2 Timoteo 3 - Nuevo Testamento Tzeltal de Amatenango

Tut yilel te genteetik ta slajibal kꞌaale

¹ Ya skꞌan ya anaꞌ te ta slajibal kꞌaale ya me sta skꞌaalel te lom yanetike.

² Te winketike stukel nax lek ya skꞌan sbaik, sok ya me xbikꞌtaj yoꞌtanik yuꞌun te takꞌine, sok ya me stoy sbaik y lom mukꞌ me ya yakꞌ sbaik. Ya me stoyba-kꞌoptayik te Diose, sok ma xchꞌuunbe smantal smeꞌ-statik. Ma me snaꞌik yalel kola yal y maꞌyuk tut ya xchꞌuunik.

³ Maꞌyuk skꞌuxul yoꞌtanik, ni slekil yoꞌtanik. Tojolik le-kꞌop, ma snaꞌ tutꞌil ya skom sbaik, lom jꞌilbajinwanejetik, y skontrainejik spisil te tut leke.

⁴ Ya xꞌakꞌawanik entregal, y ma kuidadouk ay, sok nojel ta yoꞌtanik te toybaile. Jaꞌ ya sleik te tut ya skꞌan stukelik en luwar te ya sleik te Diose.

⁵ Batsꞌi xchꞌuunejik Dios yilel pero jaꞌ ya xchiknaj a ta skuenta te tut ya spasik te maꞌyuk spoder te sreligione. Ma me xꞌachꞌik aba a sok te genteetik te jich aye.

⁶ Porke te stukelike jaꞌ ya xꞌochik ta nantike, y ya sloꞌlayik te bol antstik te nojelik ta mulil te jaꞌ ya xꞌikꞌot bael ta spasel spisil te tut ya skꞌan yoꞌtanike.

⁷ Sil tiempo yipalik ta snopel, pero maꞌyuk tut ora ya snopik te tut batsꞌi jiche.

⁸ Y jich tutꞌil te Janes y Jambres te la spaj sba sok te jMoisese, jich ekꞌa te genteetik abi skontrainejik te tut batsꞌi jiche. Jaꞌ te winketik te ma tsaꞌamuk spensarike te ma snaꞌik tutꞌil ay ta chꞌuunel te Diose.

⁹ Pero ma xjuꞌ yuꞌunik ta mas, porke ta sitil komon ya xchiknaj te maꞌyuk tut ya snaꞌike. Pajal sok te tutiꞌ spasik te chaꞌtul te la spaj sba sok te jMoisese.

Slajibal pꞌijutesel yuꞌun jPablo ta stojol jTimoteo

¹⁰ Pero te jaꞌate, la achꞌuunix te tutiꞌ jnojpesate. Awilojix te tutꞌil kuxulone sok ya anaꞌ te tut mukꞌ skꞌoplal ta koꞌtane. Awilojix te xchꞌuunel koꞌtane sok te ya stsꞌijk kuꞌune, sok te skꞌuxul koꞌtane, sok te tutꞌil ya xkujch kuꞌune,

¹¹ sok te ikꞌtinele y sok te wokoletike. Anaꞌoj spisil te tutiꞌ spasbelon ta Antioquia, ta Iconio y ta Listra sok te ikꞌtinel te kꞌax jwokol yuꞌune. Pero te Kajwaltike la yakꞌon ta libre ta spisil.

¹² Batsꞌi jich ta spisil te machꞌatik ya skꞌan xlekub xkuxlejal sok te Cristo Jesuse, ya me xkꞌax swokol ta ikꞌtinel.

¹³ Pero te machꞌatik ma lekikuke y sok te jloꞌlawanejetike yanyan ta ixtaꞌajel stukelik. Ya xloꞌlawanik y ya xloꞌlalanot euk.

¹⁴ Te jaꞌate junuk awoꞌtan ya me atam spisil te tutik anopoje, te sok awoꞌtan achꞌuunejixe. Anaꞌojix te machꞌatik te la snojpesate.

¹⁵ Naꞌame te chꞌinat to a te la anaꞌbe sba te chꞌul Sjun Diose te ya yaꞌbeyat anaꞌ tutꞌil ya xjuꞌ ya xkolat teme ya achꞌuun te Cristo Jesuse.

¹⁶ Spisil te Sjun Diose la yakꞌ ta naꞌel te Diose y ben lek ya xtuun yuꞌun ya snojpesotik, y ya skomotik, yuꞌun ya stojutesotik, y ya yaꞌbotik jnoptik te toj ya xꞌanotike.

¹⁷ Yuꞌun jich te swinik Diose lek pꞌijuben y tsꞌakal chapal yuꞌun ta spasel spisil ta jkaj te tut leke.