2 Corintios 4 - Nuevo Testamento Tzeltal de Amatenango

¹ Jaꞌ yuꞌun ma xchebaj koꞌtantik, porke ta slekil yoꞌtan te Diose la yaꞌbotik te aꞌtel to.

² La jpꞌatikix jilel te tutik kꞌexlaltik sba ay ta pasel ta mukule. Ma jloꞌlawanejukotik ni makꞌ jyanutestik te skꞌop Diose. Jaꞌ nax ya kaltik te tut batsꞌi jiche. Y te jich aye, jich ya kaꞌbetik yilik te yanetik te jun koꞌtantik ta sit te Diose.

³ Y te skꞌoplal kolel te ya kaltike, jaꞌ nax ijkꞌal kꞌinal yuꞌun te machꞌatik ya xlaj bajt ta chꞌayele.

⁴ Yuꞌun te tutꞌil ma xchꞌuunike, jaꞌ chokuteslanbil yuꞌun te dios yuꞌun te balmilale, y jich ma snaꞌbeyik sluwar. Yuꞌun jich me ma staik ta ilel te sakilal te lus yuꞌun te lek achꞌ kꞌop yuꞌun te Cristo te ben tsaꞌame, te jaꞌ steklejal kꞌoem te Diose.

⁵ Ma joꞌukotik mismo ya kaltik jkꞌoplaltik. Jaꞌ ya kaltik skꞌoplal te Jesucristo, te jaꞌ Kajwaltik stukele. Te joꞌotike jaꞌ nax jꞌaꞌtelotik awuꞌunik ta slekil nax yoꞌtan te Jesuse.

⁶ Porke stukel mismo te Diose te la yakꞌ tal sakubuk kꞌinal te ba ay te ijkꞌal kꞌinale, jaꞌ nax te la yakꞌ sakubuk kꞌinal ta koꞌtantike yuꞌun ta skuenta jich ya xjuꞌ ya jnaꞌbetik sba a te stsaꞌamul Dios te ya xchiknaj ta sit-yelaw te Jesucristoe.

Kuxulotik ta skuenta xchꞌuunel-oꞌtanil

⁷ Pero te kꞌulejalil to kichꞌojtik ta jtiꞌbalultik, jachꞌik kꞌoemotik tutꞌ jpꞌej pꞌin te pasbil ta lume, yuꞌun jich me ya xchiknaj te ta skuenta te bayal spoder te Diose te ay tut ya xjuꞌ kuꞌuntike.

⁸ Jich yuꞌun, manchuk me ay bayal tut ya xtal, pero ya me xkꞌaxotik bael teꞌa. Manchuk teme ma juꞌix kuꞌuntik aye, pero ma jkꞌaxeluk ya stsalotik.

⁹ Ya stenelotik, pero ma jilesbilukotik. Ya skꞌan xtꞌuxanotik, pero ma jkꞌaxeluk ya xlajotik.

¹⁰ Bayuk nax ya xbootik, kechel ta lajel jtiꞌbalultik, jich tutꞌil laj te stiꞌbalul te Jesuse. Yuꞌun jich me ya xchiknaj ta jtiꞌbalultik te tutꞌil kuxul ay stukele.

¹¹ Yuꞌun te jayebuk kꞌaal kuxulotik te joꞌotike, sil tiempo ayotik ta lajel ta skaj te Jesuse, yuꞌun jich me ya xchiknaj ta jtiꞌbalultik te ya xlaje te tutꞌil ay xkuxlejal te Jesuse.

¹² Jich te lajele ya xkꞌax ta jtojoltik, y te jaꞌexe ya ataik akuxlejalik.

¹³ Te Sjun Diose ya yal: “Jich jchꞌuunej, y jaꞌ yuꞌun ya kal”, xchi me. Jichotik me euk te joꞌotike, jich mismo xchꞌuunej koꞌtantik, jaꞌ yuꞌun jich ya kaltik.

¹⁴ Porke jnaꞌojtik te Diose, te la chaꞌkuses tal te ba ay te animaetik te Kajwaltik Jesuse, jich me ya xchaꞌkusesotik tal sok te Jesuse, y jun nax ya yikꞌotik bael ta ba aye.

¹⁵ Spisil to jicha kꞌotix ta jkuentatik yuꞌun alekilik a te jaꞌexe, yuꞌun jich me ay bayal te ya xꞌaꞌbot bendision yuꞌun te Diose. Sok ay me bayal te jich ya yalbeyik kola yal Dios. Jich me ya xchiknaj te slekilal Diose.

¹⁶ Jaꞌ yuꞌun ma me wakꞌ chebajuk koꞌtantik, aunke yipal ta lajel yip te jtiꞌbalultike. Pero te yutil koꞌtantike yipal ta achꞌubel jujun kꞌaal.

¹⁷ Te tut ya xkꞌax jwokoltik yuꞌun te jkuxlejaltik te ora toe ya xkꞌax stukel. Pero kꞌunkꞌun yipalotik ta stael te lekilal sbajtel kꞌinal te mas mukꞌ y te lom bayale.

¹⁸ Porke ma jaꞌuk ya jtojlitik ta kꞌeluyel te tut chikan ta ilele; jaꞌ ya kiltik te tut ma chikanuk ta ilele. Yuꞌun te tutik chikan ta ilele ma xjalaj, pero te tutik ma chikanuk ta ilele sbajtel kꞌinal stukel.