Apocalipsis 22 - Nuevo Testamento Tzeltal de Amatenango

¹ Te ángele la yaꞌbon kil jun sakil ukꞌum, te jaꞌ yuꞌun kuxlajele. Ben klaro jachik tutꞌil espejo. Y teꞌ ya xlokꞌ tal ba ay te smukꞌul naktajib te Diose y sok te Chꞌin Karnerae,

² sok ya xbeen bael ta yolil te smukꞌul kayaul yuꞌun te mukꞌul jtejklume. Y ta juju-jejch te ukꞌume yipal ta chꞌiel te teꞌ yuꞌun kuxlejale, te ya yakꞌ sit ta jujun ue, jaꞌ xyal, te lajchaymel ya yakꞌ ta jaꞌbile. Y te yaꞌnimal teꞌe ya xtuun yuꞌun ya slekutes a te nasionetike.

³ Ni maꞌyukix teꞌa te tut ya xꞌakꞌot bael ta chꞌayele. Te smukꞌul naktijib te Diose y sok te chꞌin karnerae te ay ta yolil te mukꞌul jtejklume, y te jꞌaꞌteletik yuꞌune ya xꞌichꞌot ta mukꞌ yuꞌunik teꞌa.

⁴ Ta sit ya yilbeyik sit te Diose, y yichꞌojbeyik sbiil ta stiꞌsbaik.

⁵ Maꞌyukix ajkꞌubal teꞌ aye y te machꞌatik te kuxajtik aye ma puersaukix yuꞌun slusil te lamparae ni te skeaw kꞌajkꞌale. Porke jaꞌ ya yakꞌ sakil kꞌinal te Kajwaltik Diose, sok sbajtel kꞌinal ayik ta ajwalil.

Xnopetix ya xtal te Jesucristoe

⁶ Te ángele la yalbon: —Te kꞌopetik to batsꞌi jich, y ya xjuꞌ ya xchꞌuun awoꞌtan te jich ya xkꞌote. Te Kajwaltik Diose, te la skuentainbe yoꞌtan te jꞌalwanejetike, la stikon tal te ángel yuꞌune, yuꞌun ya yaꞌbe yil te yaj aꞌteletik te tut xba kꞌotuk ta pasel —xchi.

⁷ La yal te Jesuse: —Ya me xtalon ta ora. Ben tsaꞌam slekil te machꞌa ya yakꞌ ta jkuenta te skꞌoplal te tut tsꞌibabil liꞌ ba libro to —xchi.

⁸ Joꞌon Juanon la kil y la kaꞌiy te tutik to. Y ta patil te la kiltalan y te la kaꞌilane, la jkejan jba ta yok te ángele te la yaꞌbon kile yuꞌun ya kichꞌ ta muk.

⁹ Pero stukel a yalbon: —Ma me apas jich. Yuꞌun joꞌon jꞌaꞌtelon yuꞌun euk te Dios, jich mismo tutꞌ jaꞌate, y sok te awermanotak te jꞌalwanejetike, y ta spisil te machꞌatik ya yakꞌ ta jkuenta te tut tsꞌibabil liꞌ ba libro to. Jaꞌ me ya awichꞌ ta mukꞌ te Diose —xchi.

¹⁰ Sok la yalbon xan: —Ma me amuk ta awoꞌtan te skꞌoplal te tutiꞌ yalbelat te tsꞌibabil liꞌ ba libro to. Porke ya xtijilajix tal te tiempoe te ya xkꞌot ta pasele.

¹¹ Te machꞌa maꞌ tsaꞌamuk tut ya spase, a me spas bael; y te machꞌa ma lekuk yoꞌtane, sigueuk sok te ma lekuk yoꞌtane. Pero te machꞌa lek yoꞌtane, a me spas bael te tut leke; y te winik te tojutesbilix yuꞌun te Diose, sigueuk me jun yoꞌtan —xchi.

¹² Te Jesus la yal: —Jich. Ya me xtalon ta ora. Y ya kichꞌ tal te majtanil te ya kaꞌbe ta juju-tul chikan te tut spasoje.

¹³ Joꞌon te ayon ta slijkibale y sok ta slajibale. Ayon ta neelal to sok ta patil to, jich tutꞌil te A sok te Z —xchi.

¹⁴ Ben tsaꞌam slekil te machꞌatik ya sakꞌ te skꞌuꞌ-spakꞌike yuꞌun ya xkꞌot ta skuenta ekꞌa te teꞌ yuꞌun te kuxlejale. Jich me ya xjuꞌ ya xꞌoch te ba ay te puertaetik yuꞌun te mukꞌul jtejklume.

¹⁵ Pero ya me xjilik ta fuera te machꞌatik ma lekuk yoꞌtanike, sok te machꞌatik ya snopik yakꞌel pox ta skuenta pukuje, sok te machꞌatik ya sꞌantsiwejike, sok te machꞌatik ya xmilawanike, sok te machꞌatik ya yichꞌik ta mukꞌ te lotil diosetike, y spisil te machꞌatik ya skꞌupinik spasel te lote.

¹⁶ La yal xan te Jesuse: —Joꞌon Jesuson te la jtikon tal te ángel kuꞌune yuꞌun ya yal ta jamal ta spisil to ta stojol te juju-tijkꞌ hermanoetike. Joꞌon slujp kꞌoemon te stsꞌumbal te jDavide. Joꞌon te ekꞌ te ya xojobin ta ben sabe —xchi.

¹⁷ Te Chꞌul Espiritue y sok te machꞌa nujpunemix sok te Chꞌin Karnerae ya yalik: “La.” Te machꞌa ya yaꞌiye, a me yal: “La.” Y te machꞌa takin yoꞌtane, y te ya skꞌane, a me taluk y a yuchꞌ te jaꞌ yuꞌun kuxlejale ta majtanil nax.

¹⁸ Ta spisil te machꞌatik ya yaꞌiybeik te skꞌoplal te tutiꞌ tsꞌibabil liꞌ ba libro to, ya me kalbe ta jamal: Teme ay machꞌa ya yaꞌbe chꞌinuk sjoy te tutik jich ay to, Dios me ya xbayaltesbot yuꞌun te wokoletik te liꞌ tsꞌibabil liꞌ ba libro to.

¹⁹ Y teme ay machꞌa ya slokꞌes chꞌinuk te skꞌoplal albil te tsꞌibabil liꞌ ba libro to, Dios me ya slokꞌesbot yuꞌun te tut ay ta skuenta te teꞌ yuꞌun kuxuyinele y sok te chꞌul mukꞌul jtejklum te liꞌ tsꞌababil ba libro to.

²⁰ Te machꞌa yalojix ta jamal to, ya yal: —Batsꞌi jich ya me xtalon ta ora —xchi. Jichuk. Laꞌ, Kajwal Jesus.

²¹ Te Kajwaltik Jesuse a me yaꞌbeyex te slekilal ta atojolik ta apisilik te jaꞌexe. Jichuk.