2 Timoteo 1 - Nuevo Testamento Tzeltal de Amatenango

Spajtil-oꞌtanil

¹ Joꞌon jPabloon, te apostolon yuꞌun te Jesucristoe te stikonejon ta skꞌanojel yoꞌtan te Diose ta spukel te tutꞌil yaloje te ay kuxlejal ta skuenta te Cristo Jesuse.

² La jtsꞌibabeyat te karta to, Timoteo, te kꞌuxat ta koꞌtane sok te jich kꞌoemat tutꞌil jnichꞌane. Aꞌ me yaꞌbeyat te slekil yoꞌtan y te bujtsꞌan kꞌinal yuꞌun te Dios Tatile y sok te Kajwaltik Jesucristoe.

Ya skꞌan alel skꞌoplal te Cristoe

³ Sil tiempo ya jnaꞌat ta skꞌoponel Dios. Ta kꞌajkꞌal ajkꞌubal ya kalbe kola yal Dios te jun koꞌtan kakꞌoj jba ta abatinel yuꞌun, jich tutꞌil la yakꞌ sbaik ta abatinel te antibo jmeꞌ-jtate.

⁴ Sil tiempo ya jnaꞌ tutꞌil te la awokꞌetay abae, y koꞌtanuk ya kilat yuꞌun jich me ya xjunub xan koꞌtan ta lek a.

⁵ Porke ya jnaꞌ te jun awoꞌtan achꞌuunej te Diose, jich tutꞌil nail xchꞌuunejik Dios te ameꞌchich xLoidae y sok te ameꞌ xꞌEunice. Seguro ayon te jich awoꞌtan ekꞌa te jaꞌate.

⁶ Jaꞌ yuꞌun ya kalbeyat te junuk awoꞌtan ta stuuntesel te amajtan yuꞌun te Diose, jaꞌ te Dios a yaꞌbeyat te kꞌalal la jkajanbeyat jkꞌab ta ajole.

⁷ Yuꞌun te Diose ma jaꞌuk a yaꞌbotik te ya xiꞌotike. Sino ke ya yakꞌbotik yip koꞌtantik sok skꞌuxul koꞌtantik, sok te ya jnaꞌtik tutꞌil ya skꞌan ya xꞌaꞌtejotik.

⁸ Ma me kꞌexawan yuꞌun ta yalel te skꞌoplal te Kajwaltike, ni ma me kꞌexawan kuꞌun te ayon ta prexo ta skaje. Tsꞌijkuk me awuꞌun te wokoletik te ya ata ta skuenta te lek achꞌ kꞌop yuꞌun kolele. Ya me skoltayat ta spoder te Diose.

⁹ Dios a skoltayotik y la yikꞌotik te ya xlekub te jkuxlejaltike. Ma yuꞌunuk ta skuenta kaꞌteltik, sino ke jaꞌ te tut snopoj ta yoꞌtane. Ta skuenta te Cristo Jesuse, te Dios a xkꞌuxutayotik te kꞌalal ma to xchiknaj a te balmilale.

¹⁰ La yakꞌix ta ilel te skꞌuxul yoꞌtan te ora to te xtaluk te jKoltawanej kuꞌuntik, jaꞌ te Jesucristoe, te tal slajinbey spoder te lajele, sok ta skuenta te skꞌoplal te kolele te la yakꞌ ta ilel te kuxlejal te ma xlaje.

¹¹ Dios a yaꞌbon kaꞌtel ta yalel te skꞌoplal te lek achꞌ kꞌope, y la stikonon ta spukbeyel skꞌoplal y sok ta spꞌijutesel te machꞌatik ma juriyouke.

¹² Jaꞌ yuꞌun te ay jwokol ta ora to. Pero makꞌ me xkꞌexawon yuꞌun, porke te joꞌone jnaꞌoj machꞌa a te smukꞌulinej koꞌtane, y seguro ayon te stukel ay spoder yuꞌun ya skꞌejbon te tutꞌil yakꞌojbone, jaꞌ to te tut kꞌaalil te ya xchaꞌtal xane.

¹³ Jaꞌ me ya atam te lekil nojpesel te joꞌon la kalbeyat jilel awaꞌiye. Sok jujun kꞌaal ayuk me xchꞌuunel awoꞌtan y sok skꞌuxul awoꞌtan te kichꞌojtik yuꞌun te jun nax ayotik sok te Cristo Jesuse.

¹⁴ Kanantaya me te lekil nojpesel yuꞌun Dios te ay ta awoꞌtane. Jaꞌ me ya skoltayat te Chꞌul Espiritue te ay ta koꞌtantike.

¹⁵ Anaꞌojix te spisil te machꞌatik aylan ta estado yuꞌun Asiae la sjilesikon, sok te Figelo sok te Hermogenes.

¹⁶ Pero ya me yichꞌik te xkꞌuxul yoꞌtan te Kajwaltik te machꞌatik ay yuꞌun te Onesiforoe, porke stukel bayalix buelta a yichꞌbon tal spuersa koꞌtan y ma kꞌexaw yuꞌun te ayon ta prexoe.

¹⁷ Yuꞌun te kꞌalal jul ta Romae, lijk sleon, ni maꞌ xkux jaꞌ to te la staone.

¹⁸ A me kꞌuxutayek yuꞌun Kajwaltik te tut kꞌaalil ya xtal xane. Te jaꞌate anaꞌojix lek te bayal la skoltayotik ta Efesoe.