Apocalipsis 20 - Nuevo Testamento Tzeltal de Amatenango

Te jmil jaꞌbile

¹ La kil jtul ángel te yipal tal ta koel ta chꞌulchane. Yichꞌojbe syaweal te mam chꞌene y sok yichꞌoj jlijk mam kadena ta skꞌab.

² Te ángel to la stsak te chanbalam te xiꞌbentik sbae, jaꞌ te antibo chan te pukuj sok Satanas sbiile, y la xchuk ta kadena jmil jaꞌbil.

³ La xchꞌoj koel ta mam chꞌen te ba la stsꞌus jilele. Y la yaꞌbe jilel jun seyo te ba spuertaule, yuꞌun maꞌyuk ya sloꞌlayix a te nasionetike jaꞌ to teme kꞌax te jmil jaꞌbile. Teme tsꞌakay te jmil jaꞌbile, ya me skolesot tal lokꞌel jun chebuk kꞌaal.

⁴ La kil mukꞌul naktajibaletik, y te machꞌatik nakajtik teꞌ ae, jaꞌ te machꞌatik yichꞌoj yaꞌtelik ta chapawe. Sok la kil xan te xchꞌulelik te machꞌatik te setꞌalanbot sjol yuꞌun te jun yoꞌtanik a yalik ta jamal te skꞌoplal Jesuse y sok te skꞌop Diose. Te stukelike maꞌyuk a yichꞌik ta mukꞌ te chanbalam te xiꞌbentik sbae ni te slokꞌole. Ni maꞌ skꞌan a yichꞌbeyik te smarka ta stiꞌsbaike o ta skꞌabike. Y la kil te chꞌakuxik xane, y la sjoyinik ta ajwalil jmil jaꞌbil te Cristoe.

⁵ Pero te yanetik xan te chamenixe maꞌ chaꞌkuxik a, jaꞌto te tsꞌakay jmil jaꞌbile. Jaꞌ to jaꞌ te primero chaꞌkuxele.

⁶ Ben tsaꞌam slekilik te machꞌatik ay ta skuentaik te primero chaꞌkuxele, yuꞌun jaꞌik te yuꞌunik Dios stukelike. Te xchaꞌmelal lajele ma tut ya xꞌutotikix yuꞌun a. Sino ke jaꞌix saserdoteetik yuꞌun a te Diose y sok te Cristoe, y ya me sjoyinik ta ajwalil jmil jaꞌbil te Cristoe.

La yichꞌ tsalel te pukuje

⁷ Te kꞌalal tsꞌakayix a te jmil jaꞌbile, te pukuje ya skolesot te ba chukule.

⁸ Y ya xlijk sloꞌlay te nasionetik ta spisil te balmilale, jaꞌ te Gog y Magog sbiilike. Sok ya me stsob tal ta guerra te soltaroetik yuꞌune, te lom bayal te jachik tutꞌil sjiꞌal te mare.

⁹ Jich moik bael ta ba sjoylejal te balmilale. Y la sjoyik te ba stsoboj sbaik te machꞌatik yuꞌun te Diose, y sok te mukꞌul jtejklum te kꞌux ta yoꞌtan stukele. Pero aꞌbot tal koel kꞌajkꞌ ta chꞌulchan yuꞌun te Diose, y laj ta kꞌajkꞌel ta spisil.

¹⁰ Y te pukuje, te loꞌlaylanbil yuꞌune, chꞌojot ochel te ba yipal ta tilel kꞌajkꞌ sok asufree, teꞌ ba chꞌojtalanbil ochel euk te chanbalam te xiꞌbentik sbae y sok te palso jꞌalwanejetike. Teꞌ me ya yilik swokolik a kꞌajkꞌal ajkꞌubal ta sbajtel kꞌinal.

Ay ichꞌel ta kꞌop te ba ay te mam mukꞌul sakil naktajibale

¹¹ La kil jun mam mukꞌul sakil naktajibal, y te machꞌa teꞌ nakal aye. Ta sit lokꞌ bael ta anel ta stojol te chꞌulchan sok te balmilale, y ni maꞌ ba staikix sluwarik a.

¹² Y la kil te animaetike, chꞌin ta mukꞌ, tekꞌajtik ta sit te mukꞌul naktajibale. Y la yichꞌ jamel te libroetike, y sok te jun xan libro jaꞌ te slibroil te kuxlejale. Te animaetike ichꞌtalanot jkuenta chikan te tut spasojike y sok te tut tsꞌibabil te ba libroetike.

¹³ Te mare la yakꞌ entregal te machꞌatik te chamenik aye. Te lajele y sok te yawil animaetike la yakꞌ entregal te machꞌatik teꞌeyik aye. Y spisilik a ichꞌtalanot jkuenta ta juju-tul, chikan te tut spasojike.

¹⁴ Te nax a te lajele sok te yawil animaetike la yichꞌik chꞌojel ochel ta kꞌajkꞌ te ba yipal ta tilele. Te kꞌajkꞌ te yipal ta tilele jaꞌ te xchaꞌmelal lajele.

¹⁵ Y teꞌ chꞌojtalanot ochel a te machꞌatik ma tsꞌibalanbiluk sbiilik te ba libro yuꞌun kuxlejale.