Apocalipsis 12 - Nuevo Testamento Tzeltal de Amatenango

Te antse y sok te mukꞌul chan te xiꞌbentik sbae

¹ Chiknaj ta chꞌulchan jun mukꞌul señail: jaꞌ te jtul ants pixbil ta kꞌajkꞌal jachik tutꞌil jun kꞌuꞌul-pakꞌal. Te yoke stekꞌtajibinej te ue, y te ba sjole yichꞌoj jun korona sok lajchayeb ekꞌetik.

² Te antse ay tut staoj, y xꞌawet yuꞌun xkꞌuxul te swokole, yuꞌun ay swokol te ya xpajt yoꞌtane.

³ Te nax a chiknaj ta chꞌulchan jun xan señail: jun mam mukꞌul chan te xiꞌbentik sbae. Tsaj te skolorile sok ay jukeb sjol, lajuneb xulbal, y jujun skorona te jujun sjole.

⁴ Sok te snee la smes xejtꞌ ta yoxxejtꞌel te ekꞌetik ta chꞌulchan y la xchꞌoj koel ta sba balmilal. Te mukꞌul chane la stejkꞌan sba ta stojol te ants te ya xpajtix yoꞌtan ae, yuꞌun ya stiꞌbey ta ora te kꞌalal ya xꞌayin te xchꞌin yale.

⁵ Te antse pajt yoꞌtan, kerem te xchꞌin yale, jaꞌ te ya sjapuy ta spisil te nasionetik sok te sbaston takꞌine. Pero te xchꞌin yale ikꞌot bael ta stojol Dios te ba ay te smukꞌul naktajibale.

⁶ Te antse lokꞌ bael ta anel kꞌalal ta jojchol tꞌantꞌan luwar, te ba ay jun luwar chapal yuꞌun te Diose. Yuꞌun teꞌ ba smakꞌlin a te ya xjalaj mil dosiento sesenta kꞌaal.

⁷ Ta patil ay jajch tulan pleto ta chꞌulchan. Te jMiguel y sok te angeletik yuꞌune la yaꞌbe sbaik sok te mukꞌul chan te xiꞌbentik sbae. Te mukꞌul chan y sok te angeletik yuꞌune la yaꞌbe sbaik soke,

⁸ maꞌ juꞌ yuꞌunik stsalel y maꞌ staix sluwarik a te ba chꞌulchane.

⁹ Jich a yichꞌik chꞌojel lokꞌel te mukꞌul chane. Jaꞌ te antibo chan te pukuj sbiil, sok Satanas sbiil ekꞌa. Jaꞌ te ya sloꞌlay spisil te genteetik ta balmilale. Te pukuje y sok te angeletik yuꞌune chꞌojtalanot tal koel ta balmilal.

¹⁰ Jich a kaꞌiy jun tulan kꞌop ta chꞌulchan, te ya yale: “Te ora to la staix yorail kolel yuꞌun te Kajwaltik Diose. Ay spoder y jaꞌ ayix ta ajwalil, y sok ayix yaꞌtel te Cristo yuꞌune. Porke la yichꞌix chꞌojel lokꞌel te machꞌa ya sleulanbe smul te kermanotaktike ta stojol Dios kuꞌuntik ta kꞌajkꞌal ajkꞌubal.

¹¹ Te kermanotaktike la tsalikix jilel ta skuenta xchꞌichꞌel te la smal te Chꞌin Karnerae, y sok ta skuenta te skꞌop Dios te la yalik ta jamale. Maꞌ xiꞌik yuꞌun teme ya xlaj xkuxlejalik aye, sino ke spꞌejel yoꞌtanik la yakꞌ sbaik ta milel.

¹² Jaꞌ yuꞌun kontentoukex me te jaꞌex te kuxajtikex te ba chꞌulchane. Pero oꞌol me sbaik te machꞌatik kuxajtik ta balmilale y sok ta mare. Porke te pukuje, te lom ilineme, snaꞌoj te ma jalukix ay skꞌaalel, sok koem tal te ya skontrainex”, xchi.

¹³ Te kꞌalal la yil te mukꞌul chan te chꞌojot tal koel ta balmilale, la snuts te ants te ay ayinem te xchꞌin kereme.

¹⁴ Pero te antse aꞌbot cheb smamki xikꞌ te xike, yuꞌun ya spas xwil bael a te ba ay sluwar ta jojchol tꞌantꞌan kꞌinal te ya xjakalej bael te ba ay te chane. Teꞌ ya xmakꞌlintesot a te ya xjalaj oxeb jaꞌbil sok olile.

¹⁵ Te chane la xchꞌoj lokꞌel jaꞌ ta stiꞌ yuꞌun ya skꞌajtates ta mukꞌul ukꞌum yuꞌun ya xbajt ta jaꞌa te antse.

¹⁶ Pero te lume la skoltay te antse. Yuꞌun te lume la sjam te stiꞌe, y la yuchꞌ koel te mukꞌul ukꞌum te xchꞌojoj lokꞌel ta stiꞌ te mukꞌul chan te xiꞌbentik sba ta ilele.

¹⁷ Jich mas a ilin te mukꞌul chan ta skontrainel te antse, y ba yaꞌbe sba sok ta skontrainel te jayeb xan stsꞌumbal jilem te antse. Jaꞌ te machꞌatik ya xchꞌuunbeyik te mantaliletik yuꞌun te Diose, y sigue ben jun yoꞌtanik sok te tut batsꞌi jich yaloj te Jesucristoe.