Apocalipsis 13 - Nuevo Testamento Tzeltal de Amatenango

Te cheb chanbalametik te xiꞌbentik sbae

¹ Te mukꞌul chan ba stejkꞌan sba ta stiꞌil te mare. Sok la kil lokꞌ tal ta mar jkojt chanbalam te xiꞌbentik sbae te ay jukeb sjol y lajuneb xulbal. Ta juju-chꞌix te xulbale ay jujun skorona, y ta jujun te sjole ay sbiilik ta stoybakꞌoptayel ta skontrainel te Diose.

² Te chanbalam to te lom xiꞌbentik sba te la kile, pajal sok yilel te jkojt leopardoe. Te yok skꞌabe jachik tutꞌil yok skꞌab oso, y te stiꞌe jachik tutꞌil stiꞌ choj. Te mukꞌul chan la yaꞌbe spoder y sok snaktajib y bayal yaꞌtel.

³ Jun ta sjol te chanbalame yichꞌoj jun ejchen te ya xcham yuꞌun yilele. Pero te ejchene lekubenix. Spisil te machꞌatik ayik ta balmilale kꞌax lom yan a yilik, y la stsꞌakliyik bael te chanbalam te lom xiꞌbentik sbae.

⁴ La yichꞌik ta mukꞌ te mukꞌul chan, yuꞌun jaꞌ la yaꞌbe yaꞌtel te chanbalam te xiꞌbentik sbae, sok la yichꞌik ta mukꞌ euk te chanbalame. La yalik: “¿Machꞌa me pajal sok te chanbalam to te xibꞌentik sbae, y machꞌa kꞌan yaꞌbe sba sok ta skontrainel?” xchiik.

⁵ Jich a aꞌbot xan permiso te chanbalam ta stoyba-kꞌoptayel ta skontrainel te Diose, sok aꞌbot yaꞌtel te ya xjalaj kuarenta y dos ue.

⁶ Y jich jajch skontrain te Diose, y la skontra-kꞌoptay Dios sok te templo yuꞌune y sok te machꞌatik te ayik ta chꞌulchane.

⁷ Jicha aꞌbot xan permiso te ya yaꞌbe sba sok guerra ta skontrainel te machꞌatik yuꞌunik te Diose asta ya stsaltalan. Y aꞌbot yaꞌtel ta stojol spisil ta skajalkaj stsꞌumbal te gentee ta jujun jtejklum, ta skajalkaj skꞌopik, sok ta yanetik nasionetik.

⁸ Te chanbalam to te xiꞌbentik sbae ichꞌot ta jkuenta yuꞌun spisil te machꞌatik ayik ta balmilale. Jaꞌ te machꞌatik ma tsꞌibabiluk sbiilik ta sjunal kuxlejal yuꞌun te Chꞌin Karnera te la yichꞌ milele. Te sjunal kuxlejale, jaꞌ te jun te la yichꞌ tsꞌibayel desde pas te balmilale.

⁹ Te machꞌa ay xchikinike, a me yaꞌiy:

¹⁰ Te machꞌatik ay ta skuenta ya yichꞌ chukele, ya me xbajtik ta chukel. Sok te machꞌatik ay ta skuenta ya yichꞌ milel ta puñal, ya me yichꞌ milel ta puñal”, xchi. Jaꞌ yuꞌun, te machꞌatik yuꞌunik te Diose, ya me skꞌan te ayuk spuersa yoꞌtan sok te junuk me yoꞌtan xchꞌuunej te Diose.

¹¹ Ta patil la kil jkojt xan chambalam te xiꞌbenik sbae te lokꞌ tal ta lume. Ay cheb xulbal te pajal sok yuꞌun karnerae, pero jich kꞌopoj tutꞌil mukꞌul chan te xiꞌbentik sba ta ilele.

¹² Jaꞌ la spas te tutꞌil ay yaꞌtel te primero chanbalam te xiꞌbentik sba te ay ta skuentae. Y jich la yakꞌ te yakuk yichꞌik ta mukꞌ te primero chanbalam spisil te machꞌatik te kuxajtik ta balmilale. Jaꞌ mismo te chanbalam te lekuben yejchen te jich yilel te ya xcham yuꞌune.

¹³ Sok ya spas mukꞌul señailetik milagroetik, asta ta sit te gentee ya xtꞌuxan ta koel kꞌajkꞌ ta chꞌulchan ya xjul ta balmilal.

¹⁴ Y ta skuenta te tutꞌil ay señaetike te jich ya xꞌaꞌbot spas ta stojol te primero chanbalam te xiꞌbentik sbae, la sloꞌlay te machꞌatik aylan ta balmilale. Sok la spastalan ta mantal te ya spasbeyik jun slokꞌol te chanbalam te xiꞌbentik sbae te la yichꞌ ejchꞌentesel ta puñal te ma ba cham yuꞌune.

¹⁵ Y te xchebal chanbalam te xiꞌbentik sbae aꞌbot spoder te ya yaꞌbe xkuxlejal te slokꞌol primero chanbalam te xiꞌbentik sbae. Yuꞌun te slokꞌol abi ya me xkꞌopoj, y ya me smil spisil te machꞌatik ma xyichꞌik ta mukꞌe.

¹⁶ Sok la yal mantal te ya yakꞌtalanbe jun marka ta sbatsꞌil kꞌab o ta stiꞌsba ta spisilik, ta chꞌin ta mukꞌ, ta jkꞌulejetik y ta meꞌbaetik, ta libre aylan o ayik ta mosoil.

¹⁷ Y ni jtuluk ya xjuꞌ xmanba ni ya xchonba teme maꞌyuk yichꞌoj te marka ta skuenta te chanbalam te xiꞌbentik sbae, o te yajtalul te sbiile.

¹⁸ Jaꞌ yajtalul to ya skꞌan te ay jpꞌijiltik ta snaꞌele. Te machꞌa ya yaꞌibe sluwarile, ichꞌa jkuenta te yajtalul te chanbalam te xiꞌbentik sbae, ja te jun yajtalul gentee. Te yajtalul abi, jaꞌ te seisiento sesenta y seis.