Apocalipsis 2 - Nuevo Testamento Tzeltal de Amatenango

Te skꞌop Dios ta stojol te jtijkꞌ hermanoetik ta Efeso

¹ Sok la yalbon: —Tsꞌibabeya ta sjun te ángel te ba ay jtijkꞌ hermanoetik te aylan ta Efesoe: “Jaꞌ to jaꞌ a yal te Machꞌa ay jukeb ekꞌetik ta sbatsꞌil kꞌabe, y sok te yipal ta beel ta yolil te jukchꞌix yawil kꞌajkꞌ te puro oroe.

² “Joꞌon jnaꞌoj spisil te tut ya apase. Kiloj te tulan ya xꞌaꞌtejate, y te ya stsꞌijk awuꞌune, y jnaꞌoj te ma xkujch awuꞌun te machꞌatik ma lekikuke. Y jnaꞌoj te awilojix tutꞌ ay yoꞌtanik te machꞌatik te ya skuy sbaik ta apostole y ma jaꞌukik, y ataojbeyix slotik.

³ Tsꞌijkem awuꞌun te awokole, y bayal kꞌaxem awokol ta jkaj, pero ma xlubat.

⁴ “Pero ay tut amulinej kuꞌun: Te maꞌyukix awuꞌun te xkꞌuxul awoꞌtan jich tutꞌil nail toe.

⁵ Jaꞌ yuꞌun, naꞌame te ba ay te chꞌayemate. Sujtesa awoꞌtan ta stojol Dios, y pasa me xan jich tutꞌil te la apas ta nail toe. Teme maꞌuke, ya xtalon ta ora ta atojol y ya jpojbeyat te yawil akꞌajkꞌ te ba ay awuꞌune, teme max asujtes awoꞌtan ta stojol Diose.

⁶ Pero ay to tut lek ay ta akuenta: Jaꞌ te ya apꞌajbey te tut ya spasik te jnicolaitaetike. Te joꞌone ya jpꞌajbey euk.

⁷ “Te machꞌa ay xchikine, a me yaꞌiy te tut ya yal te Espíritu ta stojol te juju-tijkꞌ hermanoetike. Te machꞌatik ya xjuꞌ yuꞌunik tsalawe, ya me kꞌabe sweꞌ te sit teꞌ yuꞌun te kuxuyinele te teꞌey ba ay te lekilal yuꞌun te Diose”, uta me —xchi.

Te skꞌop Dios ta stojol te jtijkꞌ hermanoetik ta Esmirna

⁸ Sok la yalbon: —Tsꞌibabeya ta sjun te ángel te ba ay jtijkꞌ hermanoetik te aylan ta Esmirnae: “Jaꞌ to jaꞌ a yal te Machꞌa ay ta slijkibale y sok te ay ta slajibale, te Machꞌa cham y te chꞌakux xane.

⁹ “Joꞌon jnaꞌoj te awokol sok te ameꞌbaale. Pero te jaꞌate jkꞌulejat. Y jnaꞌoj te ma lekuk akꞌoplal ya yalbelat yuꞌun te machꞌatik ya yalik te juriyoike pero ma jaꞌuklan. Jaꞌik jtijkꞌ yuꞌun Satanas.

¹⁰ “Ma me xiꞌan yuꞌun te tut ya xkꞌax awokol yuꞌune. Yuꞌun te pukuje ya me xchꞌikex ta prexo yuꞌun ya me spaselex ta prewa ta apisilik. Y ya me xkꞌax awokolik lajunebuk kꞌaal. Jmel nax me junuk awoꞌtan asta ba kꞌalal ya xchamat. Y joꞌon ya kꞌabeyat te akuxlejal jachik tutꞌil majtanile.

¹¹ “Te machꞌa ay xchikine a me yaꞌiy te tut ya yal te Espíritu ta stojol te juju-tijkꞌ hermanoetike. Te machꞌatik ya xjuꞌ yuꞌunik tsalawe makꞌ me yil swokolik xchꞌinuk yuꞌun te xchꞌamelal lajele”, uta me —xchi.

Te skꞌop Dios ta stojol te jtijkꞌ hermanoetik ta Pergamo

¹² Sok la yalbon: —Tsꞌibabeya ta sjun te ángel te ba ay tijkꞌ hermanoetik te aylan ta Pergamoe: “Jaꞌ to jaꞌ a yal te machꞌa yichꞌoj te puñal te chaꞌmejch yee.

¹³ “Te joꞌone jnaꞌoj te teꞌ anat te ba ay snaktajib te pukuje. Pero sigueuk me junuk awoꞌtan ta jkuenta. Ma jilesejuk te tutꞌi achꞌuuneje, ni jaꞌuk te tut kꞌaalil yuꞌun te jꞌAntipas te jun yoꞌtan a yalbon jkꞌoplal, te la smilik te ba mukꞌul jtejklum te ba ay te Satanase.

