Apocalipsis 10 - Nuevo Testamento Tzeltal de Amatenango

Te ángel te yichꞌoj te chꞌin balbil june

¹ La kil jtul xan ángel te beno spodere te yipal tal ta koel ta chꞌuchan. Potsol tal ta tokal, sok ay xojob ta sjol. Te yelawe xlemet jachik tutꞌil kꞌajkꞌal, y te yoke pajal sok mukꞌul xutun teꞌ te chik joman nax skꞌajkꞌale.

² Yichꞌoj ta skꞌab jun chꞌin balbil jun te xlechoje. La yakꞌ ta mar te sbatsꞌil yoke, y te xkꞌexome ay jil ta lum.

³ Tulan a kꞌopoj, jachik tutꞌil ya xꞌawun jkojt choj, y te kꞌalal xꞌawete, jukeb xpumlajan bael ta sjoylejal a kaꞌiy te skꞌope.

⁴ Ta patil te kꞌopoj te jukeb xpumlajan baele, te joꞌon kꞌan jtsꞌibay te tut la yalike. Pero ay a kaꞌiy jun kꞌop ta chꞌulchan te jich a yalbone: —Kꞌeja me ta awoꞌtan te tutiꞌ yalik te jukeb xpumlajan baele y ma me atsꞌibay —xyuton.

⁵ Jich te ángel te la kil te tekꞌel ta sba te mare y sok ta lume, la stoy moel ta chꞌulchan te sbatsꞌil kꞌabe.

⁶ Y la yal ta jamal ta stojol te Machꞌa kuxul ta sbajtel kꞌinale te la spas chꞌulchan, balmilal, sok mar, y ta spisil te tutik aylan aye. La yal: “Maꞌyukix jal tiempo.

⁷ Yuꞌun te kꞌalal ya sta stiempoal te ya xlijk yokꞌesin te skornetae te sjukebal ángele, ya xkꞌot ta pasel a te tut mukul snopoj ta yoꞌtan te Diose, jachik tutꞌil yaloj te jꞌaꞌteletik yuꞌune, jaꞌ te jꞌalwanejetike”, xchi.

⁸ Te machꞌa kꞌopoj tal ta chꞌulchan a kaꞌiye, tal xan skꞌoponon, y la yalbon: —Baan y ichꞌa te chꞌin balbil jun te lechel te yichꞌoj ta skꞌab te ángel te tekꞌel ta mar y ta sba te lume —xyuton.

⁹ Boon te ba ay te ángele y la jkꞌanbe te yauk yaꞌbon te chꞌin balbil june. La yalbon: —Ichꞌa sok weꞌa. Te ba atiꞌe chiꞌ me ya yaꞌiy jachik tutꞌil chab. Pero te ya xkꞌot ta achꞌujte, chꞌa me ya xkꞌajta —xchi.

¹⁰ La kichꞌ te chꞌin balbil jun te ay ta skꞌab te ángele y la jweꞌ, y te jtiꞌe chiꞌ a yaꞌiy jachik tutꞌil chab. Pero te kꞌalal la jweꞌe, chꞌaub ta jchꞌujt.

¹¹ Jich a yalbikon: —Puersa ya xba awal xan te tut ya yal Dios te tutꞌil ay skꞌoplal te bayal jtejklumetike, nasionetik, te skajalskaj xkꞌopoje, sok reyetik —xyuton.