Apocalipsis 9 - Nuevo Testamento Tzeltal de Amatenango

¹ Te yoꞌebal ángel la yokꞌesin te skornetae, y la kil jun ekꞌ te chꞌay tal koel ta chꞌulchan jul ta balmilal. Te ekꞌe aꞌbot te syaweul te chꞌen te lom toyole.

² La sjeꞌ te chꞌen te lom toyole, y moj tal xchꞌailel te chꞌene, jachik tutꞌil jun mukꞌul jorna. Y te xchꞌailel te chꞌene la yijkꞌutes te kꞌajkꞌale y te ikꞌe.

³ Teꞌ ba chꞌaile, lokꞌ tal kꞌulubetik, sok wilik bael ta balmilale. Y akꞌtalanbot spoderik ta tiꞌaw, jachik tutꞌil te ay yuꞌun te tseketike.

⁴ Altalanbot mantal te makꞌ ya yixtalan te wamal te ay ta balmilal, ni junuk te tutik yaxe, ni jwoluk teꞌ, sinoke jaꞌ nax te machꞌatik ma yichꞌojikuk te seyo yuꞌun Dios ta stiꞌ sbaike.

⁵ Pero ma akꞌtalanbot smilik te gentee, sino ke jaꞌ nax ya xꞌakꞌtalanbot tulan swokolik joꞌeb u. Y te xkꞌuxul te stiꞌawe jaꞌ pajal sok te stiꞌaw tseke.

⁶ Te jayeb kꞌaal abi te gentee ya me skꞌan slajelik y ma staik. Yoꞌtanikuk ya skꞌan xchamik, y te lajele ya xjakalej bael ta stojolik.

⁷ Te kꞌulubetike pajal sok te kawuetik te chapal yuꞌun guerra. Teꞌ ta sjolike yichꞌojlan te jich yilel tutꞌil jun korona te pasbil ta oroe. Y te yelawe jaꞌ pajal sok yelaw gente.

⁸ Te stsotsil sjole jachik tutꞌil stsotsil sjol ants, y te yeike pajal sok ye choj.

⁹ Te stiꞌbalulike maktalanbil ta pasbil takꞌin. Xpumumet nax te yokꞌel xikꞌike, jachik tutꞌil bayal karretaetik te nitbil ta kawuetik te kꞌalal ya xbajt ta guerrae.

¹⁰ Te sneike, chapal te ya xtiꞌawan, pajal sok te tseke. Aꞌbot ta skuenta te sneike te ya yilbajinlan joꞌeb u te genteetike.

¹¹ Te statal yuꞌun te kꞌulubetike, ja te ángel yuꞌun te chꞌen te lom toyole. Te sbiil ta hebreo-kꞌope: Abadon, y ta griego-kꞌope: Apolion.

¹² Kꞌaxix te primero tulan wokole; pero ay to xan cheb.

¹³ Te swakebal ángele la yokꞌesin te skornetae, y la kaꞌiy jun kꞌop te lokꞌ tal ba ay yolil chaneb xulbaletik te ba ay altar te pasbil ta oro te ay ta stojol Diose.

¹⁴ Y te kꞌope la yalbe te swaktulul ángel te yichꞌoj kornetae: “Kolesa te chantul angeletike te teꞌ chukajtik te ba ay te mukꞌul ukꞌum Eufratese”, xchi.

¹⁵ Jicha koleslanot tal te chantul angeletike, yuꞌun ya smiltalan xejtꞌ ta yoxxejtꞌel te gentee. Yuꞌun jich chaptalanbil te puersa ya sta yorail skꞌaalel, yuil y yaꞌbilal te jich ya xkꞌot ta pasele.

¹⁶ Y la jta ta aꞌiyel te jaytul te soltaroetik te kajajtik ta kawue. Ay dosientos millones ta jtul.

¹⁷ Jich yilel te kawuetik sok te machꞌatik moemik aye te la yaꞌbelon kile: Te machꞌatik moemik aye smakojik te stiꞌ yoꞌtane ta jun smajkil te pajal sok yilel te kꞌajkꞌe: asultik sba sok kꞌankꞌantik sba. Te sjol te kawuetike jachik tutꞌil sjol choj, y ta stiꞌ ya xlokꞌ kꞌajkꞌ a sok chꞌail y sok asufre.

¹⁸ Ta yoxxejtꞌelal te gente xejtꞌ a laj yuꞌun te oxkaj wokoletik to, jaꞌ te kꞌajk, chꞌail sok asufre te ya xlok ta stiꞌ te kawuetike.

¹⁹ Porke te spoder te kaewuetike ay ta stiꞌik y ta sneik. Yuꞌun te sneike pajal sok chan yilel, y sok te sjolike ya xꞌilbajinwan.

²⁰ Pero te jayeb xan sobra te gente, te machꞌatik maꞌ chamik yuꞌun te wokoletik to, ni maꞌ sujtes yoꞌtanik yuꞌun te tut ma lekuk spasojik ta skꞌabike. Ni maꞌ yijkitayik yichꞌel ta mukꞌ te pukujetike y sok te lotil diosetik te pasbil ta oro sok ta plata sok ta bronse sok ta ton sok ta teꞌ, te ma xjuꞌ ya yilik kꞌinal ni ma xyaꞌi kꞌop ni ma spas xbeen.

²¹ Y ni maꞌ yijkitayik te milawe, ni te spasel akꞌ-chamele, ni te antsiwejele, ni te elekꞌe.