Colosenses 4 - Nuevo Testamento Tzeltal de Amatenango

¹ Te jaꞌex ajwaliletik, tojukex me y lekukex me sok te amosoike. Naꞌaik me euk te jaꞌexe te ay jtul Awajwalik te ay ta chꞌulchane.

² Ma me xꞌakom abaik ta skꞌoponel te Diose. Siluk me tiempo kuxul awoꞌtanik sok albeyaik kola yal te Diose.

³ Kꞌoponbotik Dios euk te joꞌotike te yakuk sjambotik puerta te Kajwaltike ta yalel te skꞌope, sok ta yalel te tut mukul ay yuꞌun te Cristoe, te jaꞌ ayon ta prexo yuꞌun.

⁴ Kꞌoponbon Dios te jamaluk ya kal te skꞌop Diose, jich tutꞌil ya skꞌan ya kale.

⁵ Pꞌij me xꞌawakꞌ abaik yuꞌun te machꞌatik ma xchꞌuunejuk Diose. Y lekuk xꞌatuuntesik te tiempoe.

⁶ Lekuk me ya xkꞌopojex siluk me tiempo, ya skꞌan te tsaꞌamuk ta aꞌiyele. Y ya me skꞌan ya anaꞌik tutꞌil ya asujtesbeyik skꞌop juju-tul.

Spajtil-oꞌtanil ta slajibal

⁷ Te kermanotik jTiquico te ben kuꞌx ta koꞌtantike, sok te ben jun yoꞌtan ya xkoltawane, y te la sjoyinon ta abatinel yuꞌun te Kajwaltike, jaꞌ ya yalbeyex tutꞌil ayon.

⁸ Jaꞌ yuꞌun ya jtikonbeyex tal te jaꞌexe yuꞌun ya yalbeyex tutꞌil ayotik y ya yaꞌbeyex spuersa awoꞌtanik.

⁹ Jaꞌ me ya xtal sok te jꞌOnésimoe, jaꞌ te kermanotik te kꞌux ta koꞌtantik y te ben jun yoꞌtan, te lokꞌem tal ta awolilike. Jaꞌ me ya yalbeyex spisil te tut ya xkꞌot ta pasel liye.

¹⁰ Xkoltanukex laj me yuꞌun euk te Aristarco, te joy jba sok ta prexoe. Y jich euk te jMarcose te yal xwix te jBernabee. Te jaꞌexe la kalbeyexix mantal te tut ya skꞌan ya apasik sok te jMarcose; teme tal yulutayexe, lek me xꞌawikꞌik.

¹¹ Sok xkoltanukex laj me yuꞌun euk te Jesus, te Justo te xcheꞌbal sbiile. Jaꞌ to stukelik nax te ay ta yolilik te hermanoetik juriyoetik te la sjoyinikon ta aꞌtel te tutꞌil ay ta ajwalinel te Diose, y lom bayal a sjunutesbonik koꞌtan.

¹² Xkoltanukex laj me yuꞌun euk te Epafras te jtul yaj-aꞌtel te Cristo Jesuse, te lokꞌem tal ta awolilike. Sil tiempo ya skꞌoponbeyex Dios ta akuentaik yuꞌun jich me jun awoꞌtanik a, y sok spisiluk awoꞌtanik ya apasik te tut ya skꞌan yoꞌtan te Diose.

¹³ Joꞌon testigoon yuꞌun te Epafras te lom bayal yajtalex yoꞌtan te jaꞌexe y sok te machꞌatik ayik ta Laodiceae y sok te ay ta Hierapolise.

¹⁴ Xkoltanukex laj me yuꞌun te jLucas, te jloktor te ben kꞌux ta koꞌtane, y sok te jDemase.

¹⁵ Albeyaik xkoltanuk te hermanoetik te aylan ta Laodiceae. Y albeyaik xkoltanuk euk te Ninfa y sok te machꞌatik ya stsob sbaik ta snae.

¹⁶ Ta patil teme laj akꞌoponik jaꞌex te karta to, tikonbeyaik bael te hermanoetik te ayik ta Laodiceae, yuꞌun jich me ya xkꞌo yilik a. Y te jaꞌex teme sujt tal te ba ayex te karta la jpasbey ta stojolike, kꞌoponaik euk.

¹⁷ Albeyaik te Arquipoe te a me sjuꞌutes ta lek te yaꞌtel te jich aꞌbil yuꞌun te Kajwaltike.

¹⁸ Joꞌon jPabloon la jtsꞌibabeyex te spajtil-oꞌtanil to ta jkꞌab y ta letra. Naꞌaik me te ayon ta prexoe. Te Diose aꞌ yaꞌbeyex te slekilal ta akuentaik te jaꞌexe. Jichuk.