3 Juan 1 - Nuevo Testamento Tzeltal de Amatenango

Spajtil-oꞌtanil yuꞌun te jGayoe

¹ Joꞌon te ansianoone, ya jtsꞌibay te karta to jaꞌ yuꞌun te kamigo jGayoe te batsꞌi ben kꞌux ya kil jba soke.

² Hermano te ben kꞌuxat ta koꞌtane, ya jkꞌanbe te Diose te lek ayat sok spisil te tut ya apase, sok te lekuk ayat sok te atꞌbalule, y sok te lek ayat ta stojol Dios.

³ Ben bayal sbujtsꞌ koꞌtan te kꞌalal ay hermanoetik a laj tal y la yalbikon te batsꞌi ben jun awoꞌtane.

⁴ Maꞌyuk yan te tut ben jun koꞌtan yuꞌune, jich tutꞌil te ya kaꞌiy te jich aylan tutꞌil ya yal te tut batsꞌi jiche te kuntikile.

⁵ Kermano te ben kꞌuxat ta koꞌtane, jaꞌ lek te jun awoꞌtan awakꞌoj aba ta abatinel yuꞌun spisil te hermanoetike. Sok mas to xan yuꞌun te machꞌatik ya xtal ta yanetik luware.

⁶ Jaꞌ a yalikix ta stojol te jtijkꞌ hermanoetik te tutꞌil la akꞌuxutaye. Awokoluk, koltaylana me te tut puersa yuꞌun te sigue ya xbeenik baele, jich tutꞌil lek ya yil te Diose.

⁷ Yuꞌun ayik ta abatinel ta beel yuꞌun te Jesucristoe, y maꞌyuk a skꞌanbeyik chꞌinuk koltayel te gente te ma xchꞌuunejuk Diose.

⁸ Jaꞌ yuꞌun te joꞌotike ya skꞌan ya jkuentaintik skoltayel, yuꞌun ya jkoltatik ta yalel te tut batsꞌi jiche.

Te tut ma lekuk a spas te Diotrefese

⁹ Joꞌon a jtsꞌibay jun karta ta stojol te jtijk hermanoetike te ba ayate, pero te Diotrefese maꞌ yakꞌ ta jkuenta te ay kichꞌoj kꞌatele, porke la skꞌupin te stukel ya xꞌakꞌot ta jkuentae.

¹⁰ Jaꞌ yuꞌun te kꞌalal ya xtalone, ya me kalbe ta jamal te tut ma tsaꞌamuk ya spase. Yuꞌun ya yaltalan kꞌael jontol kꞌop aꞌbiyej sok le-lot te skontrainejotike. Sok ay to xan yan te tut ya spase: Jaꞌ te ma skꞌan xyikꞌ te hermanoetik te ya xlaj kꞌote. Sok ya skomtalan te machꞌatik ya skꞌan ya yikꞌike, y ya stentalan lokꞌel te ba ay te hermanoetike.

¹¹ Hermano te kꞌuxat ta koꞌtane, ma me jaꞌuk xꞌatsꞌakliy te tut ma lekuk ya spase; jaꞌuk me xꞌatsꞌakliy te tutik leke. Te machꞌa lek te tut ya spase, jaꞌ yuꞌun te Diose; pero te machꞌa ya spas te tut ma lekuke, yuꞌun ma snaꞌbe sba te Diose.

Te lekil ejemplo yuꞌun te jDemetrioe

¹² Spisilik lek skꞌoplal yuꞌunik te jDemetrioe, yuꞌun jaꞌ ya yal te tut batsꞌi jiche. Y jich euk te joꞌotike ya kaltik te lek akꞌoplalike, y te jaꞌate anaꞌoj te jaꞌ ya kaltik te tut batsꞌi jiche.

Kꞌopetik ta slajibal

¹³ Te joꞌone bayal tut ya jkꞌan kalbeyat, pero ma jkꞌan te ya jtsꞌibabeyat ta june.

¹⁴ Porke jnopoj te ya xtal kilat ta orae y ya xkꞌopojotik ta personal.

¹⁵ Butsꞌanuk me kꞌinal ya awaꞌi. Te awamigotake ya stikonbeyat spajtil awoꞌtan. Awokoluk, albon xkoltanuk ta juju-tul te kamigotaktike.