2 Pedro 1 - Nuevo Testamento Tzeltal de Amatenango

Spajtil-oꞌtanil

¹ Joꞌon Simon Pedroon, jꞌaꞌtelon y apostolon yuꞌun te Jesucristoe. Ya jtsꞌibabeyex te karta to ta akuentaik, te pajal ay ta jkuentaik xchꞌuunel te tut ben tsaꞌame, porke toj yoꞌtan stukel te Diose y sok te jKoltawanej Jesucristoe.

² Ichꞌbeyaik te lom bayal slekil y te bujtsꞌan kꞌinal ta skuenta te la anaꞌojbeyikix sba te Diose y sok te Jesus te Kajwaltike.

Tut batsꞌi yilel ya xkꞌot te machꞌa xchꞌuunej Diose

³ Ta skuenta spoder te Diose la yaꞌbotikix spisil te tut puersa yuꞌun te jkꞌuxlejaltike y sok te tutꞌil ya xjunaj koꞌtantike. La yaꞌbotikix jnaꞌtik te Machꞌa la yikꞌotikixe, te lom mukꞌ stukele y sok te yaꞌtel te lom kꞌax tsaꞌame.

⁴ Ta skuenta te tutik to, la yalbotik te tut ya yaꞌbotik ta patile, te kꞌax lom tsaꞌam y lom mukꞌe. Yuꞌun jich pajal kileltik ya xkꞌootik sok te tutꞌil ay te Diose, sok te libre ya xjilotik yuꞌun spisil te tutik ma lekuk te kꞌayemik ta spasel liꞌ ba balmilale.

⁵ Jaꞌ yuꞌun ya skꞌan ya awakꞌik puersa te ayuk bayal xchꞌuunel awoꞌtanik sok te lekuk spisil te tut ya apasike, sok te yakuk anaꞌik kꞌinal ta leke,

⁶ sok te yakuk anaꞌ tutꞌ ya akom abaike, sok te ya xkujch awuꞌunik, sok te junix awoꞌtanik ta stojol Dios,

⁷ sok te kꞌuxuk ya awaꞌiyik te hermanoetike, sok ayuk xkꞌuxul awoꞌtanike.

⁸ Porke teme ayix awuꞌunik te tutik to, sok teme yipal ta bayalajel ta awoꞌtanike, ma jowiluk nax ya xkꞌot te akuxlejale, sok ma lomuk nax te ya anaꞌbeyik sba te Kajwaltik Jesucristoe.

⁹ Pero te machꞌa ma jichuk ay yuꞌune, jachik kꞌoem tutꞌil jtul chok o te machꞌa ma xyil kꞌinal ta jakale. Chꞌayix ta yoꞌtan te tutꞌil pokbilix yuꞌun te smul te sleoj te nail toe.

¹⁰ Jaꞌ yuꞌun, kermanotak, te ikꞌbilex yuꞌun te Diose sok te tsabilex yuꞌune, oꞌtaninaik spasel spisil to. Yuꞌun teme jich ya apasulanike, ma xyalex ta mulil.

¹¹ Jich me jamal ya sjeꞌbelex te puertaetik te ba ay ta ajwalil sbajtel kꞌinal te Kajwaltik Jesucristo, te jKoltawanej kuꞌuntike.

¹² Jaꞌ yuꞌun sigue ya kakꞌulan anaꞌik sil tiempo spisil to, aunke spisil to ya anaꞌikix, sok jmel nax ay ta awoꞌtanik te tut batsꞌi te la snojpeselexe.

¹³ Ya ke te kuxulon toe, ay ta jkuenta te ya kaꞌbeyex anaꞌik sok te ya kaꞌbeyex te tsitsulanel to.

¹⁴ Te Kajwaltik Jesucristoe la yaꞌbonix jnaꞌ te ya jilesix te jkuxlejal ta balmilale.

¹⁵ Jich me ya koꞌtanin xan spisil ya xjuꞌ kuꞌun, yuꞌun jich ta patil teme chamenonix ae, ya me anaꞌik te tutik to te jaꞌexe.

Te machꞌatik la yilik te stsaꞌamul Cristoe

¹⁶ Te nojpesel te la kaꞌbetikex te tutꞌil ay spoder te ya xtal xan te Kajwaltik Jesucristoe, ma kꞌop abiyejuk nax te ya xloꞌlawane. Yuꞌun batsꞌi ta sitik a kiltik te Kajwaltik te lom mukꞌ ay slekilale.

¹⁷ La kiltik te kꞌalal te Dios Tatil la yakꞌ ta akꞌel ta jkuenta sok te stsaꞌamule. Te kꞌalal kꞌopoj te Diose, jaꞌ a yal sok stsaꞌamule: “Jaꞌ to jaꞌ Jnichꞌan te lom kꞌux ta koꞌtane. Ben jun koꞌtan yuꞌun”, xchi me.

¹⁸ Joꞌotik mismo a kaꞌitik te kꞌop abi te tal ta chꞌulchane, yuꞌun joy jbajtik sok a te Kajwaltik te ba chꞌul witse.

¹⁹ Jaꞌ yuꞌun, mas seguro kꞌot te tut la yalbe skꞌoplal te jꞌalwanejetik yuꞌun Diose. Jich ya skꞌan te lekuk ya awakꞌik ta jkuenta ta yaꞌiyele. Yuꞌun te skꞌoplal abi, jachik kꞌoem tutꞌil jun lampara te ya sakutes te jun ijkꞌal kꞌinale. Jaꞌ to te tut kꞌaalil ya sakube, y te ekꞌ ta xpajtaje ya xlokꞌ tal yuꞌun ya sakuteslan te oꞌtanile.

²⁰ Pero ya skꞌan te nail ya anaꞌbeyik sluwaril te tutꞌil ni maꞌyuk machꞌa ya snaꞌ te ya yalbe sluwar te tut tsꞌibabil ta Sjun Diose.

²¹ Porke te jꞌalwanejetike maꞌyuk a yalik ta skꞌanojel nax yoꞌtanik. Sino ke jaꞌik winketik te kꞌopojik ta skuenta Dios te tojuteslanbil yuꞌun te Chꞌul Espiritue.