Apocalipsis 21 - Nuevo Testamento Tzeltal de Amatenango

Te achꞌ chꞌulchan y te achꞌ balmilale

¹ Ta patil la kil jun achꞌ chꞌulchan y jun achꞌ balmilal. Porke te primero chꞌulchan y te primero balmilale chꞌayikix bael, y jich ekꞌa te mare.

² La kil chꞌul mukꞌul jtejklum, jaꞌ te achꞌ Jerusalene, te yipal tal ta koel ta chꞌulchan ta stojol te Diose. Lek chapal jachik tutꞌil achꞌix te ya xnujpune.

³ Y la kaꞌiy jun tulan kꞌop te teꞌ tal ba ay te mukꞌul naktajibale, te jich a yale: “Dios nainemix ta yolil te genteetike. Ayix sna ta yolilik. Y te stukelike jtejklum yuꞌun Dios ya xkꞌotik, sok mismo te Diose te ay ta yolilike, jaꞌ Dios ya xkꞌot yuꞌunik.

⁴ Ya me skustalanbot yaꞌlel sitik yuꞌun. Y ma me ayukix lajel a, ni okꞌel, ni ajtal-oꞌtan, ni tut kꞌux. Porke spisil te tut ay ta nail toe, chꞌayix bael”, xchi.

⁵ Te machꞌa te teꞌ nakal ba ay te mukꞌul naktajibale, la yal: “Joꞌon ya jpas ta achꞌ spisil te tutik aye”, xchi. Sok jich a yalbon: —Tsꞌibaya te tut la kale. Porke te kꞌopetik to batsꞌi jich. Ayuk me smukꞌul awoꞌtan te jich ya xkꞌot ta pasele —xchi.

⁶ Ta patil la yalbon: —Juꞌix ta pasel joꞌon te ayon ta slijkibale y sok ta slajibale. Te machꞌa takin yoꞌtane, ta majtanil ya me kaꞌbe yuchꞌ te lokꞌi-jaꞌ yuꞌun te kuxlejale.

⁷ Te machꞌa ya xjuꞌ yuꞌun tsalawe ya me xꞌaꞌbot yuꞌunin spisil te tutik ay. Y joꞌon me Dioson ya xkꞌoon yuꞌunik y te stukelik kal-jnichꞌan ya xkotik.

⁸ Pero te machꞌatik ya xiꞌike, sok te machꞌatik ma xchꞌuunonike, sok te machꞌatik pꞌajbil te tut ya spasike, sok te machꞌatik ya xmilwanike, sok te machꞌatik ya sꞌantsiwejike, sok te machꞌatik ya snopik yakꞌel pox ta skuenta pukuje, sok te machꞌatik ya yichꞌik ta mukꞌ te lotil diosetike, y sok spisil te loꞌlawanejetike, te stukelike ya me staik bael chꞌojel ochel ta kꞌajkꞌ te lom tulan yipal ta tilel sok asufree, te jaꞌ te xchaꞌmelal lajele —xchi.

Te achꞌ Jerusalene

⁹ Tal jtul ta sjuktulul te angeletike te yichꞌojik te jukeb basoetik te nojel ta jukkaj te último tulan wokoletike. Y la yalbon: —Laꞌ. Ya kakꞌ awil te achꞌix te ya xnujpun sok te Chin Karnerae —xchi.

¹⁰ Y te tut la yaꞌbon kil te Espiritue, jaꞌ te la yikꞌon bael te ángel ta jun mukꞌul wits te lom toyole. Y la yaꞌbon kil te mam mukꞌul jtejklum, jaꞌ te Chꞌul Jerusalene, te yipal tal ta koel ta chꞌulchan ta stojol te Diose.

¹¹ Te mukꞌul jtejklume, xlemlun yuꞌun te xojobil te Diose. Te xlemete jachik tutꞌil jun ton te ben tsaꞌame, jaꞌ te jaspe-tone, te jich tutꞌil te espejo te chikan kꞌinal aye.

