2 Pedro 2 - Nuevo Testamento Tzeltal de Amatenango

Te jloꞌlawanejetike

¹ Ta namey ay palso jꞌalwanejetik te ba ay te jtejklum Israel; y jich me ay palso maestroetik te ba ayex te jaꞌexe. Ya me snojpeswanik ta mukul te tut snopojike te ya xjimawanike. Jaꞌ ya spꞌajik te Kajwaltik te jaꞌ a koltalanot yuꞌune. Jich me ora ya yichꞌik jimel stukelik.

² Bayal machꞌa ya stsꞌaklin te xkuxlejalik te ma tsaꞌamuke, y ta skaj stukelik te ya xꞌalbot ma lekuk skꞌoplal te tut batsꞌi jiche yuꞌun te Diose.

³ Ay sbikꞌtal yoꞌtanik yuꞌun te takꞌine, jich ay tut ya slokꞌesbeyex sok te tut palso ya yakꞌik ta nopele. Pero namey chapal skꞌoplalik te ya xbajtik ta chꞌayel. Ni ma xjuꞌ ya skoltay sbaikix teꞌae.

⁴ Dios maꞌ spasbe perdon te angeletik te mulawike, sino ke chꞌojtalanot ochel ta kastigo. Teꞌ la yakꞌtalan jilel ta ijkꞌal kꞌinal, chukajtik ta kadena y kꞌejtalanbil jilel yuꞌun te tut ora ya sta skꞌaalel te chapele.

⁵ Ni maꞌ spasbe perdon euk te Dios te antibo genteetike, sino ke la yakꞌ taluk nojel jaꞌ ta stojolik te genteetik te ma lekikuke. Jaꞌ nax a kol te jNoe, te la yalbe skꞌoplal te lek kuxlejal te toje, y sok te yan xan juktule.

⁶ Dios la yakꞌ xan bael ta kastigo te la slajin te mukꞌul jtejklumetik te Sodoma y te Gomorrae. Chikꞌtalanot asta tan a laj jil. Yuꞌun jaꞌ ejemplo ya yil ta patil te gente te ma lekikuk te ya xkuxuyinike.

⁷ Pero la skoltay lokꞌel te jLot, te toj ta winikile. Jaꞌ te machꞌa a wokolaj sok xkuxlejal yuꞌun te tut kꞌayemik ta spasel te machꞌatik ma lekikuk.

⁸ Te winik to, toj a kuxuyin ta yolilik. Kꞌax swokol yuꞌun te slekil yoꞌtane ta skaj te tutik ma lekikuk ya yil sok ya yaꞌiy te jujun kꞌaale.

⁹ Te Kajwaltike snaꞌoj tutꞌil ya skoltay te machꞌatik ya xtal ta sujel ta mulile te jun yoꞌtan xchꞌuunej Diose. Y snaꞌoj tutꞌil ya skꞌej te machꞌatik ma lekikuke te ya yichꞌik kastigo yuꞌun te tut kꞌaalil ya xkꞌot te chapele.

¹⁰ Dios ya yaꞌbe kastigo ta spisil te machꞌatik sigue ya spasik te tut ya skꞌan yoꞌtanik te ma lekuke, y te ma skꞌanik te ya yajwalinik te Kajwaltike. Lom tulanik, y ay spuersaik, y ni makꞌ ya xiꞌik te ya stoyba-kꞌoptayik te machꞌatik ay tulan yaꞌtelike.

¹¹ Yan te angeletike, aunke mas ay spuersaik y ay yaꞌtelik, ma yauk yakꞌik puersa te ya stoyba-kꞌoptay te machꞌatik ay spoderik ta skontrainel te Kajwaltike.

¹² Te genteetik to, jachik kꞌoemik te tutꞌil chanbalametik: maꞌyuk tut ya xkꞌot ta yoꞌtanike. Jaꞌ nax kuxulik ya xꞌayinik te ya yichꞌik tsakel y te ya xmiltalanote. Ya yalbeyik ma lekuk skꞌoplal te tutik ma xyaꞌibe sluware. Pero jich ya xlaj cham jich tutꞌil te chanbalametike.

