Apocalipsis 4 - Nuevo Testamento Tzeltal de Amatenango

Te tutꞌil ay ta ichꞌel ta mukꞌ te Dios ta chꞌulchane

¹ Ta patil tsꞌin to la kil y la jta ta ilel jun tiꞌ puerta jeꞌel ta chꞌulchan, y te kꞌop te la kaꞌiy ta primeroe, te pajal sok te jtujtel yokꞌel kornetae, la yalbon: —Liꞌ xmoat tal to, y ya kakꞌ awil te tutik te puersa ya xkꞌot ta pasel ta patil baele —xchi.

² Mismo tiempo a la sjapuyon ta spoder te Espiritue, y la kil mukꞌul naktajibal te chapbil ta chꞌulchane y ay Machꞌa te nakal a te ba ay te mukꞌul naktajibale.

³ Te Machꞌa nakal te ba ay te mukꞌul nakꞌtajibale sakleman nax sok tsajoꞌan nax jich tutꞌil lekil tonetik te jaspe o cornalina sbiile. Y ta sjoylejal te mukꞌul naktajibale ay jun xojob te xlemet jachik tutꞌil esmeralda tone.

⁴ Ta sjoylejal te mukꞌul naktajibale la kil beintikuatro naktajibaletik te jaꞌ nakajtik a te beintikuatro ta tul te mamalikixe. Sak te skꞌuꞌ-spakꞌ slapojike y yichꞌojik jun korona pasbil ta oro ta sjol.

⁵ Te ba mukꞌul naktajibale ya xlokꞌ tal sansewal sok xixixet sok ya xtꞌom. Y ta yelaw te mukꞌul naktajibale yipal ta tilel jukchꞌix kꞌajkꞌ te jaꞌ te jukeb Espirituetik yuꞌun te Diose.

⁶ Ta yelaw te mukꞌul naktajibale ay tut ay teꞌa te pajal sok te jun mare te xlemet nax jich tutꞌil te espejoe. Ta yolil te ba ay te mukꞌul naktajibale y ta sjoylejal ay chaneb tut kuxajtik a skojtol ay sit ta yelaw y ta spat.

⁷ Te primero te tut kuxule pajal sok jkojt choj, te xchebale pajal sok jtojt toro, te yoxebale pajal sok yelaw gente, y te xchanebale pajal sok jkojt xik te yipal ta wilele.

⁸ Ta jujun to xchanebal te tut kuxule aylan wakeb xikꞌ, y ta yutil y ta spat te xikꞌe aylan sit. Ni ta kꞌajkꞌaltik ni ta ajkꞌubal ma xkomik ta yalel: “Chꞌul Dios, Chꞌul Dios, Chꞌul Dios, Dios te spisil ya xjuꞌ yuꞌune, te stalel ay ta namey, sok te ora to, sok ta sbajtel kꞌinal”, xchiik.

⁹ Te tut kuxajtik ya yalbeyik slekil te Machꞌa nakal ta mukꞌul naktajibal te stalel kuxul sbajtel kꞌinale, sok ya yakꞌik ta jkuenta, y ya yalbeyik kola yal.

¹⁰ Ta jujumel te beintikuatro ta jtul te mamalikixe ya skejan sbaik ta sit stukel, y ya yichꞌik ta mukꞌ. Ya spꞌejkan te skoronaik ta sit te ba ay te mukꞌul naktajibale, sok ya yalik:

¹¹ “Te jaꞌate Kajwaltikat, sok Diosat kuꞌuntik te ya skꞌan alel te alekilale, y te ya yakꞌelat ta jkuenta, y te ay apodere. Porke jaꞌat la apas spisil te tutik aye, yuꞌun jich a skꞌan awoꞌtan te aylan y te yichꞌoj pasele”, xchiik.