Efesios 3 - Nuevo Testamento Tzeltal de Amatenango

Aꞌbot yaꞌtel te Pablo ta stojol te ma judiouke

¹ Jaꞌ sluwaril te ayon ta prexo, joꞌon te jPabloone, ta skaj te Cristo Jesuse sok yuꞌun alekilik te jaꞌexe ta ma juriyoukexe.

² Yuꞌun ya skꞌan ya anaꞌik: Te ta skuenta slekil yoꞌtane, Dios la yaꞌbon kaꞌtel ta skuenta alekilik te jaꞌexe.

³ Dios la yaꞌbon kil te tut mukul ta yoꞌtane, y la yaꞌbonix jnaꞌ jich tutꞌil la jtsꞌibabeyex chaꞌoxpꞌaluke.

⁴ Teme la awilike, tey ya anaꞌik te tut mukul ta yoꞌtan te Cristoe te la jnaꞌixe,

⁵ te tut mukul ay te maꞌyuk machꞌa aꞌbot snaꞌ te ay tal kꞌaale. Pero te ora to Dios la yakꞌix ta naꞌel ta skuenta te chꞌul apostoletike y sok te jꞌalwanejetike ta skuenta te Espíritu yuꞌune.

⁶ Te tut mukul aye, jaꞌ to: Jaꞌ ta skuenta te skꞌoplal kolel, te machꞌatik ma juriyouke mismo ya yichꞌik te majtanil te tutꞌ yuꞌun te juriyoetike. Yuꞌun jun nax mismo stiꞌbalulikix, sok yuꞌunik ekꞌa te tut sjapoj Dios ta skuenta te Cristo Jesuse.

⁷ Jaꞌ jmajtan yuꞌun Dios te jich ayon te aꞌtel ta yalel skꞌoplal te kꞌop to ta skuenta spoder te Diose.

⁸ Te joꞌone chꞌin ayon ke te machꞌa mas chꞌin ta spisil te machꞌatik yuꞌun te Diose. Pero stukel a yaꞌbon te ya xjuꞌ kuꞌun yalel te ba ay te machꞌatik ma juriyouke te lek achꞌ kꞌop te ma pꞌisbiluk nax skꞌulejal te Cristoe.

⁹ Y jaꞌ aꞌbilon kaꞌtel te ya jpasbe yilik ta spisilik te tut xchapoj ta sil tiempo te mukul ay yuꞌun te Diose, te jaꞌ spasoj spisil te tutik aye.

¹⁰ Jich kꞌot ta pasel yuꞌun te ora to ta skuenta te juju-tijkꞌ hermanoetike, ta spisil te machꞌatik ay spoderik y ay yaꞌtelik ta chꞌulchan ya xkꞌo snaꞌik te tutꞌil ay bayal ta jkaj spꞌijil te Diose.

¹¹ Jich a spas to te Diose jich tutꞌil te xchapoj ta sbajtel kꞌinale te jich a kꞌot ta skuenta te Kajwaltik Jesucristoe.

¹² Jaꞌ ta skuenta Cristo te ya xjuꞌ kuꞌuntik te ya xtijilajotik ta stojol te Diose. Jun koꞌtantik ya xꞌochotik tey a ta skuenta te xchꞌuunel koꞌtantike.

¹³ Jaꞌ yuꞌun awokolikuk ma me acheban awoꞌtanik yuꞌun ta skaj te jaꞌex te ayon ta wokole. Yuꞌun tey ya ataik alekilalik a te jaꞌexe.

Te skꞌuxul yoꞌtan te Cristoe

¹⁴ Jaꞌ sluwar te ya jkejan jba ta stojol te Tatile.

¹⁵ Spisil yichꞌoj sbiil yuꞌun te jayeb ta jkaj te tutik ay ta chꞌulchan sok ta balmilale.

¹⁶ Ya jkꞌanbe te ya yaꞌbeyex ta awoꞌtanik te slekilal stsaꞌamule sok apuersaik sok apoderik ta skuenta te Espíritu yuꞌune.

¹⁷ Y te ya xꞌanin ta awoꞌtanik te Cristo ta skuenta te xchꞌuunel awoꞌtanike. Jich te jaꞌexe junuk awoꞌtanik y toyoluk tsunulex ta skuenta te skꞌuxul awoꞌtanike.

¹⁸ Jich ya xjuꞌ awuꞌunik ta snaꞌel sok spisil te hermanoetike te lom jamal, lom najtꞌ, y lom toyol kꞌoel, y lom toyol moem te skꞌuxul yoꞌtan te Cristoe.

¹⁹ Ya jkꞌanbe te yauk anaꞌik te tutꞌil ay te skꞌuxul yoꞌtane te jaꞌ lom bayal mas mukꞌ ta spisil ke te tut ya jnaꞌtike, skuenta yuꞌun jich ben tsꞌakal ya awichꞌbeyik slekilal te Diose.

²⁰ Y te ora to aꞌ chiknajuk slekilal te Diose te ay spoder yuꞌun spasel bayal ta mas te tutik ya jkꞌanbetik o te tut ya jnoptike, ta skuenta te spoder te ya xꞌaꞌtej ta jtojoltike.

²¹ Aꞌ chiknajuk slekilal te Dios te ba ay te juju-tijkꞌ hermanoetike, sok ta skuenta te Cristo Jesuse ta sil tiempo y ta sbajtel kꞌinal. Jichuk.