Apocalipsis 3 - Nuevo Testamento Tzeltal de Amatenango

Te skꞌop Dios ta stojol te jtijkꞌ hermanoetik ta Sardis

¹ Sok la yalbon: —Jich me xꞌatsꞌibabe xan ta sjun te ángel te ba ay te jtijkꞌ hermanoetik te aylan ta Sardise: “Ja to jich ya yal te Machꞌa yichꞌoj jukeb Espirituetik yuꞌun Dios y sok te jukeb ekꞌetike. “Kiloj spisil te tut ya apase, y kiloj te chamenate aunke ya to yalbelat te kuxulate.

² Kuxa awoꞌtan y aꞌbe xan spuersa te tutik kuxul to awuꞌune te jmel ya xlajixe. Yuꞌun kiloj te tut ya apase ma tojuk ta sit te Dios kuꞌune.

³ Naꞌa me te pꞌijutesel la awichꞌe y te la awaꞌiye. Jaꞌ me xꞌapas, y sujtesa awoꞌtan ta stojol Dios. Teme ma la akux awoꞌtane, ya xtalon ta atojol jachik tutꞌil jꞌelekꞌ te kꞌalal ma yipalukat ta smaliyele.

⁴ “Pero te ba Sardise ay to awuꞌun jtul chebuk te maꞌyuk yijkꞌutesej te skꞌuꞌ-spakꞌe. Te stukelike ya me sjoinikon ta beel sok sak te skꞌuꞌ-spakꞌike. Porke aꞌbil ta jkuenta stukelik.

⁵ Te machꞌaik ya xjuꞌ yuꞌunik tsalawe jich me sak te skꞌuꞌ spakꞌ te ya xꞌaꞌbote. Y makꞌ me ya jtupꞌbey te sbiilik te ba ay ta jun yuꞌun te kuxlejale. Sino ke ya kaltalan ta jamal ta stojol te Jtate y ta stojol te angeletik yuꞌune.

⁶ “Te machꞌa ay chikine, a me yaꞌiy te tut ya yal te Espíritu ta stojol te juju-tijkꞌ hermanoetike”, uta me —xchi.

Te skꞌop Dios ta stojol te jtijkꞌ hermanoetik ta Laodicea

⁷ Sok la yalbon: —Jich me xꞌatsꞌibabe xan ta sjun te ángel te ba ay te juju-tijkꞌ hermanoetik ta Filadelfiae: “Jaꞌ to jich ya yal te Machꞌa tojix aye y te batsꞌi jiche, jaꞌ te Machꞌa yichꞌoj syawe te rey Davide, te stukele te kꞌalal ya sjeꞌe maꞌyuk machꞌa ya xjuꞌ ya stsꞌus, te kꞌalal ya stsꞌuse maꞌyuk machꞌa ya xjuꞌ yuꞌun sjeꞌel.

⁸ “Kiloj spisil te tut ya apase. Ila awil, kakꞌoj ta atojol jun puerta te jeꞌele, te maꞌyuk machꞌa ya xjuꞌ ya stsꞌuse. Y aunke maꞌyuk lek apuersa, awakꞌoj ta jkuenta te jkꞌope y maꞌ mukojukon ta awoꞌtan.

⁹ Joꞌon me ya kakꞌ te ya xtal skejan sbaik ta atojol te machꞌatik jtsobaw yuꞌun te pukuje, jaꞌik te jloꞌlawanejetike te ya yalik te juriyoetiklane y ma jaꞌikuk. Yuꞌun jich me ya snaꞌik a te kꞌuxat ta koꞌtane.

¹⁰ “Apasoj kumplir te mantaliletik kuꞌune te jun awoꞌtan ya atsꞌik awokole, y jaꞌ yuꞌun joꞌon ya jkꞌejat a te tut ora ya xtal te prewa ta stojol ta spisil te balmilale, yuꞌun te ya spasot ta prewa a ta spisil te machꞌatik kuxajtik ta balmilale.

