Apocalipsis 18 - Nuevo Testamento Tzeltal de Amatenango

Jimix te jtejklum Babiloniae

¹ Ta patil to la kil jtul xan ángel te yipal tal ta koel ta chꞌulchane. Tulan yichꞌoj yaꞌtel, y te balmilal sakub kꞌinal yuꞌun te xojobile.

² Sok tulan skꞌop xꞌawet: —¡Jimix, jimix te mukꞌul jtejklum Babiloniae! Sujtemix ta sna pukujetik. Jaꞌ xchꞌenikix spisil ta jkaj te pukujetik te ma lekuke. Xluchtajibix spisil ta jkaj te mutetik te ma lekuke y te pꞌajbile.

³ Yuꞌun spisil te nasionetike yakubik yuꞌun te sbino yuꞌun te tut ma tsaꞌamuke sok yuꞌun te antsiwejele. Te reyetik ta balmilale la yantsinlanikix, y te jchonbajeletik ta balmilale laj kꞌulejibix sok te tut ya skꞌupin sok te stiꞌbalul te tulan ya yakꞌ ta pasele —xchi.

⁴ La kaꞌiy xan kꞌop ta chꞌulchan te jich ya yale: —Lokꞌanik bael te ba mukꞌul jtejklume, jaꞌex te jtejklumex kuꞌune. Yuꞌun me jich makꞌ ya ajoyinik yuꞌun a te smulike ni makꞌ staex a te kastigo ya yichꞌike.

⁵ Yuꞌun te smulike lom bayalix, kꞌotix kꞌalal ta chꞌulchan, y Dios a yilix te tut ma lekuk ya spasike.

⁶ Jich mismo a yichꞌ ekꞌa te tutꞌil a spasbe te yanetike. A me stoj chebuk buelta te tut spasoje. Aꞌ bayalejuk chaꞌmel ta mas tulan te wokol ya yichꞌe jich tutꞌil la yaꞌbe swokol te yanetike.

⁷ Aꞌ yichꞌ tulan wokol y yoꞌolil sba jich tutꞌil te la stoy sbae y te tutiꞌ skꞌupin stiꞌbalule. Yuꞌun la yal ta yoꞌtan: “Liꞌ ayon to, nakalon jich tutꞌil me mukꞌul rey. Ma biuda antsukon, ni makꞌ me kil wokol”, xchi.

⁸ Jaꞌ yuꞌun ta jun nax kꞌaal ya xtal te tulan swokolike: lajel, wokol y wiꞌnal, sok ya me yichꞌ chikꞌel ta kꞌajkꞌ. Porke te Diose bayal spoder, te jaꞌ Ajwalile, jaꞌ la yichꞌix jkuentae —xchi.

⁹ Te reyetik ta balmilal la yantsinanikix, sok la sjoyinlanikix ta spasel te tut te ya skꞌupin stiꞌbalulike. Ya me xꞌokꞌik y ya me yichꞌ yajtal yoꞌtanik yuꞌun te kꞌalal ya yilik te xchꞌailel te xchikꞌelike.

¹⁰ Jakal to me ya yilik sok xiꞌel te swokolike, y ya me yalik: —¡Ay, oꞌol me aba, mukꞌul jtejkꞌum Babilonia, mukꞌul jtejklum te beno awipe! Porke jtsꞌin nax a tal te kastigo awuꞌune —xchiik me.

¹¹ Te jchonbajeletik ta balmilale jich me ya yokꞌetay te mukꞌul jtejklume, y ya me yichꞌ yajtal yoꞌtanik yuꞌun. Porke maꞌyukix machꞌa ya sman a te tut xkuchojike:

¹² jaꞌ te oro, plata, ben tsaꞌam ton, sok perlaetik, sok te lino pakꞌetik te lom finoe, y sok te seda pakꞌe te tsaj-tsajtik skolorile, sok spisil ta jkaj ta teꞌetik te ben butsꞌan yikꞌe, sok te tut pasbil ta sbakel ye te elefantee, sok ben tsaꞌamik teꞌ, sok bronse-takꞌin, sok hierro-takꞌin, y sok marmol-ton,

¹³ sok kanela sok yan poxil weꞌelil te ben bujtsꞌan yikꞌe, sok pom, sok mirra y perfumeetik, sok bino, sok aseite, sok ben fino harina y triwu, sok chanbalametik yuꞌun ijkatsil, karneraetik, kawuetik sok karretaetik, y asta sok mosoetik, sok yan xan genteetik.

