Apocalipsis 19 - Nuevo Testamento Tzeltal de Amatenango

¹ Ta patil la kaꞌiy yipalik ta tulan kꞌop te bayalik ta chꞌulchan, te jich la yalik: —¡Ay ta albeyel ta ichꞌel ta mukꞌ te Kajwaltike! Te kolele jaꞌ yuꞌun te Dios kuꞌuntike. Ay slekilal sok ay spoder.

² Porke stukel toj ya xchapawan y sok batsꞌi jich. Yuꞌun la yaꞌbeyix kastigo te mera jmulawil ants te la yixlan ta kremiwejel te balmilale. Aꞌbotix stoj te la smilbey te machꞌatik jꞌaꞌteletik yuꞌun te Diose —xchiik.

³ Te nax a la yalik xan: —¡Ay ta albeyel ta ichꞌel ta mukꞌ te Kajwaltike! Te xchꞌailel te mukꞌul jtejklume ni jaymel ya xkom te xtomomet ya xmoe —xchiik.

⁴ Y te beintikuatro ta tul te lom mamalikixe y sok te chaneb te tut kuxajtike la skejan sbaik kꞌalal ta lum, y la yichꞌik ta mukꞌ te Diose te nakal te ba ay te smukꞌul snaktajibe. Y la yalik: —Jichuk. Ay ta albeyel ta ichꞌel ta mukꞌ te Kajwaltike —xchiik.

⁵ Te ba ay te smukꞌul snaktajibe ay a chiknaj jun kꞌop te la yale: —Albeyaik slekilal te Dios kuꞌuntike ta apisilik, chꞌin ta mukꞌ, te jaꞌex te abatex y te ya awakꞌik ta jkuentae te Diose —xchi.

Te kꞌin yuꞌun nujpunel yuun te Chꞌin Karnerae

⁶ Jich a kaꞌiy xan te jachik yaꞌiyel tutꞌil skꞌop bayal gente, jachik tutꞌil skꞌop nojel-jaꞌ y sok te lom tulan xpumete. Ya yalik: —Ay ta albeyel ta ichꞌel ta mukꞌ te Kajwaltike, porke lijkix ta pasaw ta mantal te Kajwaltike, te Dios kuꞌuntik te spisil ya xjuꞌ yuꞌune.

⁷ Junuk koꞌtantik sok ayuk me sbujts koꞌtantik te ya kalbetik te slekilale. Porke la staix yorail te nujpunel yuꞌun te Chꞌin Karnerae. Te machꞌa ya xnujpun soke chapalix.

⁸ Akꞌtalanbotix ta slapel te lino pakꞌ te ben finoe, te limpio ay, sok te xlemlune —xchiik. Porke te lino pakꞌe jaꞌ seña te toj te tut ya spas te machꞌatik yuꞌun te Diose.

⁹ Te ángele la yalbon: —Tsꞌibaya to: “Ben tsaꞌam slekilik te machꞌatik ikꞌtalanbil ta kꞌin yuꞌun nujpunel yuꞌun te Chꞌin Karnerae” —xchi. Sok la yal xan: —Te kꞌopetik to batsꞌi jich yuꞌun te Diose —xchi.

¹⁰ La jkejan jba ta yok te ángele, yuꞌun ya kichꞌ ta mukꞌ. Pero te ángele la yalbon: —Ma xꞌapas jich. Yuꞌun te joꞌone yaj-aꞌtelon euk te Diose, jich mismo te tutꞌil jaꞌate y sok te awermanotak te sigue jun yoꞌtanik ta yalel ta jamal te skꞌoplal Jesuse. Jaꞌ me xꞌawichꞌ ta mukꞌ te Diose —xchi. Yuꞌun te skꞌoplal te Jesuse jaꞌ ya xꞌalbot ta yoꞌtanik te machꞌatik jꞌalwanejetik yuꞌun te Diose.

