Colosenses 1 - Nuevo Testamento Tzeltal de Amatenango

Spajtil yoꞌtanik

¹ Joꞌon jPabloon, apostolon yuꞌun te Jesucristoe, te jich a skꞌan yoꞌtan te Diose, sok te jTimoteoe,

² la jtsꞌibayex te karta to, jaꞌex te yuꞌunex Dios te jun awoꞌtanik achꞌuunejik te Cristo te ayex ta jtejklum Colosae. Te Jtatik Diose aꞌ yaꞌbeyex te slekil yoꞌtane y sok te bujtsꞌan kꞌinal ta atojolike.

La skꞌopon Dios te jPablo yuꞌun te hermanoetike

³ Sil tiempo te ya jkꞌoponbeyex Dios te jaꞌexe, ya kalbeytik kola yal Dios te Stat te Kajwaltik Jesucristoe.

⁴ Yuꞌun kaꞌiyejtikix akꞌoplalik te achꞌuunejikix te Cristo Jesuse y sok te kꞌux ya awaꞌiy abaik ta apisilik te jtejklumex yuꞌun te Diose.

⁵ Yuꞌun jich ay ta awoꞌtanik te tut yipalex ta smaliyel te tut kꞌejbilex ta chꞌulchan te ya awichꞌike. Jaꞌ te la awaꞌiyikix te kꞌop te batsꞌi jiche, jaꞌ te lek yachꞌil kꞌop yuꞌun te kolele.

⁶ Jaꞌ te kꞌop to te la awaꞌiyikixe, yipalix ta mukꞌubel y yipal ta sitinel ta bayuk ta spisil balmilal. Jaꞌ pajal sok te kꞌotix ta pasel ta akuentaik te kꞌalal la awaꞌiyik te ya xꞌalot te skꞌuxul yoꞌtan Dios, y la anaꞌikix te batsꞌi jich te skꞌuxul yoꞌtane.

⁷ Jaꞌ to jaꞌ la yaꞌbeyex anopik te kermanotik Epafras, jaꞌ te machꞌa aꞌtejemon soke, te jun yoꞌtan yakꞌoj sba ta abatinel ta skuenta Cristo ta akuentaike.

⁸ Jaꞌ a yalbotikix te tutꞌil ayex, sok la yal te ay skꞌuxul awoꞌtanik ta skuenta te Espiritue.

⁹ Ja yuꞌun te joꞌotike, jaꞌ to kꞌalal la kaꞌiytik te akꞌoplale, maꞌyuk ya jkom jbajtik ta skꞌoponel Dios ta akuentaik. Ya jkꞌanbeytik Dios te ya yaꞌbeyex anaꞌik te tut ya skꞌan yoꞌtane, sok te ya yaꞌbeyex spisil ta jkaj pꞌijilil y ta snaꞌel te tut skuenta te Espiritue.

¹⁰ Jich ya xjuꞌ awuꞌunik te toj ya xꞌanex jich tutꞌil ya skꞌan spasik te machꞌatik yuꞌun te Kajwaltike, sok jich ya xjuꞌ awuꞌunik spasel ta sil tiempo te tut lek ya yil stukele. Jich me ya apasik spisil ta skajal skaj te lekil aꞌtele, y jich me ya anaꞌbeyik sba ta lek a te Diose.

¹¹ Ya jkꞌanbetik stukel te jaꞌ ya yaꞌbeyex apuersaike ta skuenta te stsaꞌamul spodere. Jich ya xjuꞌ awuꞌunik te ya xkujch awuꞌunik ta spisil yuꞌun te spuersa awoꞌtanike sok yuꞌun te apasensiae.

¹² Sok jich me xꞌawalbeyik kola yal sok sbujts awoꞌtanik te Jtatik Diose, te jaꞌ xchapojex yuꞌun ya awichꞌik te ba sakil kꞌinal te majtanil te stukel ya yaꞌbe te machꞌatik jtejklumix yuꞌune.

¹³ Dios la yakꞌotik ta libre yuꞌun te spuersa te ijkꞌal kꞌinale. Y la yikꞌotik bael te ba ay ta ajwalil te Xnichꞌan te ben kꞌux ta yoꞌtane,

¹⁴ te jaꞌ a skoltayotik y la yaꞌbotik perdon yuꞌun te jmultike.

Te butsꞌan kꞌinal yuꞌun Dios ta skuenta Cristo

¹⁵ Te Cristoe jaꞌ pajal sok ta ilel te Diose te ma xtailub ta ilele. Jaꞌ nail yuꞌun spisil te tutik aye.

