Efesios 4 - Nuevo Testamento Tzeltal de Amatenango

Jun nax ayotik ta skuenta te Espiritue

¹ Jaꞌ yuꞌun te joꞌone te ayon ta prexo ta skaj te Kajwaltike, ya kalbeyex awokolikuk te lekuk ya xꞌanex, jich tutꞌil ya skꞌan ya spasik te machꞌatik ikꞌbilix yuꞌun te Diose, jich tutꞌil te jaꞌexe.

² Mansoukex me y lekuk me ya awila abaik. Yauk me stsꞌijk awuꞌunik y talel bael ya xkujch awuꞌunik sok skꞌuxul awoꞌtanik.

³ Oꞌtaninaik te jun nax ayex sil tiempoe. Jaꞌ ya skoltayex te Chꞌul Espiritue, te jun nax ya xkꞌoex ta skuenta te butsꞌan kꞌinal te ya yakꞌe.

⁴ Jun nax atiꞌbalulik y jun nax te Espíritu awikꞌojike, jich tutꞌil te Dios te la yikꞌex te jun nax te tut ya amaliyike.

⁵ Jtul nax te ajwalil awuꞌunik, jun nax te tut achꞌuunejike, jun nax te ichꞌjaꞌ awichꞌojike,

⁶ jun nax te Dios te jaꞌ Tatil yuꞌun spisil y te stukel ay ta skuenta spisil. Ya xꞌaꞌtej ta spisil y yuꞌun ta spisil.

⁷ Pero ta juju-tul te joꞌotike kichꞌojtikix jmajtantik chikan te tutꞌil la yaꞌbotik te Cristoe.

⁸ Jaꞌ yuꞌun te jich ya yal te Sjun Diose: “Mo bael ta chꞌulchan, yikꞌoj bael te machꞌatik chukajtike, y la yaꞌbe majtanil te winketike”, te xchie.

⁹ ¿Y tut xyal te moel bael”, te xchie? Jaꞌ xyal te primero a koj tal liꞌ ba balmilale.

¹⁰ Y te machꞌa koj tale jaꞌ mismo te machꞌa mo bael te ba mas toyol te chꞌulchane. Yuꞌun ba skuentain spisil te tutik aye.

¹¹ Y stukel mismo la yakꞌ te majtaniletik te ay apostoletike y machꞌatik ya yalik te skꞌop Diose, y yan ya yalbe skꞌoplal te kolele y ay yan pastoretik y maestroetik.

¹² Jich la xchap te ay machꞌatik ya skoltay te yanetik yuꞌun ya smukꞌutes te machꞌatik yuꞌun te Cristoe.

¹³ Jaꞌ to te jpisiltik te jun nax ya xkꞌootik ta skuenta te xchꞌuunel-oꞌtanile y te pajal ya jnaꞌbeytik sba te Xnichꞌan Diose. Yuꞌun jich ya jtajtik a te ya xmukꞌubotike te yan yan ya jta bael kiptik jaꞌ to teme la jtabetik smukꞌul te Cristoe.

¹⁴ Ma me jichukotikix tutꞌil untik te jtsꞌin nax ya xyanej sok te bayuk nax ya xꞌikꞌot bael jich tutꞌil ikꞌ ta xchꞌuunel achꞌ nojpesele. Asta ya xloꞌlayot bael yuꞌun gente te ya xloꞌlaywan te ya xbeenik te ba sbelel te chꞌayele.

¹⁵ Jaꞌ lek ya kaltik sok skꞌuxul koꞌtantik te tut batsꞌi jich. Jich ya xmukꞌubotik ta spisil te tutꞌil ay te Cristoe, te jaꞌ jolol yuꞌun te machꞌatik yuꞌune.

¹⁶ Ta skuenta Cristo spisil te jchꞌuunjeletik ya yichꞌik chapel te jun nax ya xkꞌotik yuꞌun, ta skaj te jun ayik soke. Y kꞌalal lek ya spasik te aꞌtel te ay ta skuenta juju-tul spasele, spisilik ya me xchꞌiik bael sok ya me xmukꞌubik bael ta skuenta te skꞌuxul yoꞌtanike.