Te machꞌa kajal ta sakil kawue

¹¹ La kil jamal te chꞌulchane, y teꞌ chiknaj jkojt sakil kawu a. Y te machꞌa moem aye: “Jun Yoꞌtan” y “Batsꞌi Jich” te sbiile. Porke ta stojil ya spasawan ta mantal y ya xjuꞌ yuꞌun tsalaw.

¹² Te site xlemlajan jachik tutꞌil xlaplun kꞌajkꞌ. Yichꞌoj ta sjol bayal koronaetik, y yichꞌoj jun biilil te tsꞌibabil te stukel nax snaꞌoje.

¹³ Yichꞌoj spalala skꞌuꞌ-spakꞌ te kꞌoem ta chꞌichꞌe. “Skꞌop Dios” xchi te sbiile.

¹⁴ Tsꞌaklibil yuꞌun bayal soltaroetik te ay ta chꞌulchane. Slapojik lino pak te ben fino sok te limpio aye, y moemik ta sakil kawuetik.

¹⁵ Ya xlokꞌ ta stiꞌ jun puñal te beno yee, yuꞌun ya yejchentes a te nasionetike. Ya spasawan ta mantal sok sbaston takꞌin ta stojolik. Ya me yaꞌbe yichꞌik kastigo, jachik tutꞌil ya spitsꞌot ta tekꞌel te yaꞌlel uvae. Y ya me yakꞌtalanbe yuchꞌik te bino yuꞌun te tulan wokole, jaꞌ te kastigo ya xtal ta stojol Dios te spisil ya xjuꞌ yuꞌune, yuꞌun ma xkujchix yuꞌun te tut ma lekuk ya spasike.

¹⁶ Te ba spalala kamixe y sok te ba yaꞌ tsꞌibabil a te jich ya yale: “Mukꞌul Rey yuꞌun reyetike, y Mukꞌul Ajwalil yuꞌun ajwaliletike”, xchi te sbiile.

¹⁷ Y la kil jtul ángel te teꞌ tekꞌel te ba ay te kꞌajkꞌale sok spuersa ya xꞌawun ta stojol spisil te mutetik te ya xwil ta yolil chꞌulchane: —Laꞌik, tsoba abaik tal yuꞌun ta sweꞌel te weꞌelil xchapoj te Diose.

¹⁸ Yuꞌun ya aweꞌik te stiꞌbalul reyetike, sok te stiꞌbalul statal soltaroetike, y sok te stiꞌbalul te tulan genteetike. Sok te stiꞌbalul kawuetike y sok te stiꞌbalul te machꞌatik moem aye, sok stiꞌbalul spisil genteetik, me libre aylan o aylan ta mosoil, chꞌin ta mukꞌ —xchi.

¹⁹ La kil te chanbalam te xiꞌbentik sbae y sok te reyetik ta balmilal sok te soltaroetik yuꞌune te stsꞌoboj sbaik ta pleto ta skontrainel te machꞌa moem ta sakil kawue y ta skontrainel te soltaroetik yuꞌune.

²⁰ Te chanbalam te xiꞌbentik sbae la yichꞌ tsakel, jun nax sok te palso alwanejetik te la yakꞌik ta ilel seña milagroetik ta stojole. Ta skuenta te señailetik abi, te palso jꞌalwanejetik juꞌ yuꞌun sloꞌlayel te machꞌatik la skꞌan a yichꞌbeyik te smarka te chanbalam te xiꞌbentik sbae y te la yichꞌbeyik ta mukꞌ te slokꞌole. Jich te chanbalam te xiꞌbentik sbae y sok te palso alwanejetike kuxul a chꞌojtalanot ochel ta kꞌajkꞌ te yipal ta tilel sok asufree.

²¹ Y te yanetike, miltalanot ta puñal te ya xlokꞌ ta stiꞌ te machꞌa moem ta kawue. Y spisil te mutetike noj xchꞌujtik yuꞌun te la sweꞌbeyik stiꞌbalul te machꞌatik chamenike.