¹³ Ya me xꞌaꞌbot stojik ta wokolajel te tutꞌil la yakꞌ kꞌaxuk swokol ekꞌa te yane. Skuyojik te jun yoꞌtanike te juju tsꞌin nax ya spasik te tut ya skꞌupinik spasele. Jaꞌ jun kꞌexlal y jaꞌ ya yixlanbe akꞌoplalik te kꞌalal ya ajoyin abaik sok te ba akꞌinike. Sok sbujtsꞌ yoꞌtanik ya spasik te tut ma lekuke te ya xloꞌlawanike.

¹⁴ Te sitike jaꞌ nax yaꞌtel te ya skꞌeluyik te ants te ya skꞌupine. Ni ma xlubik ta sleulanel smulik. Ya sloꞌlayik bael te machꞌatik maꞌyuk spuersa yoꞌtanike. Kaꞌyem yoꞌtanik a te tutik ya skꞌupin. Jaꞌ uꞌuninbilik yuꞌun te chꞌayele.

¹⁵ Chꞌayemik ta beel, porke jaꞌ a sjilesikix te tojil bee. Jaꞌ stamojik te tutꞌil ay te jꞌalwanej Balaam te xnichꞌan Beor, te la skꞌan yoꞌtan te ya sta takꞌin ta spasel te tut ma lekuke.

¹⁶ La yichꞌ komel yuꞌun te ya sleulan smule, yuꞌun kꞌopoj jkojt buru te ma xkꞌopoje, kꞌopoj jich tutꞌil skꞌop gente. La skom te tut ma lekuk snopoj te jꞌalwaneje.

¹⁷ Te machꞌatik jich ya spasike, jachik kꞌoemik te tutꞌil slokꞌib jaꞌ te maꞌyuk yaꞌlele. Jachik kꞌoem tutꞌil tokaletik te ya xꞌikꞌayot bael yuꞌun te ikꞌe. Chapal skꞌoplalik te ya xkꞌot te ba mas lom ijkꞌ te kꞌinal ta sbajtel kꞌinale.

¹⁸ Jaꞌ nax ya yalik te toyba-kꞌopetike y te tut lom naxe. Y kꞌayemik a te ya xloꞌlawanik yuꞌun te tut ya skꞌan spas te stiꞌbalulike. Jaꞌ ya sloꞌlayik te machꞌatik lokꞌelik to tal ta tulan wokol te ba ay te machꞌatik chꞌayemike.

¹⁹ Ya yalik te libre ayike, pero stukelik mismo ayik ta mosoinel yuꞌun te tut skuenta lajel. Porke spisil gente jaꞌ mosoinbil yuꞌun te tut ya stsalot yuꞌune.

²⁰ Yuꞌun te machꞌatik la snaꞌbeyix sba te Kajwaltik Jesucristo te jKoltawanej kuꞌuntike, y kolikix tal lokꞌel te ba ay te tut ma lekuk ta skuenta te balmilale, y teme la yakꞌ sbaik xan ta tsalel yuꞌun te tutik a jilix yuꞌun te nail toe, y teme ya stsalot xan yuꞌune, mas pewor ya sujt ke te nail toe.

²¹ Jaꞌ mas lek te jichuk ma yilik te tojil bee. Te tutꞌil yilojikixe, jaꞌ ma lek teme ta patil ya xchꞌoj jilel te chꞌul mantal te la yichꞌ aꞌbeyele.

²² Pero te stukelike jaꞌ a kꞌot ta pasel te jich abil jilele: “Te tsꞌiꞌe la xchaꞌloꞌ xan te xee, y sok te meꞌ chitam te nusesbilixe la xchaꞌbalan sba xan ta ajchꞌal”, xchi me.