¹¹ Ya xtalon ta ora. Kꞌeja te tut ay awuꞌune, yuꞌun maꞌyuk machꞌa ya yichꞌbeyat te amajtane.

¹² “Te machꞌatik ya xjuꞌ yuꞌunik tsalawe ya me kakꞌtalan ta yiptajib te ba templo yuꞌun te Dios kuꞌune. Y ni maꞌyuk tut ora te ya xlokꞌik xan teꞌa. Y ya me jtsꞌibabey ta stojolik te sbiil te Dios kuꞌune y sok te sbiil te mukꞌul jtejklum yuꞌun te Diose kuꞌune. Jaꞌ te achꞌ Jerusalen te ya xkoj tal ta chꞌulchan ta ba ay te Dios kuꞌune. Y jich me ya jtsꞌibabey ta stojolik te yachꞌil jbiile.

¹³ “Te machꞌa ay xchikine, a me yaꞌiy te tut ya yal te Espíritu ta stojol te juju-tijkꞌ hermanoetike”, uta me —xchi.

Te skꞌop Dios ta stojol te jtijk hermanoetik ta Laodicea

¹⁴ Sok la yalbon: —Tsꞌibabeya xan ta sjun te ángel ta stojol te jtijkꞌ hermanoetik te aylan ta Laodiceae: “Jich ya yal te Machꞌa batsꞌi jiche, te stukel jun yoꞌtan ay ta testigo yuꞌun ta yalel te tut batsꞌi jiche. Jaꞌ ta skuenta te Dios la xchiknates spisil te tutik ay.

¹⁵ “Kiloj spisil te tut ya apase. Ya jnaꞌ te ni ma sikukat ni ma kꞌixinukat. Koꞌtanuk te sikukate o kꞌixinate.

¹⁶ Pero jachik ayat te siklamane y ni ma sikuk ni ma kꞌixinuk. Jaꞌ yuꞌun ya xejtayat lokꞌel ta jtiꞌ.

¹⁷ Yuꞌun te jaꞌate jich ya awal te jkꞌulejate, sok te lek ayat bael, sok te ni maꞌyuk tut palta ya awaꞌiye. Y ni makꞌ ya awaꞌiy aba tutꞌ ayat te toj oꞌol abae, sok te maꞌyuk tut ay awuꞌune, sok te ma xꞌawil kꞌinale, sok te tꞌaxalate.

¹⁸ “Jaꞌ yuꞌun ya kalbeyat te ya amanbon te oro te pasbilix tal ta kꞌajkꞌe, yuꞌun jich batsꞌi kꞌulejat a. Y sok te ya amanbon te sakil kꞌuꞌul-pakꞌal yuꞌun ya alap y ya amuk aba a te kꞌexlaltik sba te tꞌaxalate. Y sok ya amanbon te jun pox yuꞌun te ya awaꞌbey asit te ya awil kꞌinal ae.

¹⁹ “Joꞌon ya jkom y ya jtsits ta spisil te machꞌatik kꞌux ta koꞌtane. Jaꞌ yuꞌun akꞌaik me puersa y sujtesa awoꞌtan ta stojol Dios.

²⁰ Ila awil, joꞌon ayon ta kꞌop ta tiꞌ puerta. Teme ay machꞌa ya yaꞌibon te jkꞌope y ya sjeꞌ te tiꞌpuertae, ya xꞌochon ta sna y jun nax ya xweꞌon sok.

²¹ Te machꞌatik ya xjuꞌ yuꞌunik tsalawe ya kakꞌtalanbe jun luwar jun nax sok joꞌon te ba ay te jmukul naktajibe, jachik tutꞌil joꞌon te kaꞌiyojix tsalaw y joyinejix ta naklej te Jtate te ba ay smukꞌul naktajibe.

²² “Te machꞌa ay xchikine, a me yaꞌiy te tut ya yal te Espíritu ta stojol te juju-tijkꞌ hermanoetike.