Apocalipsis 14 - Nuevo Testamento Tzeltal de Amatenango

Te skꞌayoj te siento kuarenta mil ta jtule

¹ La kil te chꞌin karnerae, te kotol te ba ay te wits Sione. Sjoyinej te siento kuarenta y kuatro mil ta jtul genteetike te yichꞌojlan tsꞌibayel ta stiꞌsbaik te sbiil te Chin Karnera y sok te State.

² Te nax a la kaꞌiy te ay tut ya xkꞌopoj ta chꞌulchan. Jachik tutꞌil skꞌop jun nojel jaꞌ te ya xchꞌay koel ta xchꞌenale, jachik tutꞌil ya xtꞌom jun tulan ay tut xpumumete. Jachik tutꞌil jun skꞌop te bayal arpistaetik te yipalik ta stijel te yarpaike.

³ Y ya skꞌayojinik jun achꞌ kꞌayoj ta stojol te mukꞌul naktajibale y ta stojol te chaneb te tutik kuxajtike y sok te machꞌatik lom mamalikixe. Ni jtuluk machꞌa ya xjuꞌ yuꞌun snopel te kꞌayoj abi sino ke jaꞌ nax te siento kuarenta y kuatro mil ta jtul te machꞌatik kolemikix lokꞌel ta yolil te machꞌatik aylan ta skuenta balmilale.

⁴ Jaꞌ to jaꞌlan te machꞌatik te maꞌ yixlan sbaik sok antstike yuꞌun maꞌyuk tutꞌi spasik sok. Jaꞌ te machꞌatik stsꞌakliyejik te Chꞌin Karnera te bayuk ya xbajte. Laj kolik lokꞌel ta yolil te genteetik jachik tutꞌil primero smajtan Dios y sok yuꞌun te Chꞌin Karnerae.

⁵ Ni maꞌyuk a yalik te le-lot ta stiꞌik, yuꞌun maꞌyuk smulik ta stojol te Diose.

Te tutik skꞌoplal a yal te oxeb angeletike

⁶ La kil jtul xan ángel te ya xwil ta yolil te chꞌulchane, y te yichꞌoj te skꞌoplal kolel sbajtel kꞌinal yuꞌun ya yaltalanbe te machꞌatik kuxajtik ta balmilale. Sok ta spisil te nasionetike, skajalkaj stsꞌumbal, y skꞌopik y jtejklumetik.

⁷ Tulan la yal: “Xiꞌaik te Diose, y albeyaik slekilal. Yuꞌun kꞌotix yorail te stukel ya xꞌichꞌawan jkuentae. Ichꞌaik ta mukꞌ te machꞌa la spas te chꞌulchane y sok te balmilale, te mare, y te slokꞌib jaꞌetike”, xchiik.

⁸ Tsꞌakliyot bael yuꞌun te xchebal ángele, te ya yal: “Jimix, jimix te mukꞌul jtejklum Babiloniae, te la yakꞌ yakubuk ta spisil te nasionetike sok te sbino kꞌoem te la yaꞌbe spas antsiwejele”, xchi.

⁹ Teꞌ nax a tsaklilanot xan yuꞌun te yoxebal ángele te tulan la yale: “Teme ay machꞌa ya yichꞌ ta mukꞌ te chanbalam te xiꞌbentik sbae y sok te slokꞌole, y teme ya yichꞌbe te smarka ta stiꞌsbae o ta skꞌabe,

¹⁰ ya me yichꞌ te tulan kastigo yuꞌun Dios, te jich chapalix te maꞌyuk skꞌap te ayix ta yawil yuꞌun te kastigo yuꞌun Diose. Y ya me xꞌaꞌbot kꞌaxuk bayal swokolik ta kꞌajkꞌ y sok asufre ta stojol te chꞌul angeletik y sok te Chꞌin Karnerae.

¹¹ Te xchꞌailel te swokolike ya xmo bael ta sbajtel kꞌinal. Y ni maꞌyukix kuxo-oꞌtan a ta kꞌajkꞌal ajkꞌubal yuꞌun te machꞌatik ya yichꞌik ta mukꞌ te chanbalam te xiꞌbentik sbae y sok te slokꞌole, y sok te yichꞌojbeyik smarka ta skuentae.

¹² Jaꞌ yuꞌun te machꞌatik yuꞌunik te Diose sok te machꞌatik ya xchꞌuunbeyik te mantaliletik yuꞌun y te sigue jun yoꞌtanik ta stojol te Jesuse, ya skꞌan te ayuk yip yoꞌtanike.

¹³ Jicha kaꞌiy jun xan kꞌop ta chꞌulchan te jich a yalbone: —Tsꞌibaya ta jun to: “Ben tsaꞌam slekil te ora to sok ta patil bael te machꞌatik ya xchamik ta skuenta te Kajwaltike —xchi. Sok la yal te Espiritue: —Ya me xkux yoꞌtanik yuꞌun te yaꞌtelike, sok ya me xꞌichꞌbot jkuenta yuꞌun te tut spasoje.

Te kosecha yuꞌun te balmilale

¹⁴ La kil y la jta ta ilel jun sakil tokal, y ta sba te tokale, teꞌ nakal jtul te pajal sok gente yilele. Yichꞌoj jun skorona oro ta sjol y yichꞌoj ta skꞌab jun luk te beno yee.

¹⁵ Y lokꞌ tal ta templo jtul xan ángel, xꞌawet tal ta tulan kꞌop te machꞌa nakal ta tokale. Jich a yal: “Ochan ta aꞌtel sok te aluk awichꞌoje y tsoꞌba te kosecha ta balmilale. Porke la staix yorail, yuꞌun yijubix te kosecha ta balmilale”, xchi.

¹⁶ Te machꞌa nakal ta tokale la yotses te smam luk ta balmilal y la stsob te kosecha te ay ta balmilale.

¹⁷ Te nax a, jtul ángel lokꞌ tal te ba templo te ay ta chꞌulchane. Jich yichꞌoj euk jun mam luk te beno yee.

¹⁸ Y te ba altare lokꞌ xan tal jtul ángel te yichꞌoj yaꞌtel yuꞌun skuenta kꞌajkꞌ. Y tulan a yawutay te machꞌa yichꞌoj te mam luk te beno yee. Jich la yalbey: “Otsesa te aluk te beno yee, y kꞌoka a te palajtik te ubailtik te ay ta balmilal, porke te yubailtike ben yijikix”, xchi.

¹⁹ Te ángele la skꞌaes te sluk ta balmilale y la stuy te ubailtik te tsꞌunbil ta balmilale. Y te nax a la yotses te ba smam kꞌejil yuꞌun te ya spitsꞌbot a te yaꞌlele. Jaꞌ to jaꞌ xyal te tutꞌil ya yakꞌ tulan kastigo te Diose.

²⁰ Te ubaetike la yichꞌtalan pitsꞌel ta stiꞌil te mukꞌul jtejklume y te ba smam kꞌejile lokꞌ tal chꞌichꞌ. Te stoylejal te chꞌichꞌe kꞌot te ba spreno te kawuetike sok pamaj bael tresientos kilometro.