2 Corintios 9 - Nuevo Testamento Tzeltal de Amatenango

Ay skoltayel a tsobot yuꞌun te hermanoetike

¹ Pero te tutꞌil ay skꞌoplal te koltayel yuꞌun te hermanoetik te xchꞌuunejik Diose, ma puersauk te ya jtsꞌibabeyex xan skꞌoplal ta akuentaike.

² Porke jnaꞌojix te tutꞌil ben jun awoꞌtan ya awakꞌike. Sil tiempo ben jun koꞌtan ya kalbey te machꞌatik ayik ta Macedoniae te jaꞌ to te jaꞌbil a kꞌax te ben jun awoꞌtanik ya awakꞌik te koltayele te jaꞌex te ayex ta Acayae. Jaꞌ yuꞌun te machꞌatik ayik ta Macedonia la snopikix te jun yoꞌtanik ya yakꞌik ekꞌae.

³ Pero la jtikonix te hermanoetik to yuꞌun maꞌyuk lot ya xkꞌot a te tutꞌil la kalbeyex te lek akꞌoplalike. Jaꞌ yuꞌun ya skꞌan te chapalukex me jich tutꞌil kalojixe.

⁴ Ma me jaꞌuk to a teme talon sok chaꞌoxtuluk te jmacedoniaetike teme ma chapalukex a kꞌo jtatikexe. Teme ma chapalukex, ya me xkꞌexawotik awuꞌunik, yuꞌun jun koꞌtantik kalojtik te tutꞌ ayexe, sok te jaꞌexe ya me ataik kꞌexlal ekꞌa.

⁵ Jaꞌ sluwar te la jnop te la kꞌanbe pawor te hermanoetik to te ya xba yilex naile, yuꞌun ya xtal skoltayex ta stsꞌakutesel te koltayel te awalojik ya awakꞌike. Jich te koltayel awuꞌunike jich me chapalix a. Jich me ya xchiknaj te sok slekil awoꞌtanik ya awakꞌik, y ma me jichuk ya xchiknaj te ya nax akꞌupinike.

⁶ Naꞌaik me to: Te machꞌa chꞌin nax ya stsꞌune, chin nax ya xlokꞌ te skosechae. Te machꞌa bayal ya stsꞌune, bayal me ya xlokꞌ te skosechae.

⁷ Te juju-tul aꞌ yakꞌ te tutꞌ snopoj te yoꞌtane, y ma me xchebetuk yoꞌtan ya yakꞌ, y ma me sujbiluk te ya yakꞌe. Porke te Diose kꞌux ta yoꞌtan te machꞌa jun yoꞌtan ya yakꞌe.

⁸ Te Diose ya xjuꞌ yuꞌun ya yaꞌbeyex bayal ta jkaj te bendisionetike, yuꞌun jich me ay awuꞌunik sil tiempo spisil te tut ya akꞌanike. Jich me ay sobra awuꞌunik a te ya xtuun awuꞌunik ta spasel bayal ta jkaj te lekil aꞌtele.

⁹ Te Sjun Dios jich ya yal: “Te tutik ay yuꞌune, la xatꞌtalan sok la yakꞌtalanbe te meꞌbaꞌetike. Te slekil yaꞌtele sbajtel kꞌinal ma xlaj stukel”, xchi me.

¹⁰ Dios ya yaꞌbe stsꞌunub te machꞌa ya stsꞌunbaje y sok te tut ya sweꞌe. Jich ya yaꞌbeyex te jaꞌexe spisil te tut ya akꞌanik yuꞌun te ya atsꞌunike, y ya spꞌolesbeyex ta mas, yuꞌun jich me ya xjuꞌ awuꞌunik spasel a te bayal lekil aꞌteliletike.

¹¹ Jich me bayal akuꞌlejalik ya xkꞌot y jich ya xjuꞌ awuꞌunik yakꞌel bayal koltayel a. Y te koltayel te jaꞌex ya atikonik bael ta jkuentatike, jaꞌ sluwar te ya yalbeyik kola yal Dios te hermanoetike.

¹² Porke te kꞌalal ya kichꞌtik bael te skoltayel hermanoetike, ma jaꞌuk nax a kichꞌbetik bael te tut maꞌyuk ay yuꞌune. Yuꞌun jich ekꞌa ya me kꞌabeytik yalik bayal kola yal Dios yuꞌun a,

¹³ y ya me yalbeyik slekilal a te Diose yuꞌun te koltayel te la awaꞌbeyik ya yakꞌ ta ilel te jaꞌex achꞌuunejik te lek achꞌ kꞌop yuꞌun te Cristoe. Jich me ya yalbeyik slekilal a te Diose yuꞌun te bayal tut la awakꞌik te jaꞌexe te ya xtuun yuꞌunik sok ta spisil te hermanoetike.

¹⁴ Jich ya me skꞌoponbeyex Dios te jaꞌexe, te lom kꞌux ya yaꞌiyex ta yoꞌtanike, te tutꞌil bayal slekil yoꞌtan Dios te la yakꞌix ta ilel ta akuentaik te jaꞌexe.

¹⁵ Kola yal te Diose, porke la yaꞌbotik jun majtanil te lom mukꞌe, te ma jnaꞌtik yalel te tutꞌil aye.