2 Corintios 6 - Nuevo Testamento Tzeltal de Amatenango

¹ Yuꞌun jich ayotik ta aꞌtel sok te Diose, ya kaltik ta atojolik: Ma me apꞌajik te slekil yoꞌtan Dios te ya yakꞌ ta akuentaik.

² Porke jich yaloj ta Sjun: “La staix yorail te ya kaꞌitik te akꞌope. Ta skꞌaalel te kolel la jkoltayat”, xchi me. Y te ora to, jaꞌix yorail te kꞌuxutayele; te ora to, jaꞌ skꞌaalel te kolele.

³ Ma me ayuk tut ma tsaꞌamuk ya kakꞌtik ta ilel ta skuenta te yane, yuꞌun ma me ayuk machꞌa ya yal te ma tsaꞌamuk te kaꞌteltike.

⁴ Yuꞌun ta skuenta spisil ya jpastike, ya kaꞌbetik yilik te joꞌotik yaj-aꞌtelotik te Diose. Jich jun koꞌtantik ya me xkujch kuꞌuntik te ilbajinele, sok te tutik ay maꞌyuk kuꞌuntike, sok spisil te jwokoltike,

⁵ sok te aresial, o prexo, o skontrainelotik, o ta tulan aꞌtel, sok ma wayotik, o ma weꞌotik.

⁶ Jich me ya kakꞌtik ta ilel te lekix ayotik sok te jkuxlejaltike, sok te tutꞌ jnaꞌojbetik sluwaril te tut batsꞌi jiche, sok te ay perdon ta koꞌtantike, sok te ay slekil koꞌtantike, sok te ay ta koꞌtantik te Chꞌul Espiritue, sok te batsꞌi ay xkꞌuxul koꞌtantike,

⁷ sok te lekuk ya xkꞌopojotik te tut batsꞌi jiche, y sok te ay spoder Dios ta jtojoltike. Aꞌ tuunuk kuꞌuntik te tut ya jkoltay jbajtik ae, jaꞌ te toj ayotike, te jaꞌ ya xtuun kuꞌuntik te ya kaꞌiytik tsalaw a sok te ya jmak jbatik a.

⁸ Ay ya yakꞌelotik ta jkuenta; y ay ma xyakꞌelotik ta jkuenta. Ay lek ya yalbelotik jkꞌoplaltik; y ay ma tsaꞌamuk ya yalbelotik jkꞌoplaltik. Ya yalbelotik te yuꞌun jle-lototike, pero jaꞌ ya kaltik te tut batsꞌi jiche.

⁹ Jich ya yalbelotik te ma snaꞌbelotik jbajtike, pero lom lek ya snabelotik jbajtik. Jich chamenotikix ya kaꞌiy jbajtik, pero sigue kuxulotik bael. Ya yaꞌbelotik kastigo, pero makꞌ ya smilotik.

¹⁰ Ay lom tristeotik, pero sil tiempo kontento ayotik. Ay lom meꞌbaotik, pero ay bayal kꞌulejiben kuꞌuntik. Jich yilel te maꞌyuk tut ay kuꞌuntike, pero ay kuꞌuntik spisil.

¹¹ Kermanotak jcorintoetik, jamal yipalotik ta yalel ta akuentaik, jamal ya kaltik te tut ay ta koꞌtantike.

¹² Maꞌyuk tut kꞌejoj ta koꞌtantik ta akuentaik. Jaꞌex atukelik te ay tut ay ta awoꞌtanik ta jtojoltike.

¹³ Ya kalbeyex, jich tutꞌil jtul tatil te ya yalbe te yuntikile: Jamaluk me awoꞌtanik ta jkuenta, jich tutꞌil jamal koꞌtan ta akuentaik.

Te joꞌotike templootik yuꞌun te kuxul Diose

¹⁴ Ma me pajaluk ayukik sok te machꞌa ma xchꞌuunejuk Diose. Te machꞌa toj yoꞌtane, ¿tutꞌil jun kꞌan anuk sok te machꞌa ma tojuk yoꞌtane? O jich tutꞌil sakil kꞌinal, ma spas te ya sta sba sok te ijkꞌal kꞌinale.

¹⁵ Jich euk te Cristo ma spas te jun yoꞌtan sba sok te pukuje. Ni spas ya sta sba sok te jtul machꞌa xchꞌuunej Dios sok te jtul te ma xchꞌuunejuk Diose.

¹⁶ Ma spas teme komon ay te templo yuꞌun Dios sok te lotil diosetike. Porke joꞌotik templootik yuꞌun te kuxul Diose, jich tutꞌil a yal jilel stukele: “Ya me xnainon ta yolilik, teꞌ ya me xbeenon a. Joꞌon Dioson yuꞌunik y jaꞌ jtejklum kuꞌunlan”, xchi me.

¹⁷ Jaꞌ yuꞌun jich a yal euk te Kajwaltike: “Lokꞌanik tal te ba yolilike y parte xꞌawakꞌ abaik. Ma me atsakik te tut ya xꞌixlanwane. Jich me joꞌon ya kikꞌex.

¹⁸ Y joꞌon Tatilon me awuꞌunik, y te jaꞌexe kuntikilex me y kantsil-nichꞌanex me”, xchi te Kajwaltik te spisil ya xjuꞌ yuꞌune.