Apocalipsis 16 - Nuevo Testamento Tzeltal de Amatenango

Te basoetik yuꞌun kastigoe

¹ La kaꞌiy jun tulan kꞌop te xlokꞌ tal teꞌ ba temploe y te la yalbe te jukeb angeletike: —Baanik y malaik ta sba balmilal te jukeb basoetik yuꞌun te tulan kastigo te ya yakꞌ tal te Diose —xꞌutalanot.

² Te primero ángele bajt y ba smal te sbaso ta sba te balmilale. Y ta spisil te gente te yichꞌojbe te smarka te chanbalam te xiꞌbentik sbae y te la yichꞌbeyik ta mukꞌ te slokꞌole, chiknaj yejchenik te kꞌax ma lekuk y lom kꞌux.

³ Te xchebal ángele la smal te sbaso ta sba te mare, y te yaꞌlel mare kꞌajtaj ta chꞌichꞌ jachik tutꞌil xchꞌichꞌel jtul winik te milbile. Y cham spisil te tutik kuxajtik te ba mare.

⁴ Te yoxebal ángele la smal te sbaso ta sba te mukꞌul ukꞌumetike y sok te lokꞌi-jaꞌetike, y laj kꞌajtaj ta chꞌichꞌ.

⁵ Te nax a la kaꞌiy te jich la yal te ángel yuꞌun te jaꞌetike: —Te jaꞌate, Kajwal, te Chꞌul Diosat, te atalel ayat ta namey sok ta ora to, tojat te jich la awakꞌbeyix te kastigoe.

⁶ Porke stukelik la smalbeyik xchꞌichꞌel te machꞌatik aylan awuꞌune, y sok te jꞌalwanejetike. Jich te ora to jaꞌat la awaꞌbe yuchꞌik te chꞌichꞌe, yuꞌun jich mismo ya skꞌan ya xkꞌot ta skuentaik —xchi.

⁷ Jich a kaꞌiy xan te ba altar te jich a yale: —Jich, Kajwal, te Diosat te spisil ya xjuꞌ awuꞌune, jaꞌat la awakꞌix kastigo ta stojil sok batsꞌi jich —xchi.

⁸ Te xchanebal ángele la smal te sbaso ta sba te kꞌajkꞌale, y la yaꞌbe spuersa te kꞌajkꞌale yuꞌun ya xchꞌikꞌ sok kꞌajkꞌ te gentee.

⁹ Y spisilik ayik jilel ta wokol yuꞌun te ben kꞌux te skꞌajkꞌale. Pero ni maꞌ sujtes yoꞌtanik ta stojol Dios, ni maꞌ yalbeyik te slekil skꞌoplale. Sino ke la yalik te tutik la stoyba-kꞌoptayik ta skontrainel te Diose te ya xjuꞌ yuꞌun yakꞌel te tulan wokoletik to.

¹⁰ Te sjoꞌebal ángele la smal te sbaso ta sba te snaktajib te chanbalam te xiꞌbentik sbae. Jich jil ta ijkꞌal kꞌinal te ba ya xmantalaje. Te gentee ya stiꞌtalan yakꞌik yuꞌun te xkꞌuxul swokolike.

¹¹ Pero ni ma jaꞌuk a sjilesik ta spasel a te tut ma lekuke. Sino ke ta skaj te xkꞌuxul swokolike y sok te yejchenike, tutikuk nax a yalik ta stoyba-kꞌoptayel ta skontrainel te Dios te ay ta chꞌulchane.

¹² Te swakebal ángele la smal te sbaso ta sba te mukꞌul ukꞌum Eufratese. Y te yaꞌlel ukꞌume takej yuꞌun ya skꞌaes a te reyetik te ya xlaj lijk tal ta stojil xlokꞌ kꞌajkꞌale.

¹³ La kil te ta stiꞌ te chanbalam te xiꞌbentik sbae sok ta stiꞌ te chanbalam te lom yane y sok ta stiꞌ te palso jꞌalwanejetike, yipal ta lokꞌel oxeb espirituetik te ma lekuke te pajal yilel sok chꞌuchꞌetike.

¹⁴ Jaꞌ espirituetik yuꞌun te pukujetike te ya spasik señailetik sok milagroetik. Y lijkik bael ta stsobel ta spisil te reyetik ta balmilale yuꞌun ya yaꞌbe guerra te jun kꞌaal te lom tulan skꞌoplal yuꞌun te Dios te spisil ya xjuꞌ yuꞌune.

¹⁵ “Aꞌiya awaꞌiyik, te joꞌone ya me xtalon, te ma naꞌbiluk tut orae, te jachik tutꞌil jtul jꞌeleke. Ben tsaꞌam slekil te machꞌa xkuxoj yoꞌtane y sok te slapoj skꞌuꞌ-spakꞌe, yuꞌun ma me tꞌaxaluk a y ma me sta kꞌexlal te ya xꞌilot te tꞌaxale”, xchi te Kajwaltike.

¹⁶ Y te pukujetik la stsobik te reyetik te ba luwar te Armagedon sbiil ta hebreo kꞌope.

¹⁷ Te sjukebal ángele la smal bael te sbasoe ta ikꞌ. Y te ba templo ta chꞌulchane, lokꞌ tal jun tulan kꞌop te teꞌ lijk tal baꞌ ay te mukꞌul naktajibale, y la yal: “Juꞌix ta pasel”, xchi.

¹⁸ Jich xlemlajan lijkel sansewal, xixixet y xpumumet. Y te balmilale nijk ta skaj te tulan jikichabe, te kꞌax ta mas ke ta spisil te tulan jikichabetik te la yakꞌ desde ke ay gente ta balmilale.

¹⁹ Te mam mukꞌul jtejklume oxjajt a lokꞌ a y te mukꞌul jtejklumetik ta balmilale la jim koel. Y te Diose la snaꞌ te mam mukꞌul jtejklum Babiloniae, yuꞌun ya yaꞌbe yuchꞌ te bino yuꞌun te sbaso te nojel ta kastigo yuꞌun te Diose.

²⁰ Spisil te chꞌin luwaretik te joybil ta jaꞌe y sok te witstikile, laj chꞌay bael.

²¹ Y ta chꞌulchan chꞌay tal koel ta sba te gentee mukꞌul bat te kꞌaxem yalal ta kuarenta kiloe. Y te genteetike la yalik tutik la stoyba-kꞌoptay ta skontrainel te Dios yuꞌun te tulan wokol yuꞌun te bate, porke jun tulan kastigo a kꞌot.