2 Corintios 8 - Nuevo Testamento Tzeltal de Amatenango

Bayal a yakꞌik koltayel te macedoniaetike

¹ Te ora to kermanotak, ya jkꞌan kalbeytikex te tutꞌil chiknajix slekil yoꞌtan Dios te ba ay juju-tijkꞌ hermanoetik ta Macedoniae.

² Aunke lom bayal swokolik yuꞌun ilel yoꞌtanik, pero kaꞌxikix a ben junix yoꞌtanik. Y manchuk me ben meꞌbaꞌik. Pero bayal a stsobik te koltayele, jich kꞌoem te lom jkꞌulejike.

³ Joꞌon testigoon yuꞌunik te sok sbujtsꞌ yoꞌtan a yakꞌik te ba kꞌalal a juꞌ yuꞌunik yakꞌele, y mas a yakꞌ a tutꞌil ya xjuꞌ yuꞌunike.

⁴ La skꞌanbotik bayal pawor te ya kalbetik te yauk yakꞌik ekꞌa te koltayel yuꞌun te hermanoetik ta skuenta Diose.

⁵ Y asta jich a spasik ta mas te tutꞌ yipalotik ta smaliyele. Yuꞌun jaꞌ a yakꞌ sbaik ta abatinel nailuk yuꞌun te Kajwaltike sok yuꞌun te joꞌotike, jich tutꞌil ya skꞌan yoꞌtan te Diose.

⁶ Jaꞌ yuꞌun la jkꞌanbetikix pawor te jTitoe te ya xtal yichꞌbeyex bael te koltayel ya awakꞌik ta skuenta slekil awoꞌtanik, te jaꞌ nax nail a lijk stsobe.

⁷ Yuꞌun te jaꞌexe te tutꞌil spisil yipalix ta juꞌel awuꞌunike: Ayix xchꞌuunel awoꞌtanik, sok ben lek ya anaꞌik xkꞌopojexe, sok pꞌijubenexixe, sok ben jun awoꞌtanik ya awakꞌ abaik ta abatinel, y sok te ben bayal kꞌuxotik ta awoꞌtanike. Jich mismo ya skꞌan te kꞌax jich ya xjuꞌix awuꞌunik te yaꞌtelul te kꞌuxutawaneje.

⁸ Ma yauk kalbeyex mantal te jich ya apasike. Jaꞌ nax ya jkꞌan ya anaꞌik te jun yoꞌtanik yipal ta xchapel te yane. Yuꞌun me ya awakꞌik ta ilel te tutꞌil ay te xkꞌuxul awoꞌtanik te batsꞌi jiche.

⁹ Porke ya anaꞌikix te jaꞌexe, te Kajwaltik Jesucristoe ta slekil yoꞌtan, aunke kꞌulej stukel, la yakꞌ sba ta meꞌbaꞌ ta akajik te jaꞌexe. Yuꞌun te tutꞌil meꞌbaꞌ a yakꞌ sbae, jaꞌex akulejibex a.

¹⁰ Te tutꞌil jich aye ya kalbeyex tutꞌ ya yal te koꞌtan yuꞌune. Te tutꞌil la apasik te jaꞌbil a kꞌaxe, ma jaꞌuk nax te la alijkesik spasele, te ben jun awoꞌtanik la apasike.

¹¹ Te ora to, te tut ya xjuꞌ awuꞌunike, juꞌutesa te tut la apasike, jich tutꞌil ben lek chapal te la awakꞌik ta ilel te nail toe, te kꞌalal la anopik spasele.

¹² Porke te machꞌa batsꞌi jich ya skꞌan yakeꞌ, Dios ya yichꞌ te majtanil te machꞌa jich ya yakꞌ te ya xjuꞌ yuꞌune. Te Diose ma yauk skꞌanbe te machꞌa maꞌyuk yuꞌune.

¹³ Ma jꞌauk ya jkꞌan te jaꞌex ya ata awokolik te ya akoltayik te yane.

¹⁴ Jaꞌ ya skꞌan te pajal ay awuꞌunik soke. Te ora to te jaꞌexe ay awuꞌunik te tutꞌil maꞌyuk yuꞌun te yane. Ta jchꞌoj xan teme ay yuꞌunik, ya me yakꞌik te tut maꞌyuk awuꞌunik te jaꞌexe, yuꞌun jich me pajal ay tut ay awuꞌuꞌunik a.

¹⁵ Jich tutꞌil ya yal te Sjun Diose: “Ni ma spas sobra te machꞌa bayal tut stsoboje, ni maꞌyuk palta a yaꞌiy te machꞌa chꞌin nax tut stsoboje”, xchi me.

jTito sok te sjoꞌtake

¹⁶ Pero kola yal Dios te la yaꞌbe ta yoꞌtan te jTitoe mismo te tutꞌ yajtal koꞌtanex te jaꞌexe.

¹⁷ Yuꞌun la xchꞌuunbonix te tikonele, yuꞌun stukel ben ayex ta yoꞌtan te jaꞌexe. Te ora to ya xtal yilex sok spꞌejel yoꞌtan.

¹⁸ Pajal ya jtikontik sok jTito te jtul hermano te ben lek skꞌoplal yuꞌun spisil te juju-tijkꞌ hermanoetike, te tutꞌil lek aꞌtejemix ta spukel skꞌoplal te lek achꞌ kꞌop yuꞌun kolele.

¹⁹ Sok te hermanoetike jaꞌ la stsaik yuꞌun ya sjoyinotik ta beel, y ya skoltayotik ta stsobel te koltayel te yipalotik ta stsobele. Yuꞌun jich ya kakꞌtik ta akꞌel ta jkuenta a te Kajwaltike. Y yuꞌun jich me ya xchiknaj te jun awoꞌtanik ya awaꞌiyik koltawaneje.

²⁰ Jaꞌ ya jkꞌantik te maꞌyuk machꞌa ya slebotik jmultik yuꞌun te bayal majtanil te yipalotik ta stsobele.

²¹ Jaꞌ me ya skꞌan ya jpastik te tut leke ta stojol te Kajwaltik sok ta stojol ekꞌa te winketike.

²² Sok ay jtul xan kermanotik ya jtikontikix sok, te bayal buelta kilojtikix te ben jun yoꞌtan aye. Y mas xan a te ora to snaꞌoj ta yoꞌtan te tutꞌil ayexe.

²³ Teme ay machꞌa ya sjojkꞌoy tutꞌil ay te jTitoe, albeyaik te joy jba sok te jun nax ya xꞌaꞌtejon sok ta akuentaike. Y teme ya sjojkꞌobeyex tutꞌil ay te cheb xan hermanoetike, albeyaik te jaꞌ tikonbil yuꞌun te juju-tijkꞌ hermanoetike, y te yakꞌojik ta akꞌel ta jkuenta te Cristoe.

²⁴ Yuꞌun jich me ya snaꞌik a te juju-tijkꞌ hermanoetike, aꞌbeyaik yilik jaꞌex te batsꞌi jich te lom kꞌux ta awoꞌtanike. Jich ya xchiknaj tutꞌ yuꞌun te ben jun koꞌtantik awuꞌunike.