Colosenses 2 - Nuevo Testamento Tzeltal de Amatenango

¹ Yuꞌun ya jkꞌan ya anaꞌik te lom tulan ayon ta spasel puersa ta akuentaike. Sok ta skuenta te machꞌatik ayik ta Laodiceae y ta spisil te machꞌatik ma to yilojikukon ta jteklejale.

² Yuꞌun ya jkꞌan te ya yichꞌ spuersa te awoꞌtanike, yuꞌun ya me xchiknaj te jun nax ayex ta skuenta te skꞌuxul awoꞌtanike, sok yuꞌun te ben tsꞌakal ya anaꞌik te tut mukul ay yuꞌun Dios, te jaꞌ te skꞌoplal te Cristoe.

³ Yuꞌun stukel smakoj ta spisil te slekil skꞌulejal te pꞌijilile y te tut ya yakꞌ ta naꞌele.

⁴ Jaꞌ to jaꞌ ya kalbeyex yuꞌun maꞌyuk machꞌa ya sloꞌlayex te ay spꞌijil yaꞌiyel te skꞌope.

⁵ Manchuk me maꞌyukon ta awolilik ta jteklejal, pero joyinejex ta koꞌtan. Y ben jun koꞌtan yuꞌun ya kil te lek yipalex bael ta spasel, y te jun awoꞌtanik achꞌuunejik te Cristoe.

Te achꞌ kuxlejal yuꞌun te Cristoe

⁶ Jaꞌ yuꞌun, jich tutꞌil te la achꞌuunik te Kajwaltik Jesucristoe, jich ya skꞌan xkuxuyinex ta jun nax sok.

⁷ Tsꞌunulukex me lek ta skuenta stukel, jmel nax junuk awoꞌtanik yuꞌun ta skuenta te xchꞌuunel awoꞌtanik, jich tutꞌil te la awichꞌik nojpesele. Y sil tiempo albeyaik kola yal Dios.

Tsꞌakal kichꞌojtik jkuxlejaltik yuꞌun te Cristoe

⁸ Ila me abaik yuꞌun te machꞌatik ya skꞌan sloꞌlayex yuꞌun te tut snopoj te jowil naxe. Yuꞌun te stukelike ma yakꞌojuk ta jkuenta te Cristoe. Jaꞌ nax yakꞌojik ta jkuenta te skostumbre gentee y sok te jowil pꞌijutesel yuꞌun te balmilale te ma jaꞌuk ta skuenta Cristoe.

⁹ Porke spisil te tut jaꞌ yuꞌun te Diose, tsꞌakal yichꞌojbe ta steklejal te Cristoe.

¹⁰ Y te jaꞌexe tsꞌakal awichꞌojbeyik slekilal te Diose yuꞌun jun nax ayex sok te Cristoe, te jaꞌ jolol yuꞌun spisil te chꞌul angeletik te ay spoderik sok te ay yaꞌtelike.

¹¹ Sok xan, te jaꞌex te jun nax ayex sok te Cristoe, awichꞌojikix sirkunsision. Ma jaꞌuk te sirkunsision te ya xꞌakꞌot ta tiꞌbalulile, sino ke jaꞌ te libre ayexix yuꞌun te amulawil tiꞌbalulike. Jaꞌ te sirkunsision te talem ta skuenta te Cristoe.

¹² Yuꞌun la awichꞌik mukel sok Cristo te la awichꞌik jaꞌe. Y la awichꞌik chaꞌkusesel sok, porke la achꞌuunik te tutꞌil Dios la xchaꞌkuses ta skuenta spoder.

¹³ Te jaꞌex te namey tale, chamenex kꞌoem ta skaj te amulike sok ta skaj te ma ba ochemex ta jtejklum yuꞌun Diose. Pero te ora to, Dios a yaꞌbeyexix akuxlejalik jun nax sok te Cristoe, yuꞌun la spasbeyex perdon yuꞌun spisil te amulike.

¹⁴ Dios la stupꞌbotikix ta jun te jayeb buelta la jkꞌaxintaybetik te smantale te kechel ta jkuentatik stojele. La slajinbe skꞌoplal a te la yichꞌ kꞌojel ta lawux ta kruse.

¹⁵ Kꞌalal cham ta krus te Cristoe, Dios la stsal jilel te tutik ay spoder y ay yaꞌtelike, y akꞌot at ilel ta sitil komon te tutꞌil ochemik ta kꞌabal kꞌalal la yaꞌi tsalaw te Cristoe.

Leaik te tutik skuenta te chꞌulchane

¹⁶ Jaꞌ yuꞌun, ma me xꞌawichꞌik ta jkuenta te machꞌa ya yikꞌtinex yuꞌun te tutik ya aweꞌik o ya awuchꞌike, o jich tutꞌil te skꞌaalel kꞌinetike, o te yuninal ue, o te skꞌaalel kuxo-oꞌtane.

¹⁷ Spisil to jaꞌ seña to nax te tut ya xtale. Pero te tut batsꞌi jiche, jaꞌix te Cristoe.

¹⁸ Ma me awakꞌik te ay machꞌa ya yaꞌbeyex yajtal awoꞌtanike, te skꞌayinej te chꞌin yakꞌoj sbaik y te ya skejan sbaik ta skuenta te angeletike. Lom nax ya yalik te ay tut yiloje, y jowiyel nax ya stoy sbaik ta skaj nax spensarik ta stiꞌbalulik nax.

¹⁹ Te stukelike ma junuk nax ayik sok te Cristo, te jolol kuꞌuntike, te jaꞌ ya yakꞌ mukꞌubuk spisil te stiꞌbalul te ya smakꞌline, y jun nax ya yakꞌ ta juju-chꞌam, jich tutꞌil snopoj te Diose.

²⁰ Te jaꞌexe chamenex sok te Cristoe, y ma jaꞌukix ya achꞌuunik te jowil pꞌijutesel yuꞌun te balmilale. ¿Tut yuꞌun te jich to ya xꞌanex tutꞌil te machꞌatik ayik to ta skuenta te balmilale? ¿Tut yuꞌun te ya to achꞌuunik te mantalil yuꞌunike,

²¹ jich tutꞌil: “Ma me apikik me to, ma me aweꞌik me to, ma me apikik ta akꞌabik”, te xchiike?

²² Spisil te mantaletik to, jaꞌ nax skꞌoplal te tutik ya xlaj ta tuuntesel ta orae. Y jaꞌ nax smantal winik sok jaꞌ nax spensarik te gentee.

²³ Jich yaꞌiyel te pꞌijil kꞌop te tut ya yalike, sok xchꞌuunel Dios yilel te kꞌax chꞌin ya kakꞌ jbatik y tulan trate ayotik sok te jtiꞌbalultike. Pero jowil nax, yuꞌun ma skombotik te tut ya skꞌupin te jtiꞌbalultike.