Apocalipsis 5 - Nuevo Testamento Tzeltal de Amatenango

Te balbil jun tsꞌibabile y te chꞌin Carnerae

¹ La kil yichꞌoj balbil jun ta sbatsꞌil kꞌab te Machꞌa nakal ta mukul naktajibale. Tsꞌibabil ta yutil y ta spat y tsꞌusbil ta jukeb seyoetik.

² Y la kil jtul ángel lom bayal spoder, tulan yipal ta sjokꞌoyel: “¿Machꞌa ya xuꞌ yuꞌun sjamel te balbil june, y ya xchꞌiꞌ te seyoetik yichꞌoje?” xchi.

³ Pero ni ta chꞌulchan ni ta balmilal ni ta yeꞌtal balmilal, ni jtuluk ya xjuꞌ ya sjam te balbil june sok ni jtuluk ya xjuꞌ ya yil.

⁴ Y te joꞌone ben xꞌokꞌon yuꞌun, porke maꞌyuk machꞌa wejt te ya xjuꞌ yuꞌun sjamel te balbil june, ni te ya xjuꞌ ya yile.

⁵ Pero ay jtul te lom mamalikixe la yalbon: —Ma okꞌan ta mas. Yuꞌun te mukꞌul choj te stsꞌumbal Juda, te jaꞌ mismo stsꞌumbal te rey Davide, juꞌix yuꞌun tsalaw. Y ya xjuꞌ yuꞌun te ya sjam te balbil june, sok ya xjuꞌ ya xchꞌiꞌ te jukeb seyoetike”, xchi.

⁶ Y la kil jkojt Chꞌin Karnera teꞌ ta yolil te mukꞌul naktajibale, y te chaneb te tutik kuxajtike, y ta yolil te machꞌatik lom mamalikixe. Teꞌ kotol a, aunke milbil yilel. Ay jukeb xulbal y jukeb sit. Jaꞌ te jukeb Espirituetik yuꞌun Dios te tikonlanbil ta spisil balmilale.

⁷ Te chꞌin Carnerae ba stsak te balbil jun te ay ta sbatsꞌil kꞌab te Machꞌa nakal te ba ay te mukꞌul naktajibale.

⁸ Te kꞌalal la yichꞌ te balbil june, te chaneb te tutik kuxajtike y sok te beintikuatro ta jtul te lom mamalikixe la skejan sbaik ta sit te Chꞌin Karnerae. Te spisilik ay yarpaik, y yichꞌojik sbasoik pasbil ta oro nojel ta pom, te jaꞌ skꞌopik ta skꞌoponel Dios te machꞌatik yuꞌunik te Diose.

⁹ Y la skꞌayojinik te achꞌ kꞌayoj to: “Jaꞌat atukel te ya xjuꞌ awuꞌun yichꞌel te balbil june y ta xchꞌiꞌel te seyoetik yichꞌoje. Yuꞌun la awichꞌ milel, y la amal achꞌichꞌel yuꞌun la aman ta stojol Dios genteetik ta spisil ta jkaj stsꞌumbal, te skajal skaj skꞌop sok jtejklum sok nasion.

¹⁰ Y la awaꞌbeyik yaꞌtelik ta ajwalil sok ta saserdoteil yuꞌun te Dios kuꞌuntike. Y ya me xmantalajik ta balmilal”, xchiik ta kꞌayoj.

¹¹ Teꞌ nax a la kil, y la kaꞌibe skꞌop bayal angeletik te sjoyojik te mukꞌul naktajibale sok te tutik kuxajtike y sok te machꞌatik lom mamalikixe. Ay millones y ta millones te ma xlaj ta ajtayel.

¹² Lom tulan yipalik ta yalel: “Te Chꞌin Karnera te la yichꞌ milele, stukel ya xjuꞌ ya yichꞌ te poder, te skꞌulejal, te spꞌijil, te spuersa, te akꞌel ta jkuenta, te slekilal, y te albeyel slekilale”, xchiik ta aw.

¹³ Y jich a kaꞌiybe skꞌop ta spisil te tutik pasbil yuꞌun Dios ta chꞌulchane sok ta balmilale sok ta yeꞌtal te balmilale sok ta mar. Jich la yalik: “Te Machꞌa nakal ta mukꞌul naktajibale y sok te Chꞌin Karnerae, a me yichꞌ albeyel te slekilal, te akꞌel ta jkuenta, te stsaꞌamul, y te spoder ta sbajtel kꞌinale”, xchiik.

¹⁴ Te chaneb te tutik kuxajtike ya sjakꞌik: “Jichuk”, xchiik. Y te beintikuatro ta jtul te lom mamalikixe la skejan sbaik y la yichꞌik ta mukꞌ.