¹⁴ “Pero ay tut amulinej kuꞌun. Te teꞌey awuꞌun jtul cheb te ma skꞌan sjilesik te tutiꞌ yakꞌ ta nopel te jBalaame, te la yaꞌbe snop te jBalac te tutꞌil a yakꞌ mulawuk te jꞌisraeletike, te la yaꞌbe sweꞌ te weꞌeliletik te milbil smajtanin lotil diosetike y sok te lijkik ta antsiwejele.

¹⁵ Sok teꞌey awuꞌun jtul cheb te ma skꞌan xchꞌojik jilel te tutiꞌ yakꞌ ta nopel te jnicolaitaetike.

¹⁶ Jaꞌ yuꞌun, sujtesa awoꞌtan ta stojol Dios. Teme maꞌuke, ya me xtalon ta ora nax, ya me kꞌabe jbaj sok te machꞌatik jich aye sok te puñal te ya xlokꞌ ta jtiꞌe.

¹⁷ “Te machꞌa ay xchikine, a me yaꞌiy te tut ya yal te Espíritu ta stojol te juju-tijkꞌ hermanoetike. Te machꞌatik ya xjuꞌ yuꞌunik tsalawe ya me kakꞌtalanbe sweꞌ te mana waj te nakꞌal aye. Y ya me kakꞌtalanbe euk te jun sakil ton te teꞌ tsꞌibabil jun achꞌ biilil te maꞌyuk machꞌa ya snaꞌe, jaꞌ nax te machꞌa ya yichꞌe”, uta me —xchi.

Te skꞌop Dios ta stojol te jtijk hermanoetik ta Tiatira

¹⁸ Sok la yalbon: —Tsꞌibabeya xan ta sjun te ángel te ba ay jtijkꞌ hermanoetik te aylan ta Tiatirae: “Jaꞌ to jich ya yal te Xnichꞌan Diose, te jich ya xtil, te site jachik tutꞌil kꞌajkꞌ te xlaplune, y te yoke jachik tutꞌil bronse-takꞌin te xlemete.

¹⁹ “Kiloj spisil te tut ya apase. Jnaꞌoj te xkꞌuxul awoꞌtane, y te xchꞌuunel awoꞌtane, sok te awakꞌoj aba ta abatinele, y sok te kujchem awuꞌun te awokole. Y kiloj te ora to yipalat ta spasel ta mas ke te nail toe.

²⁰ Pero ay tutiꞌ amulinej ta jtojol te maꞌyuk tut ya awalbey te ants Jezabele, te ya yal te jꞌalwanej yuꞌun Dios ta skꞌope, pero ya sloꞌlay te jꞌaꞌteletik kuꞌun yuꞌun te tut ya yakꞌ ta nopele. Sok te ya yakꞌtalanbe spas antsiwejel, y ta sweꞌel weꞌeliletik te milbil smajtanin te lotil diosetike.

²¹ La kaꞌbeyix bayal tiempo yuꞌun te ya sujtes yoꞌtan ta stojol Dios, pero ma skꞌan ya sujtes yoꞌtan y ma xyijkitay te kremiwejele.

²² Jaꞌ yuꞌun ya kakꞌ tꞌuxajuk ta wayibal, y ya me kakꞌ kꞌaxuk bayal swokol te machꞌatik ya spasik antsiwejel sok, teme ma sujtes yoꞌtanik yuꞌun te tut ya yakꞌ ta pasele.

²³ Y ya me kakꞌ lajuk te yuntikile. Jich me ya snaꞌik spisil te juju-tijkꞌ hermanoetik te joꞌon jnaꞌoj asta ta yutil pensar y ta oꞌtanil. Y ta juju-tul te jaꞌexe ya kaꞌbeyex chikan te tutiꞌ apasojike.

²⁴ “Pero te jaꞌex te aylan ta Tiatirae te ma xꞌanaꞌik te tut ya yakꞌ ta nopele, sok te ma jaꞌuk bajt ta awoꞌtanik snopel te tutik mukul nax ya yalik te jaꞌ yuꞌun te pukuje, ya kalbeyex te maꞌyuk yan mantal ya kaꞌbeyex achꞌuunike.

²⁵ Pero ma me wakꞌ chꞌayuk te tut ay awuꞌunike asta jaꞌ to teme talone.

²⁶ “Te machꞌatik ya xjuꞌ yuꞌunik tsalawe y te sigue ya spasik asta ta slajibal kꞌaal te tut ya skꞌan koꞌtane, ya me kakꞌtalanbe yaꞌtel ta stojol te nasionetike,

²⁷ jachik tutꞌil yakꞌojbon kaꞌtele te Jtate. Ya me xmantalajik sok sbaston takꞌinik. Ya me xwuyik kꞌoem te nasionetik jich tutꞌil pꞌinetik te pasbil ta lume.

²⁸ Y jich me ya kakꞌtalanbe te ekꞌ te ya xlok tal ta sakubel kꞌinale.

²⁹ “Te machꞌa ay xchikine, a me yaꞌiy te tut ya yal te Espíritu ta stojol te juju-tijkꞌ hermanoetike.