Te achꞌ kuxlejal ta skuenta te Cristoe

¹⁷ Jich yuꞌun ya kalbeyex y ya jpasex ta mantal ta skuenta te Kajwaltike: Te ma me jichukix ya xꞌanex te tutꞌil yanetik genteetike te ma xchꞌuunejikuk te Diose, te jaꞌ nax ya spasik te tut ya snop ta jowil nax spensarike,

¹⁸ sok te ijkꞌuben ay te yoꞌtanike. Te stukelike makꞌ skꞌupinik te xkuxlejalik te ya xtal ta stojol te Diose. Porke yuꞌun ma snaꞌik kꞌinal ta skaj te stulanil yoꞌtanike.

¹⁹ Maꞌyukix kꞌexlal ya yaꞌiyik yuꞌun te mulile, y lijk yakꞌ sbaik ta spasel te tut ya skꞌan te stiꞌbalulike, jaꞌ te spisil ta jkaj te tutik ma lekuke.

²⁰ Pero te jaꞌexe ma jichuk anopojik ta skuenta Cristo yuꞌun te jich ya xkuxuyinexe,

²¹ teme batsꞌi jich te la awaꞌiyikix te tutꞌ ay skꞌoplal stukele y la awichꞌik pꞌijutesel ta skuenta te tut batsꞌi jich yuꞌun te Jesuse.

²² Te tutꞌil ay te antibo akuxlejalike, jilesaik ta pasel te kꞌaꞌ kuxlejal yuꞌun atiꞌbalulik te makꞌ xtuune, yuꞌun loꞌlabilex yuꞌun te tut ma tsaꞌamuk ya skꞌan awoꞌtanike.

²³ Te jaꞌexe ya skꞌan xꞌachꞌubex sok te apensarike y sok awoꞌtanik.

²⁴ Ichꞌaik te yachꞌil akuxlejalik te la xchiknates te Diose sok te pajal yilel soke. Y jich me ya xchiknaj te toj te akuxlejalik sok te ma tut kapal ae, te ipꞌajem yuꞌun te tut batsꞌi jiche.

²⁵ Jaꞌ yuꞌun jilesaik me te le-lote. Jaꞌ lek te jaꞌ ya awalik ta juju-tulex te tut batsꞌi jich ta stojol te ajoy ta genteile. Porke jpisiltik jun nax ayotik.

²⁶ Teme ya xꞌilinexe, ma me mulawananik, sok ma me spꞌejeluk kꞌaal te ya xꞌilinexe.

²⁷ Ma me awaꞌbeyik te ya yochintayex te pukuje.

²⁸ Te machꞌa ya xꞌelkꞌaje, a me sjiles te elekꞌe, sok a me aꞌtejuk ta skꞌab ta spasel te tut leke. Yuꞌun jich me ay tut ya xjuꞌ ya yaꞌbe chꞌinuk te machꞌatik ay nesesidad yuꞌune.

²⁹ Ma me awalik te ma tsaꞌamuk kꞌopetik, jaꞌ nax me xꞌawalik te lekil kꞌopetike te snujp ta alele, te ya skoltay ta smukꞌutesel te machꞌatik ya yaꞌiyike, skuenta jich me ya staik bendision.

³⁰ Ma me awakꞌik ta ajtal-oꞌtan te Chꞌul Espíritu yuꞌun te Diose. Yuꞌun ja amarkaik aꞌbilex te ya xchiknates te batsꞌi yuꞌunex te Diose, jaꞌ to te tut kꞌaalil te ya yaꞌbeyex te akolelike.

³¹ Chꞌojaik lokꞌel te ilbajinwaneje, te kꞌajkꞌubele, sok te iliꞌbae, te alabiyanwaneje, te ixtaꞌkꞌoptawaneje, y spisil ta jkaj te tut ma lekuke.

³² Ya skꞌan te ayuk me slekil awoꞌtanik sok skꞌuxul awoꞌtanik ta juju-tulex. Sok aꞌbeya abaik perdon ta juju-tulex jich tutꞌil te Dios la yaꞌbeyexix perdon ta skuenta te Cristoe.