Apocalipsis 7 - Nuevo Testamento Tzeltal de Amatenango

Akꞌtalanbot smarkaik te stsꞌumbal Israele

¹ Ta patil la kil chantul angeletik te tekꞌajtik te ba ay xchanmejchelul te balmilale. Skomojik te xchanmejchel ikꞌ yuꞌun makꞌ ya yikꞌay te sba te balmilale, ni ta sba te mare, ni ta sba jwoluk teꞌ.

² Jich a kil xan yan ángel te yipal ta talel te ba stojil xlokꞌ tal kꞌajkꞌale. Yichꞌoj te seyo yuꞌun te kuxul Diose. Te ángel to tulan a awun ta kꞌop ta stojol te yan chantul xan te yichꞌoj spoder yuꞌun te ya yixlan te balmilale y te mare.

³ Jich a yal: “Ma to awixlanik te balmilale ni te mare ni te teꞌetike, jaꞌ to teme la kaꞌbetik smarkaik ta stiꞌsbaik te machꞌatik jꞌaꞌteletik yuꞌun te Dios kuꞌuntike”, xchi.

⁴ Y la kaꞌiy te jaytul te machꞌatik jich a akꞌtalanbot smarkaike: siento kuarenta y kuatro mil ta jtul ta spisil te jaytijk israeletike.

⁵ La yichꞌ smarkaik te dose mil ta jtul te stsꞌumbal Judae, dose mil ta jtul te stsꞌumbal jRubene, dose mil ta jtul te stsꞌumbal jGade,

⁶ dose mil ta jtul te stsꞌumbal jꞌAsere, dose mil ta jtul te stsꞌumbal jNeftalie, dose mil ta jtul te stsꞌumbal jManasese,

⁷ dose mil ta jtul te stsꞌumbal Simeone, dose mil ta jtul te stsꞌumbal jLevie, dose mil ta jtul te stsꞌumbal jꞌIsacare,

⁸ dose mil ta jtul te stsꞌumbal Zabulone, dose mil ta jtul te stsꞌumbal Josee, y dose mil ta jtul te stsꞌumbal jBenjamine.

Bayal te machꞌatik sak skꞌuꞌ-spakꞌike

⁹ Ta patil la kil bayal genteetik yuꞌun te nasionetik te skajalskaj stsꞌumbale, sok yanetik tutꞌ xkꞌopojik, y sok yanetik slumalik. Tekꞌajtik ta sit te ba ay te mukꞌul naktajibale y ta sit te Chꞌin Karnerae. Lom bayalik, te maꞌyuk machꞌa ya xjuꞌ yuꞌun yajtayele. Sak skꞌuꞌ-spakꞌ yichꞌojik y yichꞌojik bael yaꞌnimal xan ta skꞌabik.

¹⁰ Spisilik xꞌawlajan ta tulan kꞌop. Jich la yalik: “¡Ay jkoleltik ta skuenta te Dios kuꞌuntike te nakal ta smukꞌul naktajibe y sok ta skuenta te Chꞌin Karnerae!” xchiik.

¹¹ Y spisil te angeletike te tekꞌajtik ta sjoylejal te ba ay te mukꞌul naktajibale, sok te machꞌatik lom mamalikixe, y sok te chaneb tutik kuxajtike, la skejan sbaik asta la sta lum te stiꞌsbae ta sit Dios te ba ay te mukꞌul naktajibale, asta la sta lum te stiꞌsbae y la yichꞌik ta mukꞌ te Dios.

¹² La yalik: “Jichuk. A me yichꞌ alel te slekilale. Ay te stsaꞌamule, sok ay te spꞌijile. Ya me yichꞌ alel kola yal ta stojol. Ay ta akꞌel ta jkuentae, ay spoder, sok ay spuersa te Dios kuꞌuntike skuenta sbajtel kꞌinal. Jichuk”, xchiik.

¹³ Ay jtul te machꞌatik lom mamalikixe la sjojkꞌobon: —¿Machꞌatik a to te sak skꞌuꞌ-spakꞌike, sok ba talemik? —xchi.

¹⁴ La kalbe: —Jaꞌat anaꞌoj, kajwal —xkut. Y jich a yalbon: —Jaꞌlan to te machꞌatik te kꞌaxemik tal ta tulan wokole. Jaꞌlan te machꞌatik sakꞌojik te skꞌuꞌ-spakꞌike y jaꞌ sakutesojik a te xchꞌichꞌel te Chꞌin Karnerae.

¹⁵ Jaꞌ yuꞌun te aylan ta sit te ba ay smukꞌul snaktajib te Diose, y kꞌajkꞌal ajkꞌubal yakꞌoj sbaik ta abatinel te ba stemploe. Ya me yichꞌ kanantayel yuꞌun te Machꞌa nakal te ba mukꞌul naktajibale.

¹⁶ Makꞌ xkꞌaxix swokolik ta wiꞌnal ni ta takin-tiꞌil. Ni makꞌ ya yaꞌiyikix xkꞌuxul kꞌajkꞌal, ni makꞌ ya xwokolajik yuꞌun te xkꞌixnale.

¹⁷ Porke te Chꞌin Karnerae, te teꞌey ba yolil te mukꞌul naktajibale, ya skanantaylan jachik tutꞌil ya yichꞌ kanantayel te karneraetike. Y ya yikꞌtalan bael te ba lokꞌi-jaꞌ yuꞌun te kuxlejale. Y Dios ya skustalanbot yuꞌun spisil te yaꞌlel sitike —xchi.