan jpas teme ma to jichuk ya skꞌan awoꞌtane. Yuꞌun te tut paworil ya apasbone, ya jkꞌan te ma me sujeluk, sino ke ta spꞌejel awoꞌtan.

¹⁵ Porke jaꞌ wan yuꞌun te la spit sba ta atojol jun cheꞌ kꞌaale te jꞌOnésimoe, yuꞌun te ora to ya awikꞌ xan ta sil tiempo.

¹⁶ Ma me jichukix tutꞌil amoso, yuꞌun kꞌax lek ayix tutꞌil jtul mosoe: jichix tutꞌil awijtsꞌin te ben kꞌux ta awoꞌtane. Te joꞌone ben jkꞌanoj, pero te jaꞌate ya skꞌan te mas ben lek ya akꞌane, ma me jaꞌuk nax jich tutꞌil jtul gente, sino ke jich tutꞌil awijtsꞌin ta skuenta te Kajwaltike.

¹⁷ Jich yuꞌun, teme jichon ta awoꞌtan tutꞌil awermanoon ta xchꞌuunel Diose, ikꞌa me jich tutꞌil ya awikꞌon te joꞌone.

¹⁸ Teme ay tut ma lek spasojbeyate, o teme ay chꞌinuk sbet awuꞌune, joꞌon me xꞌakꞌanbon.

¹⁹ Joꞌon jPabloon, ya jtsꞌibabeyat ta jkꞌab te letra to: Joꞌon ya jtojbey te sbete. Aunke ya me kaꞌbeyat anaꞌ te jaꞌat ay abet kuꞌune, jaꞌ te akuxlejale.

²⁰ Jich, hermano, pasbon te pawor to ta skuenta te Kajwaltike. Aꞌbon sbujtsꞌ te koꞌtane jich tutꞌil hermano ta skuenta Cristoe.

²¹ Ya jtsꞌibabeyat porke seguro ayon te ya achꞌuune, y ya jnaꞌ te kꞌaxem ya apas te tut ya jkꞌanbeyate.

²² Sok ya me achapbon xan te ba ya xkꞌo anukone, yuꞌun seguro ayon te ya stsakbeyex akꞌopik te Diose te yakuk yakꞌon te ya xba kilexe.

Spajtil-oꞌtanil y bendision ta slajibal

²³ Ya stikon spajtil awoꞌtanik te Epafras, te joy jba sok ta prexo ta skaj te Cristo Jesuse.

²⁴ Y jich euk te jMarcos sok Aristarco sok Demas sok Lucas te ya skoltayikon ta aꞌtele.

²⁵ Te Kajwaltik Jesucristoe a me yaꞌbeyex te slekilal ta atojolike. Jichuk.