Efesios 1 - Nuevo Testamento Tzeltal de Amatenango

Spajtil yoꞌtanik

¹ Joꞌon jPabloon, apostolon yuꞌun te Jesucristoe te jich a skꞌan yoꞌtan te Diose. La jtsꞌibay te karta to yuꞌun te jayebex ayex ta skuenta Dios sok te achꞌuunejik te Cristo Jesuse te ayex ta mukꞌul jtejklum Efeso.

² Te Jtatik Dios sok te Kajwaltik Jesucristoe aꞌ yaꞌbeyex te slekil yoꞌtan y sok te bujtsꞌan kꞌinal ta atojolike.

Bendisionetik ta skuenta Cristo

³ Ben tsaꞌam te Dios te Stat te Kajwaltik Jesucristoe. Yuꞌun te jun ayotikix sok te Cristoe, jich la yaꞌbotikix spisil ta skajal skaj bendisionetik te ay ta skuenta te chꞌulchane.

⁴ Dios la stꞌujotik ta skuenta Cristo antes te ma to spas a te balmilale, yuꞌun jich me tojutesbilotikix ta skuenta y maꞌyukix jmultik ya xkꞌootik ta sit.

⁵ Ta skuenta skꞌuxul yoꞌtan jich chapal yuꞌun te nail toe te jich ya yikꞌotik ta yal-xnichꞌan ta skuenta te Jesucristoe, jich tutꞌil te yaloje te jich ya skꞌan yoꞌtane.

⁶ Jich yuꞌun, sil tiempo ya jkꞌayojintik te slekilal te Diose, yuꞌun jich a yaꞌbotik bendision ta skuenta te Xnichꞌan te ben bayal skꞌanoje.

⁷ Ta skuenta bayal skꞌuxul yoꞌtan, Dios a yakꞌotik ta libre ta skuenta te Xnichꞌan te la smal xchꞌichꞌele. Y la spasbotikix perdon yuꞌun te jmultike.

⁸ Dios la yaꞌbotik kiltik te slekil yoꞌtane sok la yaꞌbotik spisil pꞌijilil y sok rasonil.

⁹ Y la yaꞌbotikix jnaꞌtik te tut ya skꞌan yoꞌtan te ma chikanuke, jaꞌ te tut xchapoj stukel mismo te yaloj te jich ya xkꞌot ta pasel yuꞌune.

¹⁰ Te tut xchapoje ya me xkꞌot ta pasel te ya sta stiempoil yuꞌune. Dios ya me yakꞌ ta skuenta Cristo spisil te tutik ay ta chꞌulchan sok ta balmilal.

¹¹ Dios a stꞌujotik ta slijkibal to tal, yuꞌun te jun nax ya xkꞌootik sok te Cristo sok ya me xba kichꞌtik te jmajtantik te xatꞌbilotike. Jich tutꞌil snopoj stukel mismo te Diose, sok ya xkꞌot ta pasel yuꞌun spisil te tut lek ya yile.

¹² Jich a spas, yuꞌun te joꞌotik te nail la jchꞌuuntik te Cristoe, jujun kꞌaal te kuxulotike ya me kalbetik te slekilal te Diose.

¹³ Y jich te jaꞌexe, kꞌalal la awaꞌiyik te skꞌoplal tut batsꞌi jiche te jaꞌ skꞌoplal te kolele y te la achꞌuunik te Cristoe, jich jun nax a kꞌoex sok. Sok la awikꞌik te Chꞌul Espíritu te jaꞌ amarkaik te jich yaloj Dios te ya yaꞌbeyexe.

¹⁴ Te Chꞌul Espiritue jaꞌ seña te ya kichꞌtik te majtanil te Dios ya yaꞌbotik kꞌalal ya stsꞌakay te machꞌatik ya yichꞌ koltayel yuꞌune. Yuꞌun jich me ya kalbetik te slekilale.

Te jPabloe ya skꞌanbe Dios te yauk xꞌaꞌbot spꞌijil te hermanoetike

¹⁵ Yuꞌun la jnaꞌix te jaꞌex te ay xchꞌuunel awoꞌtanik ta skuenta te Kajwaltik Jesuse y sok ay xkꞌuxul awoꞌtanik ta stojol spisil te machꞌatik yuꞌun te Diose.

¹⁶ Ma jkom jba ta yalbeyel kola yal Dios yuꞌun te jaꞌexe, sok ya jnaꞌulanex ta skꞌoponel Dios.

¹⁷ Ya jkꞌanbe te Diose yuꞌun te Kajwaltik Jesucristoe, te Tatil te lom bayal slekilale, aꞌ yaꞌbeyex te pꞌijilil ta skuenta te Espiritue, skuenta yuꞌun jich ya anaꞌik a te tut ya yakꞌ ta naꞌele, y ya me anaꞌbeyik sba ta lek.

¹⁸ Ya jkꞌanbe Dios te yauk sjambeyex apensarike yuꞌun ya me anaꞌik a te tut yipalex ta smaliyel te jaꞌ ikꞌbilexix yuꞌune. Ben tsaꞌam y ben chapal te majtanil te Dios ya yaꞌbe te machꞌatik yuꞌune.

¹⁹ Y kꞌax mukꞌ y maꞌyuk slajibal te spodere te ya xꞌaꞌtej ta jtojoltik, joꞌotik te jchꞌuunejtike. Te spoder to jaꞌ mismo te la yakꞌ ta ilel te Dios sok bayal spuersae

²⁰ te kꞌalal la xchaꞌkuses tal te Cristo te ba ay te animaetike, y la yakꞌ nakluk ta sbatsꞌil skꞌab ta chꞌulchan.

²¹ Jaꞌ muk a kꞌot yuꞌun spisil te tutik ay spuersa, sok te ay yaꞌtelike, sok te ay spodere y sok te ya xmantalteswanike. Y jaꞌ mukꞌ a kꞌot yuꞌun spisil te tutik aye te tutik ay ta balmilal sok te tutik ya xtal ta patile.

²² La yakꞌ te ya xchꞌuunbeyik smantal Cristo spisil te tutik aye, sok la yakꞌ te jaꞌ jolol yuꞌun spisil te juju-tijkꞌ hermanoetik te Cristoe.

²³ Yuꞌun te juju-tijkꞌ hermanoetike jaꞌ stiꞌbalul kꞌoem te Cristoe. Jich tsꞌakalix a kꞌot a te Cristoe, y te Cristoe jaꞌ tsꞌakal yuꞌun spisil te tutik aye.