2 Timoteo 4 - Nuevo Testamento Tzeltal de Amatenango

¹ Tulan ya kalbeyat ta stojol te Diose y sok te Cristo Jesuse, te jich ya xtal tutꞌil rey ta yichꞌel jkꞌuenta te machꞌatik kuxajtik y sok te machꞌatik chamenike.

² Jaꞌ ya kalbeyat te ya awal te skꞌop Diose ta bayuk sok ta tutikuk nax ora. Junuk awoꞌtan stsitsawanat, sok komaw, sok aꞌbeya spuersa yoꞌtanik.

³ Porke ya sta stiempo te genteetike ma me skꞌan xyaꞌiyik te lekil nojpesele. Yuꞌun te tut ya skꞌan yoꞌtanike, ya sleik bayal maestroetik te jaꞌ nax ya snojpeslanot te tut ya skꞌan yaꞌiyik stukelike.

⁴ Ya yakꞌik jilel ta spatik te tut batsꞌi jiche y jaꞌ ya yakꞌ ta jkuenta ta spisil ta jkaj te kuentoetike.

⁵ Pero te jaꞌate, pꞌij me xꞌanat sil tiempo. Kujchuk me awuꞌun te wokoletike. Aꞌtelina me yalel te skꞌoplal kolele. Juꞌutesa me lek te awꞌatele.

⁶ Te joꞌone yipalonix ta malel jchꞌichꞌel jich tutꞌil smajtan Dios, yuꞌun ya xtijilajix tal yorail te ya xlajone.

⁷ Juꞌix kuꞌun te lekil tsalawe. Kꞌoonix te ba ay ya xꞌanimajon baele. Jun koꞌtan jchꞌuunej te Diose.

⁸ Te ora to jaꞌ xanix ya jmaliy te jkorona te yuꞌun toj aꞌanon ta balmilale, te jaꞌ ya yaꞌbon te Kajwaltik te tut ora ya sta skꞌaale, yuꞌun toj ya smeltsaanwan stukel. Y ma joꞌukon nax ya yaꞌbon, sino ke jich ya yaꞌbey ta spisil te machꞌatik sok slekil yoꞌtan ya smaliyik te ya xchaꞌtal xane.

Te tut ya skꞌan spas te jTimoteoe

⁹ Pasa puersa te ya xtal awilone.

¹⁰ Yuꞌun te jDemase, jaꞌ bikꞌtajix yoꞌtan yuꞌun te tutik skuenta te balmilal to. La sjilesonix y bajtix ta Tesalónica. Te Crescentee bajtix ta estado yuꞌun Galacia, y te jTitoe bajt ta Dalmacia.

¹¹ Jaꞌ xanix te jLucas te liꞌ sjoyinejone. Lea tal te jMarcose sok ikꞌa tal, porke ya xjuꞌ ya skoltayon yuꞌun te aꞌtele.

¹² Te jTiquicoe la jtikonix bael ta Efeso.

¹³ Te kꞌalal ya xtalate, ichꞌbon tal te jnajtꞌil koton te la jiles ta Troas ta sna te jCarpoe. Ichꞌbon tal euk te junetike, y sok te sbalil junetik te tulan skꞌoplal ta koꞌtane.

¹⁴ Te jꞌAlejandro te jten-takꞌine, lom ilbaj ya yilon. Ja me ya xꞌaꞌbot stoj yuꞌun Kajwaltik te tut spasojbone.

¹⁵ Te jaꞌate, ila me aba yuꞌun, porke lom skontrainej te tut ya kalbetik skꞌoplale.

¹⁶ Te primero a stejkꞌanelon ta sit jꞌuꞌeletike, maꞌyuk machꞌa a skoltayon. Spisilik a sjilesikon. Manchuk jaꞌuk ya xꞌaꞌbot smulinik yuꞌun Dios.

¹⁷ Pero te Kajwaltike la skoltayon y la yaꞌbon jpuersa. Jich a juꞌ kuꞌun yalel te skꞌoplal kolele, y jich a yaꞌiyik spisil te genteetike. Jich te Kajwaltike la skoltayon te ba ay chojetik te ya xtiꞌawane.

¹⁸ Y jaꞌ ya skoltayon ta spisil te tut ma lekuke y ya me skanantayon jaꞌ to teme ya yikꞌon te ba ay ta ajwalinel ta chꞌulchane. Ay slekilal stukel sbajtel kꞌinal. Jichuk.

Spajtil-oꞌtanil y bendision ta slajibal

¹⁹ Albon xkoltanuk te Prisca sok te Aquilae y sok te machꞌatik ay yuꞌun te Onesiforoe.

²⁰ Te jꞌErastoe jil ta Corinto y te jTrofimoe la jiles ta Mileto yuꞌun tabil ta chamel.

²¹ Juꞌuk me awuꞌun te ya xtalat ta orae, antes te ya sta yorail te skomil kꞌaale. Ya stikonbeyat spajtil awoꞌtanik te Eubuloe sok te Pudentee, sok te Lino, sok xClaudia y ta spisil te hermanoetike.

²² Te Kajwaltik Jesucristoe a me sjoyinat y te Diose a me yaꞌbeyex te slekil yoꞌtan ta apisilik te jaꞌexe. Jichuk.