¹⁶ Ta skuenta stukel, Dios a spas spisil te tutik ay ta chꞌulchane y sok te ay ta balmilale, te tutik chikan ta ilele, sok te tut ma chikanuk ta ilele, jich tutꞌil te tut kuxajtik te ma chikanuk ta ilel te ya xmantalaj sok te ay yaꞌtel sok te ay spoder. Spisil la yichꞌ pasel ta skuenta te Xnichꞌane sok spisil ay ta skuenta stukel.

¹⁷ Te Cristoe nail ay yuꞌun spisil te tutik aye, y sok ja skuentainej ta spisil.

¹⁸ Y sok xan te Cristoe jaꞌ jolol yuꞌun spisil te machꞌatik xchꞌuunejikixe. Stukel ay ta slijkibal, y stukel primero a chaꞌkux tal te ba ay te animaetike. Jich yuꞌun jaꞌ mukꞌ ay stukel yuꞌun spisil tutik aye.

¹⁹ Te Cristoe tsꞌakal yichꞌojbey te slekilal te Tatile, yuꞌun jich la skꞌan yoꞌtan te Diose.

²⁰ Y ta skuenta Cristo jich la skꞌan ya yakꞌ bujtsꞌan kꞌinal ta spisil te tutik aye, spisil te tutik ay ta balmilal sok te tutik ay ta chꞌulchane. La yakꞌ bujtsꞌan kꞌinal ta skuenta te xchꞌichꞌel Cristo te la smal ta kruse.

²¹ Te jaꞌexe jyanlumex ta nail to, sok akontrainejik ta awoꞌtanik te Diose yuꞌun te tutik ma lekuk la apasike.

²² Pero te ora to Dios la yakꞌ te ya xjunaj awoꞌtanik soke ta skuenta Cristo, jaꞌ te tutꞌil kꞌax swokol ta milel sok te stiꞌbalule. Jich a spas, yuꞌun jich me ya ataik tutꞌil lek ya xkꞌoex ta skuentae, te chꞌultesbilex, sok te maꞌyuk awijkꞌalik ta skuenta, sok te maꞌyuk amulike.

²³ Pero yuꞌun te jich aye ya skꞌan te jmel nax jun awoꞌtanik sok te xchꞌuunel awoꞌtanike. Ma me xtal xbajtukex ta smaliyel te tut ya awichꞌik yuꞌun te skꞌoplal kolel te la awaꞌiyike. Jaꞌ to jaꞌ skꞌoplal te la yichꞌix alel ta bayuk nax ta balmilale, jaꞌ te ay kaꞌtel ta yalel ekꞌae, joꞌon te jPabloone.

Te jPabloe yichꞌoj yaꞌtel ta skuenta te hermanoetike

²⁴ Te ora to ben jun koꞌtan te ayon ta wokol ta akajike. Porke te tutꞌil jich aye jaꞌ ya jtsꞌakutes ta jtiꞌbalul te tutik xan ya skꞌan xkꞌax swokol te Cristoe, yuꞌun te machꞌatik xchꞌuunejikixe, te jich kꞌoemik tutꞌil te stiꞌbalule.

²⁵ Te Diose la yakꞌonix ta abatinel yuꞌun te hermanoetike, te jaꞌ a yaꞌbon ta jkuenta yuꞌun jaꞌex alekilik a, yuꞌun jich tsꞌakal ya kalbey a te skꞌoplal kolele,

²⁶ jaꞌ te mukul nax ay te namey tal ta skajal skaj te genteetike. Pero te ora to la yakꞌix ta naꞌel ta stojol te machꞌatik yuꞌunixe.

²⁷ Te Diose jaꞌ la yaꞌbotik jnaꞌtik te tutꞌil mukul nax ay yuꞌune, jaꞌ te kꞌop te bayal slekil ta aꞌiyel yuꞌun spisil te machꞌatik maꞌ juriyouke. Jaꞌ te tutꞌil ya xꞌanin ta awoꞌtanik te Cristoe, te jaꞌ ya amaliyik te slekil te ya xba awichꞌike.

²⁸ Te joꞌotike ya kalbetik skꞌoplal te Cristoe, ya jtsitstik y ya jnojpestik ta spisilik ta spꞌejel pꞌijilil, yuꞌun jich me tojobenikix ya xlaj kꞌot ta skuenta a te Cristoe.

²⁹ Jaꞌ yuꞌun te yipalon ta aꞌtel sok spisil te jpuersa ya yaꞌbon te Cristoe.