2 Corintios 5 - Nuevo Testamento Tzeltal de Amatenango

¹ Te tiꞌbalultik jachik tutꞌil jun naul-pakꞌ te ma xjalaje. Pero jnaꞌojtik teme ya xlaj te naul-pakꞌ to, Dios spasojbotik ta chꞌulchan jun na skuenta sbajtel kꞌinal te ma jaꞌuk pasbil ta skꞌab genteetike.

² Jaꞌ yuꞌun yipalotik ta ajkan te jayeb kꞌaal jnainejtik te jtiꞌbalultik to. Yuꞌun koꞌtantikukix te ya xjelonotik te ya kichꞌtikix te tut ya jnaintik ta chꞌulchane.

³ Te jich me ya jlaptik te tutꞌil jun kꞌuꞌul-pakꞌal, yuꞌun jich me ma tꞌaxalukotik ya xjilotik a.

⁴ Te tutꞌil jayeb kꞌaal te jnainejtik te jtiꞌbalultik to, ayotik ta ajkan sok ay jwokoltik, yuꞌun ma jkꞌantik teme tꞌaxalotike. Jaꞌ ya jkꞌantik te yauk jlaptikix te tut yachꞌile, yuꞌun te tut ya xlaje jich me ya xlaj jil, yuꞌun ya kichꞌtikix te achꞌ kuxlejale.

⁵ Jaꞌ stukel te Diose jicha xchapbotikix te jich ya xkꞌootike, sok jaꞌ nax yakꞌojbotikix te Chꞌul Espíritu te jaꞌ seña te tut kechel ya to kichꞌtike.

⁶ Jaꞌ yuꞌun sil tiempo ay spuersa koꞌtantik. Jnaꞌojtik te jayeb kꞌaal te jnainejtik te jtiꞌbalultike yuꞌun ma to ayukotik te ba ay te Kajwaltike.

⁷ Te ora to ma to ya kiltik, pero jun koꞌtantik jchꞌuunejtik.

⁸ Ay xchꞌuunel koꞌtantik, y koꞌtantikukix te yauk xjilix te jtiꞌbalultik to. Yuꞌun jich ya xba joyin jbatik sok te Kajwaltike.

⁹ Jaꞌ yuꞌun lekuk kaꞌteltik sil tiempo ta skuenta te Kajwaltike, manchuk me ya jilestik te jtiꞌbalultik to, o sigue kichꞌojtik to.

¹⁰ Porke jpisiltik puersa me ya xkꞌo jtejkꞌan jbajtik ta sit te ba ya xchapawan te Cristoe, yuꞌun ta juju-tul ya yichꞌ te tut ya xkꞌot ta skuentae, chikan me lek o me ma lekuk te tutiꞌ spas te kꞌalal ay to sok stiꞌbalul ae.

Te skꞌoplal butsꞌan kꞌinale

¹¹ Yuꞌun ya jnaꞌtik te ya skꞌan ya kakꞌtik ta jkuenta te Kajwaltike, ya kaꞌtelin te ya kaꞌbe kꞌouk ta yoꞌtanik te winketike. Te Diose snaꞌoj tutꞌil ayotik, y ya jkꞌan te jichuk ya anaꞌbikon te titꞌil ay te koꞌtane.

¹² Ma yuꞌunuk ya xlijk kaltik xan te lek jkꞌoplaltik te joꞌotik mismoe. Jaꞌ nax ya kaꞌbetikex te tutꞌil ben bujtsꞌan kꞌinal ya awaꞌiyik ta jkuentatike, yuꞌun jich me ya xjuꞌ awuꞌunik sujtesel skꞌopik te machꞌatik ya stoy sbaik yuꞌun te tut yilel yutsilal ta kꞌinale, te ni maꞌyuk skꞌoplal yuꞌunik te tut yilel te yoꞌtanike.

¹³ Teme ya xjowiyotik ya awilike, jaꞌ ta skuenta te Diose. Y teme ma jowiyemukotike, yuꞌun jaꞌex ta akuentaik.

¹⁴ Jaꞌ ya spasotik ta mantal te xkꞌuxul yoꞌtan kuꞌuntik te Cristoe. Te tutꞌil jnaꞌojtik te jtul a cham yuꞌun ta spisilike, jicha a chamik ta spisilik kꞌoem euk.

¹⁵ Te tutꞌil a cham Cristo yuꞌun spisil te genteetike, yuꞌun te machꞌatik kuxajtike ma jichuk xanix kuxajtik ta stukelik nax. Yuꞌun jaꞌix kuxajtik ta skuenta te Cristo, te cham y chaꞌkux tal ta skuentaike.

¹⁶ Jaꞌ yuꞌun, te joꞌotike ma yajtaluk koꞌtantik te tut yilel te gente liꞌ ba balmilale. Te nail toe ya jkuytik te Cristoe pajal sok te tutꞌil ay te gentee. Yan te ora to ma jichukix jkuyojtik te jich aye.

¹⁷ Jich yuꞌun te machꞌa jun nax ay sok te Cristoe achꞌ genteix. Te tutꞌil ay te nail toe, kꞌaxix bael; te tutꞌ ayix te ora to, achꞌubenix.

¹⁸ Spisil lito jaꞌ yaꞌtel te Diose, te la yakꞌ junajuk koꞌtantik sok ta skuenta te Cristoe. Y la yaꞌbotikix kaꞌteltik te ya kaꞌbetik te ya xjunaj yoꞌtan sbaik sok Dios spisil te genteetike.

¹⁹ Jaꞌ bi, ta skuenta Cristo, Dios yipal ta yakꞌel te ya xjunaj yoꞌtan sok te machꞌatik ayik ta balmilale. Ni ma jaꞌuk ya snaꞌbe smulik te genteetike. Y joꞌotik a yaꞌbotik kaꞌteltik te ya kakꞌtalanbetik snaꞌ te skꞌoplal to.

²⁰ Jich yuꞌun joꞌotik ya xkꞌopojotik yuꞌun te Cristo ta atojolik. Jich kꞌoem te tutꞌil jaꞌ ya xwokolet ta akuentaik te Diose, te tutꞌil yipalotik ta kꞌop te joꞌotike. Jich yuꞌun, ta skuenta te Cristoe, awokolikuk te junuk awoꞌtan abaik sok te Diose.

²¹ Te Cristoe maꞌyuk a sle smul stukel. Pero joꞌotik ta jkajtik, te Diose la yaꞌbe skuch te jmultike, yuꞌun jich ta skuenta Cristo ya xkolotik yuꞌun te jmultike.