2 Timoteo 2 - Nuevo Testamento Tzeltal de Amatenango

Jtul lekil soltaro yuꞌun te Jesucristoe

¹ Y te jaꞌat, te jnichꞌanat ta koꞌtane, tulan me xꞌawakꞌ aba yuꞌun te ayat ta koltayel yuꞌun te Cristo Jesuse.

² Te tut kalojbeyat awaꞌiy ta sit te bayal testigoetike, jaꞌ me xꞌawaꞌbe snop te winketik te ay spuersa yoꞌtanik sok te ay spꞌijilik yuꞌun ta snojpesel ekꞌa te yanetike.

³ Te jaꞌate tsꞌika me te wokoletik jich tutꞌil lekil soltaro yuꞌun te Jesucristoe.

⁴ Ni jtuluk soltaro te ay ta abatinel te jaꞌ ya xbajt ta yoꞌtan te tut ay ta pasel ta balmilale. Jaꞌ nax ya spas te tut lek yoꞌtan yuꞌun te kapitan yuꞌune.

⁵ Jich mismo euk, te jꞌakꞌ-pelotae ma xjuꞌ ya yichꞌ smajtan teme ma xtajin jich tutꞌil te ya skꞌan pasele.

⁶ Te machꞌa ya xꞌaꞌtej ta kꞌaltik, ya xjuꞌ ya yichꞌ nail te jayeb te kosecha te ay ta skuentae.

⁷ Nopa me te tut la kalixe, y te Kajwaltike jaꞌ me ya yakꞌ anaꞌ spisil.

⁸ Naꞌame te Jesucristoe te chaꞌkux tal te ba ay te animaetike, y te jaꞌ stsꞌumbal te rey Davide, jaꞌ to jaꞌ te skꞌoplal te kolele te yipalon ta yalele.

⁹ Y ta skaj te lek yachꞌil kꞌop to te ay kuꞌun te wokoletike. Asta chukulon ta kadena jich tutꞌil te jtul jmulawil te lom tulan smule. Pero te skꞌoplal te Diose ma chukuluk ta kadena stukel.

¹⁰ Jaꞌ yuꞌun ya xkujch kuꞌun spisil, yuꞌun jich ya staik slekilik te machꞌatik tꞌujbilik yuꞌun te Diose. Yuꞌun jich me ya staik skolelik ekꞌa te ben tsaꞌam sok te sbajtel kꞌinal ay ta skuenta te Cristo Jesuse.

¹¹ Jaꞌ to batsꞌi lom jich: Teme lajemotik sok te Cristoe, jich ya xkuxuyinotik sok.

¹² Teme kꞌax jwokoltike, ya me joyintik te ba ay ta ajwalinele. Teme la jmuk ta koꞌtantike, jich ya smukotik ta yoꞌtan ekꞌa.

¹³ Teme ma junuk koꞌtantike, sigue jun yoꞌtan stukel. Porke maꞌyuk ya xyanej yoꞌtan stukel.

Jtul jꞌaꞌtel te lek skꞌoplale

¹⁴ Aꞌbeya snaꞌik to te machꞌatik akuentaineje, y altalanbeya ta skuenta te Kajwaltike aꞌ sjilesik ta yalulanel te puru kꞌop aꞌbiyejetike sok te puru tsalaw ta kꞌope te maꞌyuk tut ya xlokꞌ aye. Te tut ya spasike jaꞌ nax ya yixlan te machꞌatik ya yaꞌiye.

¹⁵ Oꞌtanina me spisil te tutꞌil ya xjuꞌ ya xkꞌoat ta stojol Dios yuꞌune, jich tutꞌil jtul jꞌaꞌtel te lek skꞌoplale te maꞌyuk tut ya xkꞌexaw yuꞌune, te lek ya yakꞌ ta nopel te kꞌop te batsꞌi jiche.

¹⁶ Koma te kꞌop aꞌbiyejetik te skuenta nax balmilal te ma xtuune. Porke te machꞌatik jich ya yalike, yanyan ta chꞌayel te xchꞌuunel Dios yuꞌunike.

¹⁷ Y te tut ya yakꞌ ta nopele, jich kꞌunkꞌun ya xlajinwan jich tutꞌil te ya xkꞌaꞌ te ejchꞌene. Jich kꞌotix ta pasel yuꞌun te Himeneo sok te Filetoe

¹⁸ te la sjilesikix te tut batsꞌi jiche. Jaꞌ ya yalik te kꞌoemix ta pasel te chaꞌkuxele, y jich yipalik ta yixlanbeyel xchꞌuunel yoꞌtanik chaꞌoxtul te yanetike.

¹⁹ Pero jun nax te kiptajibtik te yakꞌoj Dios te makꞌ xnijk stukele. Jaꞌ tsꞌibabil teꞌa: “Te Kajwaltike yiloj te machꞌatik ay ta skuentae”, xchi me. Sok “A me sjilesik mulil spisil te machꞌatik yajwalinejik te Cristoe”, xchi me.

²⁰ Te ba ay jun mukꞌul nae, ma jaꞌuk nax ay teꞌa te tutik pasbil ta oroe sok ta platae. Ay pasbil ekꞌa ta teꞌe sok ta lume. Ay te tutik lek ta tuunel, y ay yanetik te makꞌ ya xtuun leke.

²¹ Jich yuꞌun teme ay machꞌa ya sakutes sba skuenta yuꞌun ya xtuun yuꞌun te Kajwaltike, ya skꞌan te ya sakutes sba yuꞌun spisil te tut ma tsaꞌamuke. Jich me chapal ya xkꞌot yuꞌun spasel te lekil aꞌtelile.

²² Xiꞌan me yuꞌun te tutik ma lekuk ya skꞌupin spasik te kermetike. Toj me ya skꞌan xkuxuyinat, sok xchꞌuunel awoꞌtan, sok skꞌuxul awoꞌtan, y bujtsꞌanuk me kꞌinal ya awaꞌi. Joyina spisilik te machꞌatik sakubenix yoꞌtanik te ya yalbeyik wokol ta stojol te Kajwaltike.

²³ Ma me awakꞌ ta jkuenta te kꞌopetik te maꞌyuk sluwaril sok te jowil naxe. Anaꞌojix te jaꞌ nax ya slikes kꞌope aye.

²⁴ Y te jtul jꞌatel yuꞌun te Kajwaltike ma spas teme lom nax ya slijkes pletoe. Jaꞌ ya skꞌan te lek skꞌanojlan ta spisil te yanetike. Ya skꞌan te ay spꞌijil yoꞌtan ta nojpeswanej, sok ya skꞌan te ya stsꞌijk yuꞌune.

²⁵ Sok ya skꞌan te chꞌunuluk yoꞌtan ya stojutes te machꞌatik ya xkontrainwanike. Ya smaliy teme Dios ya sujtesbe yoꞌtanik y teme ya snaꞌik te tut a te batsꞌi jiche.

²⁶ Teme la snaꞌik kꞌinale, ya me xkolik tal lokꞌel te ba ay strampa te pukuje, te yakꞌojlan ta prexo yuꞌun te ya yaꞌbe spas te tut ya skꞌane.