Apocalipsis 17 - Nuevo Testamento Tzeltal de Amatenango

Te kastigo ya yichꞌ te mera jmulawil antse

¹ Tal skꞌoponon jtul te ta sjukebal te angeletik te yichꞌojik te jukeb basoetike, y la yalbon: —Laꞌ, ya kꞌabeyat awil te kastigo ya yichꞌ te mera jmulawil ants te teꞌ nakal ba sba te jaꞌe.

² Te reyetik ta balmilale la yantsinikix te antse, y te machꞌatik aylan ta balmilale laj yakubikix sok te sbino te skuenta mulile —xchi.

³ Te nax a, ay tut la yaꞌbon kil te Espiritue. Te ángele la yikꞌon bael ta jojchol tꞌantꞌan luwar. Teꞌ kil jtul ants a te kajal ta jkojt tsajal chanbalam te lom yane. Te skojtol stsꞌibabil biililetik te puru toyba-kꞌopetik ta stojol te Diose. Y ay jukeb sjol y lajuneb xulbal.

⁴ Te ants abi slapoj skꞌuꞌ-spakꞌ tsaj-tsajtik te sbonole, y lek xchapoj sba ta oro sok ta ben tsaꞌamik ton sok ta perlaetik. Yichꞌoj ta skꞌab te jun baso pasbil ta oro te nojel a te tutik pꞌajtalanbile y sok smul ta kremiwejele.

⁵ Ay tsꞌibabil ta stiꞌsba jun biilil te mukul nax aye: “Te mukꞌul jtejklum Babiloniae, jaꞌ smeꞌ te jmulawil antstike sok ta spisil te tutik pꞌajbil ta balmilale”, xchi.

⁶ Te nax a la jnaꞌ te yakubenix te antse. Jaꞌ yakuben yuꞌun te xchꞌichꞌel te machꞌatik yuꞌunik te Diose y sok te xchꞌichꞌel te machꞌatik miltalanot yuꞌun te la yalik ta jamal te skꞌoplal te Jesuse. Te kꞌalal la kile, lom cham a kaꞌiy yuꞌun.

⁷ Jich la yalbon te ángele: —¿Tuꞌun te lom cham la awaꞌiye? Ya kalbeyat te tut xyal skꞌoplal ta mukul te ants me to, y te chanbalam te lom yan te ikꞌbil bael yuꞌun, te ay jukeb sjol y lajuneb xulbale.

⁸ Te chanbalam te lom yan la awile, jaꞌ te kuxul ta nail toe, pero ma chikanukix. Pero ya xba lokꞌuk tal ta chꞌen antes te ya xba yichꞌ lajinel ta spisile. Te genteetik ta balmilale te ma nakaluk sbiilik te ba slibroal yuꞌun te kuxlejal desde pas te balmilale, lom cham me ya yaꞌiyik te kꞌalal ya yilik te chanbalam te lom yane, te kuxul ta nail toe, y ma chikanukix, pero ya me chiknaj xan.

⁹ “Ya skꞌan te ay spꞌijil awoꞌtan teme ya akꞌan te ya anaꞌbe sluwar to. Te jukeb sjole jaꞌ xyal te jukeb witstikil te ba nakal ta antse, sok jaꞌ seña te juktul reyetike.

¹⁰ Joꞌtul te reyetik to chꞌayemikix, te jtul xane yichꞌoj yaꞌtel te ora to, y te yane ma to xchiknaj. Pero te kꞌalal ya xtal te últimoe, ma jalukix kꞌaal ya xjalaj.

¹¹ Te chanbalam te lom yan, te kuxul ta nail toe y te ma chikanukixe, jaꞌ te swaxkebal reye. Pero pajal sok te sjuktululik te reyetike, y ya me xbajt ta chꞌayel ta jmel nax.

¹² “Te lajunchꞌix xulbal te la awile, jaꞌ te lajuntul reyetik te mato stam yaꞌtelike. Pero ya me yichꞌ yaꞌtelik junuk ora, jun nax sok te chanbalam te lom yan ta ilele.

¹³ Te lajuntul reyetik to, jun nax akuerdo ayik, y ya yichꞌik ta jkuenta te spoder y te smantal te chanbalam te lom yane.

¹⁴ Ya me yaꞌbe sbaik sok ta skontrainel te Chꞌin Karnerae, pero te Chin Karnerae ya me stsaltalan. Porke jaꞌ stukel Ajwalil yuꞌun te ajwaliletike y Rey yuꞌun te reyetike. Y te machꞌatik ay ta skuentae jaꞌ ikꞌtalanbil y tꞌujtalanbil yuꞌun Dios y jun yoꞌtanik ta stojol —xchi.

¹⁵ Te ángele jich a yalbon euk: —Te jaꞌetik la awile te jaꞌ nakal a te jmulawil antse, jaꞌ seña jtejklumetik, genteetik, y yanetik skꞌop y yanetik nasionetik.

¹⁶ Y te lajuneb xulbal te la awil te ay ta sjol te chanbalam te lom yane, ya me spꞌajik te jmulawil antse. Y ya me sjilesik ta chꞌojel y tꞌaxal ya xjil yuꞌunik. Ya me sweꞌbeyik te stiꞌbalule y ya me xchikꞌik ta kꞌajkꞌ.

¹⁷ Dios la yaꞌbe ta yoꞌtanik te ya spasik tut ya skꞌan yoꞌtan stukel. Ya me spasik akuerdo te reyetik te ya yakꞌ sbaik ta skuenta te chanbalam te lom yane, jaꞌ to teme kꞌot ta pasel te tut yaloj te Diose.

¹⁸ Te ants te la awile jaꞌ seña te mukꞌul jtejklum te ya spas ta mantal te reyetik ta balmilale —xchi.