¹⁴ Y ya me yalbeyik te mukꞌul jtejklume: —Maꞌyukix awuꞌun spisil te sit loꞌbajeletik te ben ya akꞌane, yuꞌun la achꞌayix spisil te atsaꞌamul y te akꞌulejale —xchi me.

¹⁵ Te machꞌatik ya xchonbaj sok te tutik to, y te kꞌulejibik ta skuenta te mukꞌul jtejklume, jakal to me ya yilik yuꞌun xiꞌel te kastigo ya yichꞌe. Ya me xꞌokꞌik y ya me yakꞌ yajtal yoꞌtanik.

¹⁶ Jich ya yalik: —¡Ay, oꞌol me sba te mukꞌul jtejklume! Jachik tutꞌil jtul ants te slapoj skꞌuꞌ-spakꞌ te lino pakꞌ te ben finoe y slapoj skꞌuꞌ-spakꞌ te tsaj-tsajtik skolorile, sok xchapoj sba ta oro, perlaetik, y ben tsaꞌamik ton,

¹⁷ y ta jtsꞌin nax a laj te lom bayal skꞌulejale —xchi. Spisil te japuyej-barkoetike y te machꞌatik ya xbeenik ta tiꞌtiꞌ jaꞌe, sok te jꞌaꞌteletike ta barkoetik y spisil te machꞌatik ya sleik aꞌtel ta mare, jakal to me ya xjilik.

¹⁸ Y te kꞌalal ya yilbeyik xchꞌailel te skꞌajkꞌel te mukꞌul jtejklume, ya xꞌawunik: —Maꞌyuk yan mukꞌul jtejklum te ya xjꞌu ya spaj te mukꞌul jtejklum to —xchiik yuꞌun.

¹⁹ Y ya me smukik ta tsꞌubil lum te sjolike, y ya xꞌokꞌik yuꞌun te yajtal yoꞌtanike. Y xꞌawlajan: —¡Ay, oꞌol me sba te jtejklum te lom mukꞌe. Sok te skꞌulejale la yakꞌ kꞌulejubuk spisil te machꞌatik ay sbarkoik ta mare. Y ta jtsꞌin nax a laj ta jimel! —xchiik.

²⁰ Jaꞌex te ayex ta chꞌulchane, kontentoukex me yuꞌun te jimix te mukꞌul jtejklum to; y kontentoukex me jaꞌex te machꞌatik ayex ta jtejklum yuꞌun te Diose, sok te machꞌatik apostoletike y te machꞌatik jꞌalwanejetike. Porke Dios la yaꞌbeyix stoj te tut ma lekuk a spasbeyex te jaꞌexe.

²¹ Jich te jtul ángel te bayal yipe la xjach jpꞌej ton te jachik tutꞌil jpꞌej mam chaꞌtone, y la xchꞌoj ochel ta mar. Sok la yal: —Jich me ya yichꞌ tulan jimel te Babilonia te mam mukꞌul jtejklume, y ni jaymel ya xtaot xan ta ilel.

²² Ni jaymel ya xꞌaꞌiyot xan ta atojol ta kayailtik te kꞌin yuꞌun te arpaetike, sok te amayiletike, y sok te kornetaetike. Sok maꞌyukix jꞌaꞌteletik ta atojol te ya snaꞌik aꞌtele. Sok ma me chikanukix ta atojol te yokꞌel te mam chaꞌtone.

²³ Sok ma xojobin xan ta atojol te lus yuꞌun te jun lamparae. Sok makꞌ me xꞌaꞌiyotix ta atojol te xniket kꞌin yuꞌun te nujpunele. Aunke te bayal yipik ta balmilal te jchonbajeletik awuꞌune, sok la aloꞌlay ta spisil te nasionetik sok te ma lekuk poxetik yuun pukuje —xchi me.

²⁴ Yuꞌun te ba mukꞌul jtejklume la yichꞌ malel a te xchꞌichꞌel jꞌalwanejetike, sok te machꞌatik ayik yuꞌun te Diose, y sok ta spisil te machꞌatik lajemik ta milel ta balmilale.