Apocalipsis 1 - Nuevo Testamento Tzeltal de Amatenango

Te tut yakꞌ ta ilel te Jesucristoe

¹ Jaꞌ to jaꞌ te la yakꞌ ta ilel Dios ta stojol te Jesucristoe, yuꞌun jaꞌ ya yaꞌbe snaꞌik te yaj-aꞌteltak te tutik ya xkꞌot ta pasel ta ora nax. Te Jesucristo la stikon bael te ángel, yuꞌun ya yaꞌbe snaꞌ te yaj-aꞌtele, jaꞌ te Juane.

² Te Juane la yalix ta jamal ta spisil te tut la yile. Jaꞌ stukel testigo yuꞌun te skꞌop Dios y sok te tut ya yal te Jesucristoe.

³ Ben tsaꞌam slekil te machꞌa ya yil te jun to, y ben tsaꞌam slekil te machꞌatik ya yaꞌiyik te tut yaloj te Diose, y te ya skꞌej ta yoꞌtanik te tut tsꞌibabil liye porke xnopetix tal te tiempoe.

Te Juane la stsꞌibabey te juktijkꞌ hermanoetike

⁴ Joꞌon Juanon, ya jtsꞌibabey te juktijkꞌ hermanoetik te aylan ta estado Asia. Ichꞌbeyaik te slekil yoꞌtan y te butsꞌan kꞌinal yuꞌun te Machꞌa stalel aye, sok te stalel ay ta namey, sok te stalel ay sbajtel kꞌinal. Y sok euk te jukeb espirituetik te aylan ta sit te ba ay te smukꞌul naktajibe,

⁵ y sok euk te Jesucristoe, te jun yoꞌtan ay ta testigoe. Jaꞌ stukel primero a chaꞌkux tal te ba animaetike, y yichꞌoj tulan yaꞌtel te mas mukꞌ ay yuꞌun te ajwaliletik ta balmilale. Kꞌuxotik ta yoꞌtan te Cristoe, sok la yakꞌotikix ta libre yuꞌun te jmultik te la smal te xchꞌichꞌele.

⁶ Y la yakꞌotikix ta ajwalil, sok la yakꞌotik ta saserdoteil ta abatinel yuꞌun te Dios te State. Te stukel ben tsaꞌam slekil sok yichꞌoj tulan yaꞌtel ta ora to y ta sbajtel kꞌinal. Jichuk.

⁷ ¡Ila me awilik, te Cristoe ya me xtal ta tokal! Ta spisilik ya me yilik ta sitik, sok euk te machꞌatik la slowike. Y ta spisil te jtejklumetik ta balmilale ya me yokꞌetaylan sbaik ta stojol. Jichuk me xkꞌot ta pasel. Jichuk.

⁸ “Joꞌon ayon ta slijkibal y sok ta slajibal”, xchi te Kajwaltike te spisil ya xjuꞌ yuꞌune, te stalel aye, sok te stalel ay ta namey, sok te stalel ay ta sbajtel kꞌinal.

Ay tutiꞌ yakꞌ ta ilel ben tsaꞌam te Cristoe

⁹ Joꞌon Juanon, joꞌon awermanoikon te pajal ay ta jkuentatik te wokole sok te pajal ay ta jkuentatik te ya joyintik ta ajwalil te Cristoe, sok te pajal ya yaꞌbotik jpuersatik te ya xkujch kuꞌuntik te wokoletike. Liꞌ aꞌbilon ba chꞌin luwar Patmos sbiil te joybil ta mare, jaꞌ ta skaj te yipalon ta yalel te skꞌop Diose te jamal ya yakꞌ ta naꞌbeyel sluwar te Jesuse.

¹⁰ Y kꞌot ta pasel jun kꞌaal yuꞌun te Kajwaltike la sjapuyon ta spoder te Espiritue, y la kaꞌiy a kꞌopoj tal ta jpat jun tulan kꞌop, jachik tutꞌil ya xꞌokꞌ korneta,

¹¹ te la yalbone: —Tsꞌibaya ta jun libro te tut ya awile, y tikonbeya bael te juktijkꞌ hermanoetik te aylan ta estado Asiae: Ta Efeso, ta Esmirna, ta Pergamo, ta Tiatira, ta Sardis, ta Filadelfia, y ta Laodicea —xchi.

¹² Sujt jkꞌeluy yuꞌun ya kil machꞌa skꞌop te ya skꞌoponone, y teꞌ la kil jukchꞌix yawil kꞌajkꞌ te puru oroe.

¹³ Y te ba yolil te jukchꞌix yawil kꞌajkꞌe la kil ay Machꞌa teꞌey a te pajal sok te Nichꞌanile. Palal sok jun skꞌuꞌ-spakꞌ te kꞌoem kꞌalal ta yoke y sok jun xchꞌujkil xchꞌujt pasbil ta oro kꞌoem kꞌalal ta stiꞌ yoꞌtan.

¹⁴ Te stsotsil sjole ben sak jachik tutꞌil tsots te ben sake, o jachik tutꞌil te bate. Y te site pajal sok yat kꞌajkꞌ.

¹⁵ Te yoke xlemet jachik tutꞌil bronse-takꞌin te pasbilix tal ta kꞌajkꞌe. Y te skꞌope kꞌax lom tulan jachik tutꞌil skꞌop jaꞌ te lom bayale.

¹⁶ Te ba sbatsꞌil kꞌabe yichꞌoj jukeb ekꞌetik, y te ba stiꞌe ya xlokꞌ tal jun puñal te chaꞌmejchꞌ yee. Te yelawe jachik tutꞌil kꞌajkꞌal te kꞌalal ya xtil sok te ya yichꞌ spuersae.

¹⁷ Te kꞌalal la kile, tꞌuxajon koel ta yok, jachik a kꞌoon te tutꞌil machꞌa chamenixe. Pero jaꞌ la yakꞌ tal sbatsꞌil kꞌab ta jtojol, sok la yalbon: —Ma me xiꞌan. Joꞌon ayon ta slijkibal y sok ta slajibal.

¹⁸ Jtalel kuxulon. Chamon, pero te ora to kuxulonix sbajtel kꞌinal. Joꞌon kichꞌojbe te syaweal te lajele y sok te yawil te ba ya stsobot te animaetike.

¹⁹ Tsꞌibaya te tutik la awile sok te tut ay ta ora to y sok te tut ay ta patile.

²⁰ Jaꞌ to jaꞌ skꞌoplal te jukeb ekꞌetik te la awil te ay ta jbatsꞌil kꞌabe, y sok te jukchꞌix yawil kꞌajkꞌ te pasbil ta oroe. Te jukeb ekꞌetike jaꞌ xyal te juktul angeletik ta stojol te juktijkꞌ hermanoetike. Y te jukchꞌix yawil kꞌajkꞌe jaꞌ xyal te juktijkꞌ hermanoetike —xchi.