¹² Te sjoylejal te mukꞌul jtejklume ay smam makteꞌal ton y lom toyol. Ay lajchayeb puertaetik y ta jujun te puertae ay jtul ángel a. Te ba ay te puertaetike teꞌ tsꞌibalanbil sbiilik a te lajchaytijkꞌ stsꞌumbal Israele.

¹³ Ay oxeb puertaetik ba stojil xlokꞌ tal kꞌajkꞌale, oxeb ta stojil norte, oxeb ta stojil sur y oxeb ta stojil xchꞌay kꞌajkꞌal.

¹⁴ Te smakteꞌal ton te mukꞌul jtejklume ay yichꞌoj lajchayeb tonetik yuꞌun yiptajib, te teꞌ tsꞌibabil sbiilik a te lajchaytul apostoletik yuꞌun te Chꞌin Karnerae.

¹⁵ Te ángel te yipalon sok ta kꞌope, yichꞌoj jun jalal te pasbil ta oroe, yuꞌun ya spꞌis a te mukꞌul jtejklume, sok te puertaetike, y sok te smakteꞌale.

¹⁶ Te mukꞌul jtejklume kuadrado ay, pajal ay te snajtlejale sok te sjamlejale. Te ángele la spꞌis sok te sjalal te mukꞌul jtejklume: lokꞌ dos mil dosientos kilometros te spꞌisile. Pajal nax te snajtꞌile, te stoylejale y te sjamlejale.

¹⁷ Te nax a la spꞌisbe te smakteꞌal tone: lokꞌ sesenta y sinko metros. Te ángele jicha tuun yuꞌun te tutꞌil ay spꞌisil yuꞌun te gentee.

¹⁸ Te smakteꞌale pasbil ta jaspe-ton, y te mukꞌul jtejklume pasbil ta puro oro, jachik tutꞌil espejo te ben limpioe.

¹⁹ Te tonetik te yiptajib te smakteꞌale lek chapbil sok spisil ta jkaj tonetik te ben tsaꞌamike. Te primero sok jaspe, te xcheꞌbal sok zafiro, te yoxebal sok ágata, te xchanebal sok esmeralda,

²⁰ te yoꞌebal sok ónice, te swakebal sok cornalina, te sjukebal sok crisólito, te xwaxkebal sok berilo, te sbalunebal sok topacio, te slajunebal sok crisopraso, te xbuluchebal sok jacinto, te xlajchayebal sok amatista.

²¹ Te lajchayeb puertaetike pasbil ta lajchayeb perlaetik; te jujun puertae chapbil ta juju nax perla. Y te mukꞌul kaya yuꞌun te mukꞌul jtejklume, pasbil ta puru oro, jachik tutꞌil espejo te chikan kꞌinal aye.

²² Maꞌyuk a kil templo a te ba mukꞌul jtejklume, porke jaꞌ templo yuꞌun te Kajwaltike, jaꞌ te Dios te spisil ya xjuꞌ yuꞌune, y sok te Chin Karnerae.

²³ Te mukꞌul jtejklume ma puersaukix yuꞌun te kꞌajkꞌale ni te xojobil ue. Porke jaꞌ ya sakutes te xojob yuꞌun te Diose, y te sakil kꞌinal yuꞌune jaꞌ te Chꞌin Karnerae.

²⁴ Te nasionetik te kolemike ya xbeenik ta sakil kꞌinal yuꞌun, y te machꞌatik reyetik yuꞌun te balmilale ya me yakꞌik entregal te skꞌulejalik te ba mukꞌul jtejklume.

²⁵ Te spuertaule makꞌ stsꞌus ta kꞌajkꞌaltik, y te ba aye maꞌyukix ajkꞌubal a.

²⁶ Ya me yakꞌik entregal te skꞌulejalik y sok te slekilal te nasionetike.

²⁷ Pero ma xjuꞌ ya xꞌoch teꞌa te tut ma lekuke, ni ma xjuꞌ ya xꞌoch teꞌa te machꞌatik ya spasik te tut ma tsaꞌamuke sok te jloꞌlawanejetike. Jaꞌ nax ya xꞌoch teꞌa te machꞌatik ay tsꞌibabil sbiilik te ba libro yuꞌun kuxlejal yuꞌun te Chin Karnerae.