Efesios 6 - Nuevo Testamento Tzeltal de Amatenango

Tsꞌijtesel ta stojol alnichꞌanetik

¹ Alnichꞌanetik, chꞌuunbeyaik me smantal te ameꞌ-atatike ta skuenta slekil yoꞌtan te Kajwaltike, porke jaꞌ lek te jich ya apasike.

² Te primero mantalil te ya yalbeyex te ay tut ya awichꞌik yuꞌune, jaꞌ to: “Akꞌa ta jkuenta te ameꞌ-atatike,

³ yuꞌun jun me awoꞌtan y najt akuxlejal ya xkuxuyinat ta balmilal”, xchi me.

⁴ Y te jaꞌexe, meꞌil-tatiletik, ma me wakꞌ ilinuk te awuntikilike. Sinoke tsꞌijtesaik ta lek, sok komaik, sok sluwaril xꞌawalbeyik ta skuenta te Kajwaltike.

Tsꞌijtesel ta stojol mosoetik sok yajwalik

⁵ Aj-aꞌteliletik, chꞌuunbeyaik smantal te awajwalik liꞌ ba balmilale. Ichꞌaik ta jkuenta, xiꞌaik ta awoꞌtanik, sok junuk awoꞌtanik ta stojolik. Jichuk me ta stojol te tutꞌil ya achꞌuunbey smantal te Cristoe.

⁶ Atꞌejanik ta stojol te awajwale, ma me jaꞌuk nax a te kꞌalal ya yilex ae, swuenta lek akꞌoplal ya xkꞌoex yuꞌun. Jichukex me te tutꞌil yaj-aꞌtel te Cristoe. Pasaik ta spꞌejel awoꞌtanik te tutꞌ ya skꞌan yoꞌtan te Diose.

⁷ Aꞌtejanik sok sbujts awoꞌtanik, jich tutꞌil te yipalat ta aꞌtel yuꞌun Kajwaltik te ma jaꞌuk yuꞌun te winketike.

⁸ Yuꞌun ya anaꞌikix ta juju-tul, me ay ta moso o libre ay, ya me yichꞌ stojol yuꞌun te Kajwaltike, yuꞌun te tutꞌi lek spasoje.

⁹ Y te jaꞌexe te ay amosoik, toj me xꞌawabatin te awaj-aꞌtelike. Ma me asitꞌes ta tulan kꞌop. Naꞌaik me te jaꞌexe sok te awaj-aꞌteletik pajal ayex me ta skuenta te Kajwaltik te ay ta chꞌulchane. Y te Diose maꞌyuk yan ta yoꞌtan, pajal akꞌoplalik yuꞌun.

Te smajkilik te machꞌa xchꞌuunej Diose

¹⁰ Y te ora to, kermanotak, tulan xꞌawakꞌ abaik te jun nax ayex sok te Kajwaltike ta skuenta te spuersa spodere.

¹¹ Chapa abaik sok spisil te amajkilik te ya yaꞌbeyex te Diose, yuꞌun jich me ya xjuꞌ awuꞌunik a te makꞌ sloꞌlayex te pukuje.

¹² Porke ma jaꞌuk ya jtsal jbajtik sok te gente te pajal genteotik soke. Yuꞌun jaꞌ ya jtsal jbajtik sok te spuersa pukujetik te ma tsaꞌamuk yaꞌtele. Jaꞌik ya xmantalejik, ay yaꞌtelik, y ya skuentainik te balmilal to te ay ta ijkꞌal kꞌinale.

¹³ Jaꞌ yuꞌun, ichꞌaik spisil te amajkilik te yakꞌojbeyex te Diose, yuꞌun jich me ya xjuꞌ awuꞌunik te ya akoltay aba te tut kꞌaalil te ma lekuke. sok jich ya xjuꞌ awuꞌunik te tulan ya atejkꞌan abaik, yuꞌun te chapalex ta leke.

¹⁴ Jich yuꞌun, tulan me xꞌawakꞌ abaik. Jaꞌuk xchujkil achꞌujtik te tut batsꞌi jiche, y jaꞌuk me smajkil awoꞌtanik te tut stojile.

¹⁵ Siluk me tiempo chapalex yuꞌun ya xlokꞌex ta yalel skꞌoplal te bujtsꞌan kꞌinale.

¹⁶ Sok jaꞌ tulan skꞌoplal te xchꞌuunel awoꞌtanike, te jaꞌuk me amajkilik te ya skoltayex yuꞌun te skꞌajkꞌal sniꞌ yaꞌtajib te pukuje.

¹⁷ Jaꞌuk me smajkil ajolik te akolelike. Y te skꞌop Diose jaꞌuk me apuñalik te ya yaꞌbeyex te Chꞌul Espiritue.

¹⁸ Siluk me tiempo kꞌoponaik te Diose. Wokoletanik y kꞌanbeyaik Dios te siluk tiempo ya stojutesex te Espiritue. Kuxuluk me awoꞌtanik. Ma me cheban awoꞌtanik, y kꞌoponbeyaik Dios spisil te machꞌatik xchꞌuunejik Diose.

¹⁹ Y kꞌoponbonik me Diose euk, yuꞌun Dios me ya yaꞌbon te kꞌopetik ya skꞌan ya kale. Yuꞌun jich me ya xjuꞌ yuꞌun yalel sok yip koꞌtan te skꞌoplal kolel, y jich ya kakꞌ ta naꞌel te tut mukul ay ta nail toe.

²⁰ Dios me stikonejon ta kꞌop yuꞌun te skꞌoplal kolele, te jaꞌ sluwar te ayon ta prexo te ora to. Kꞌoponaik Dios yuꞌun jich me ya kal te tutꞌil ya skꞌan ya kal, te maꞌyuk machꞌa ya xiꞌon yuꞌune.

Spajtil-oꞌtanil ta slajibal

²¹ Te jTiquico, te hermano ben kꞌux ta koꞌtane y ben jun yoꞌtan te ya xkoltawan ta yaꞌtel te Kajwaltike, ya yichꞌ bael spisil te kꞌopetik te tutꞌ ayone sok te tut yipalon ta spasele.

²² Jaꞌ yuꞌun la jtikonbeyex bael te jaꞌexe. Yuꞌun me ya yalbeyex te tut ayotike, yuꞌun jich ya yaꞌbeyex spuersa awoꞌtanik.

²³ Te Dios Tatile y sok te Kajwaltik Jesucristoe ya me yakꞌtalanbe te bujtsꞌan kꞌinal te hermanoetike. Y sok te xkꞌuxul-oꞌtanile sok te xchꞌuunel-oꞌtanile.

²⁴ Dios a me yaꞌbey te slekil yoꞌtan ta stojol spisil te machꞌatik sil tiempo kꞌux ta yoꞌtanik te Kajwaltik Jesucristoe. Jichuk.