Apocalipsis 6 - Nuevo Testamento Tzeltal de Amatenango

Te jukeb seyoetike

¹ Te nax a la kil te kꞌalal te Chꞌin Karnerae la xchꞌiꞌ te primero ta sjukebal te seyoetike, y la kaꞌiy te jtul te ta xchanebal te tut kaxajtik tulan la yal ta kꞌop te pajal sok te ay tut ya xtꞌome: —Laꞌ —xchi.

² La kil, y la jta ta ilel jkojt sakil kawu, y te machꞌa moem aye yichꞌoj ta skꞌab jun tꞌim. Sok aꞌbot jun skorona. Yaꞌiyojix tsalaw y lokꞌ bael yuꞌun ba tsalawanuk xan.

³ Te kꞌalal la xchꞌiꞌ te xchebal seyo te Chꞌin Karnerae, la kaꞌibe skꞌop ta xchebal te tut kuxajtike: —Laꞌ —xchi.

⁴ Y lok tal yan xan kawu. Te skolorile tsaj, y te machꞌa moem aye la yichꞌ spoder yuꞌun ba spoj tal te bujtsꞌan kꞌinal ta balmilale y yuꞌun jich ya spas te genteetik te talel bael ya smil sbaike. Sok aꞌbot jun mukꞌul puñal.

⁵ Te kꞌalal la xchꞌiꞌ te yoxebal sello te Chꞌin Carnerae, la kaꞌiybe skꞌop te yoxebal te tut kuxajtike: —Laꞌ —xchi. La kil, y la jta ta ilel jkojt xan ijkꞌal kawu, y te machꞌa moem aye yichꞌoj ta skꞌab jun libra-teꞌ te ay tut ya xlikot aye.

⁶ Y te ba yolil ta xchanebal te tut kuxajtike la kaꞌiy jun kꞌop te la yale: “Jaꞌ nax jun kilo triwu te stojol te jun kꞌaal aꞌtele, y oxeb kilo sebada te stojol jun kꞌaal aꞌtele. Pero ma me awakꞌ chꞌayuk te aseite ni te binoe”, xchi.

⁷ Te kꞌalal la xchꞌiꞌ te xchanebal seyo te Chꞌin Karnerae, la kaꞌiybe skꞌop ta xchanebal te tut kuxajtike: —Laꞌ —xchi.

⁸ La kil y la jta ta ilel jkojt kawu yax-yaxtik ta ilel y te machꞌa moem aye, “Lajel” xchi te sbiile. Tsꞌakal tal ta spat te machꞌa skuentainej te yawil te animaetike. Y aꞌbot spoder ta xejtꞌuk te xchanxejtꞌel te balmilale, yuꞌun ya smil ta guerra, ta wiꞌnal, ta chamel, y sok ta tiꞌel ta chanbalametik te aylan ta balmilale.

⁹ Te kꞌalal la xchꞌiꞌ te sjoꞌebal seyoe te Chꞌin Karnerae, la kil te ba yeꞌtal altare te machꞌatik yichꞌojik milel ta skaj te la yalik te skꞌop Diose.

¹⁰ Tulan ya yalik: “Chꞌul Kajwaltik, y te ben jun awoꞌtane, ¿tut to ora ya awichꞌ jkuenta te machꞌatik ay ta balmilal te la smilotike, y te ya awaꞌbe stoje?” xchiik.

¹¹ Jicha akꞌtalanbot sakil skꞌuꞌ-spakꞌik, y altalanbot te ya to xkux yoꞌtanik jun chebuk xanix kꞌaal, jaꞌ to teme tsꞌakay te jaytul xan yermanotak te ayik ta abatinel yuꞌun te Cristoe te puersa jich ya xlajik jachik tutꞌil lajik stukelike.

¹² Te kꞌalal la xchꞌiꞌ te swakebal seyo te Chꞌin Karnerae, la kil tal jun tulan jikichab. Te kꞌajkꞌale ijkꞌ a sujt jachik tutꞌil kꞌuꞌul-pakꞌal te skuenta ajtal-oꞌtane; te ue spisil tsaj a sujt jachik tutꞌil chꞌichꞌ;

¹³ sok te ekꞌetike chꞌay tal koel ta chꞌulchan jul ta balmilal, jachik tutꞌil ya xtꞌuxaj koel yaxal ikux ta steꞌel te kꞌalal ya xnikot ta tulan ikꞌe.

¹⁴ Te chꞌulchane chꞌay bael jachik tutꞌil ya xbalot te june. Y spisil te witstikile y sok te chꞌinik luwar te joybil ta jaꞌe, jeltalanbot sluwar.

¹⁵ Te machꞌa tulan yaꞌtelik ta balmilale la snakꞌ sbaik ta chꞌentikil y ta latsꞌ-tontikil ta witstikil, jun nax sok te machꞌatik mukꞌ ayike, sok te statal soltaroetike, sok te jkꞌulejetike, sok te machꞌatik beno spuersaike, y spisil te machꞌatik ayik ta mosoile, y sok te genteetik te libre aye.

¹⁶ Y ya yalbeyik te witstikil y sok te latsꞌ-tontikile: “Tꞌuxajanik tal ta jbajtik y nakꞌaotik ta sit te machꞌa nakal ta mukꞌul naktajibale y sok te kastigo ya yakꞌ te Chꞌin Karnerae.

¹⁷ Porke la staix skꞌaalel te tulan kastigoe, ¿y machꞌa kꞌan juꞌuk yuꞌun? xchiik.