2 Corintios 3 - Nuevo Testamento Tzeltal de Amatenango

Te machꞌatik ay yaꞌtelik ta yalel te yachꞌil tratee

¹ Te kꞌalal ya kaltik to, ¿Me yuꞌun ya akuyik te ya xlijk kakꞌ jbajtik ta akꞌel ta jkuenta te joꞌotik mismo aye? ¿Me yuꞌun ay nesesidad te ya jkaꞌbeyex karta te ya yal te lek ya xꞌaꞌtejotik, jich tutꞌil ya spasik te yane? ¿O meꞌn ay nesesidad ya jkꞌanbeyex karta ta atojolik te jaꞌexe te ya yakꞌotik ta naꞌbeyel jbae?

² Jaꞌex mismo karta kꞌoemex kuꞌun, jun karta tsꞌibabil ta koꞌtantik te ya xjuꞌ ya yil y ya xjuꞌ ya skꞌoponik spisilik te winketike.

³ Y jamal chikan ta ilel te jaꞌex jun karta kꞌoemex te stsꞌibaye Cristo, te joꞌotik ya stikonotik ta yakꞌele. Ma tsꞌibabiluk ta tinta; jaꞌ tsꞌibabil yuꞌun te Espíritu yuꞌun te kuxul Diose. Ma ta lecheche tonuk; sino ke yichꞌoj jtsꞌibayel ta oꞌtanil yuꞌun tiꞌbalulil.

⁴ Jich kꞌoem ta koꞌtantik ta skuenta Cristo ta stojol Dios. Seguro ayotik te jich aye.

⁵ Ma yuꞌunuk joꞌotik mismo ya xjuꞌ ya kaltik te ay tut ya xjuꞌ kuꞌuntik spasel ta jtukeltik naxe. Spisil te tut ya xjuꞌ kuꞌuntik spasele ya xtal ta stojol Dios

⁶ yuꞌun stukel snojpesejotik yuꞌun te ya xtuunotik yuꞌun te achꞌ tratee. Jaꞌ trate to ma tsꞌibabiluk ta letra, jaꞌ nax ta Espíritu. Te mantal tsꞌibabile ya xꞌakꞌawan bael ta lajel. Pero te Espíritu yuꞌun Diose ya yakꞌ kuxlejal.

⁷ Te mantal tsꞌibayot jilel ta jlejch ton, xlemlajan tal sok xojob. Te Israeletike ni ma spas a skꞌelube sit-yelaw te jMoisese ta skaj te xlemlun tale. Pero, te xlemet tale, teꞌ jul tupꞌuk a. Pero teme ay jich tsaꞌamul te mantal te ya xꞌakꞌawan bael ta lajele,

⁸ ¿me ma wan jichuk xan ta mas stsaꞌamul te tut ya yal te achꞌ trate yuꞌun te Espiritue?

⁹ Porke teme bayal te stsaꞌamal te mantaliletik te ya xꞌakꞌawan bael ta lajele, ¿me ma wan jichuk xan ta mas tsaꞌamul te Skꞌop Dios te ya yal te libre kꞌoemotik yuꞌun te jmultike?

¹⁰ Porke te tutꞌ ay stsaꞌamul te nail toe, ma pajalukix sok to. Jaꞌ mas lom bayal stsaꞌamul stukel.

¹¹ Y teme ben tsaꞌam slekil te tut a te lajix skꞌoplale, mas lom tsaꞌam slekil te tut a te jmel nax ay sbajtel kꞌinale.

¹² Te tutꞌil jich ay ta koꞌtantike, jich a kaltik spisil ta jamal.

¹³ Ma me jichuk ya jpastik tutꞌil jMoises te la smak sit-yelaw ta pakꞌ, yuꞌun te israeletike maꞌ yilik te xojob sit-yelaw te yipal ta tupꞌele.

¹⁴ Pero te stukelike ni maꞌ kꞌot ta yoꞌtanik te jich aye. Y jich to ta ora to kꞌalal ya yilik te antibo tratee, ma xkꞌot ta yoꞌtanik a, jich tutꞌil makal to sitik yuꞌun te pakꞌe. Yuꞌun mato lokꞌemuk, porke jaꞌ nax ya xlokꞌ ta skuenta te Cristoe.

¹⁵ Asta ora to kꞌalal ya yilik te junetik yuꞌun jMoisese, yuꞌun makal to ta pakꞌ kꞌoem te yoꞌtanike.

¹⁶ Pero te kꞌalal te jtul gente ya sujtes yoꞌtan ta skuenta Kajwaltike, te pakꞌe ya jichꞌ kꞌejel lokꞌel.

¹⁷ Porke te Kajwaltike, Espíritu stukel. Y te machꞌa ay ta skuenta te Espíritu yuꞌun te Kajwaltike, ayix ta libre yuꞌun.

¹⁸ Jaꞌ yuꞌun, jpisiltik joꞌotik maꞌyukix pakꞌ te ya smakbotik jsit-kelawtike. Jachikotik xanix tutꞌil jun espejo te xlemet yuꞌun stsaꞌamul te Kajwaltike. Y yipalotik ta yanejel jich mismo tutꞌ steklejal te kichꞌojbetik mas te slekilale. Yuꞌun jich yaꞌtel te Kajwaltike, te Espíritu stukele.