Apocalipsis 8 - Nuevo Testamento Tzeltal de Amatenango

Te sjukebal seyo y sok te xchijkꞌil pom te pasbil ta oroe

¹ Te kꞌalal la xchꞌiꞌ te sjukebal seyo te Chꞌin Karnerae, chꞌabaj kꞌinal olil ora ta chꞌulchan.

² Teꞌ nax a la kil jukeb angeletik te tekꞌajtik ta sit te Diose. Akꞌtalanbot jukeb kornetaetik.

³ Patil tal jtul xan ángel, yichꞌoj tal xchijkꞌil pom pasbil ta oro, y la stejkꞌan sba ta stsꞌeel te altare. Aꞌbot bayal pom, yuꞌun ya xchikꞌ te ba ay te altar te pasbil ta oroe, te ay ta sit te mukꞌul naktajibale. Jun nax smajtan Dios a kꞌot sok skꞌopik ta spisil te machꞌatik yuꞌunik te Diose.

⁴ Te xchꞌailel pome mo bael ta skꞌab te ángel ta sit te Diose. Pajal mo bael sok skꞌopik te machꞌatik yuꞌunik te Diose.

⁵ Jich te ángele la yichꞌ te xchijkꞌil pome, la snojes ta yakꞌalel skꞌajkꞌal te ba altare, y la sbuskꞌin koel ta lum. Y ay tutꞌi chiknaj a xpumet bael, xixixet, y sansewal y jikichab.

Te kornetaetike

⁶ Te jukeb angeletik te yichꞌojik te jukeb kornetaetike la xchap sbaik yuꞌun ya yokꞌesinik.

⁷ Te primero ángel la yokꞌesin te skornetae, y chꞌojtalanot koel ta sba balmilal bat y kꞌajkꞌ kapal sok chꞌich. La xchikꞌ xejtꞌ ta yoxxejtꞌelal te teꞌtikile y spisil te yaxal wamaletike.

⁸ Te xchebal ángel la yokꞌesin te skornetae. Chꞌojot koel ta mar te jachik yilel tutꞌil jun mukꞌul wits te xlaplun ta tilele. Xejtꞌ ta yoxxejtꞌelal te mare kꞌajta ta chꞌichꞌ.

⁹ Cham xejtꞌ ta yoxxejtꞌelal ta spisil te tut kuxajtik te ba mare, y jim ta yoxxejtꞌelal te ba ay te barkoetike.

¹⁰ Te yoxebal ángel la yokꞌesin te skornetae, y ay jun mukꞌul ekꞌ, yipal ta tilel jachik tutꞌil jtuch-kꞌajkꞌ, tꞌuxaj tal koel ta chꞌulchan ta sba te yoxxejtꞌel te mukꞌul ukꞌumetike y ta sba te lokꞌib jaꞌetike.

¹¹ Te sbiil te ekꞌe: “Chꞌa”, y ta yoxxejtꞌelal te ba ay jaꞌetike chꞌa a la sujt. Y ta skaj te chꞌaub te jaꞌetik, bayal gente a cham.

¹² Te xchanebal ángel la yokꞌesin te skornetae. La yixlan xejtꞌ ta yoxxejtꞌel te kajkꞌale, y xejtꞌ ta yoxxejtꞌel te ue, y xejtꞌ ta yoxxejtꞌel te ekꞌetike. Yuꞌun jicha laj ijkꞌub xejtꞌ ta yoxxejtꞌelalik, y maꞌ sakub kꞌinal xejtꞌ ta yoxxejtꞌelal te jun kꞌaale ni ta ajkꞌubal.

¹³ Teꞌ nax a la kil, y la kaꞌiy tulan yipal ta kꞌop jkojt aguila te yipal ta wilel ta yolil chꞌuchan. Jich a yal: “¡Ay! ¡Ay! Oꞌol me sbaik te machꞌatik aylan ta balmilale te kꞌalal ya xꞌokꞌ te kornetaetik te ya xba yokꞌesinik te oxtul xan angeletike”, xchi.