2 Corintios 2 - Nuevo Testamento Tzeltal de Amatenango

¹ Jaꞌ yuꞌun to jich a jnop te makꞌ ya xtal kilex xane, yuꞌun jaꞌ ma jkꞌan te ya kaꞌbeyex yajtal awoꞌtanike.

² Porke teme joꞌon ya kaꞌbeyex yajtal awoꞌtanike, ¿machꞌa me kꞌan sjunutesbon koꞌtan te joꞌone? Te jaꞌex nax atukelike. ¿Pero tutꞌil xjuꞌ awuꞌunik teme la kakꞌix yajtal awoꞌtanike?

³ Jaꞌ yuꞌun te la jtsꞌibabeyex te kartae, porke ma jkꞌan te ya xtalon yuꞌun te ya awaꞌbikon yajtal koꞌtan te jaꞌexe. Yuꞌun jaꞌ mas lek te ya ajunutesbikon koꞌtane. Yuꞌun seguro ayon te ya xjunub awoꞌtanik ta apisilik te jaꞌexe teme jun koꞌtan ekꞌae.

⁴ Pero te kꞌalal jich a jpasbeyex ta kartae, beno yajtal koꞌtan a kaꞌi, y ma junuk koꞌtan y asta okꞌon. Pero maꞌ jtsꞌibabayex te karta yuꞌun ya kaꞌbeyex yajtal awoꞌtanike. La skꞌan koꞌtan te jich me ya anaꞌik te lom bayal slekil koꞌtan ta akuentaike.

Aꞌbot perdon te machꞌa mulawen ta skuenta Pabloe

⁵ Y te machꞌa la yakꞌ te ajtal-oꞌtane, ma joꞌukon nax yakꞌojbon yajtal koꞌtan. Yuꞌun asta jich yakꞌojbeyex yajtal awoꞌtanik ta apisilik euk. Makꞌ ya kal te bayal a yaꞌbeyex yajtal awoꞌtanike, yuꞌun makꞌ xkꞌaxon ta mas ta akuentaik a.

⁶ Teyix a te la akomik ta kastigo te machꞌa la achapbeyik te smule.

⁷ Te ora to ya skꞌan ya apasbeyik perdon y ya ajunutesbeyayik yoꞌtan. Ma lek teme lom bayal yajtal yoꞌtan ya yichꞌ te ma xjuꞌ yuꞌune.

⁸ Jaꞌ yuꞌun ya kalbeyex te ya awaꞌbeyik xan yil te slekil awoꞌtanik te ay awuꞌunike.

⁹ Te nail a jtsꞌibabeyex te tutꞌ ay sluwarile, yuꞌun ya kil teme ya achꞌuunik spasel ta spisil te tut ya kale.

¹⁰ Jich te machꞌa a te la apasbeyik perdone, jich ya jpasbe perdon euk. Y te tutꞌil la jpasbe perdone, teme ay tut ya skꞌan ya jpasbe perdon yuꞌune, jich a jpasbey ta akuentaik y ta stojol te Cristoe.

¹¹ Jich te pukuje makꞌ stsalotik yuꞌun a, yuꞌun kilojtik lek tutꞌ ay te smañoe.

Ma junuk yoꞌtan te jPablo te ay ta jtejklum Troas

¹² Kꞌalal kꞌoon ta mukꞌul jtejklum Troas yuꞌun ta yalel te lek achꞌ kꞌop yuꞌun te Cristoe, ben lek a jta entrada te ya xꞌaꞌtejon ta yaꞌtel te Kajwaltike.

¹³ Pero ma junuk koꞌtan teꞌa porke ma teyuk a kꞌoj jta a te kermano jTitoe. Jaꞌ yuꞌun jich la jileslan y boon ta Macedonia.

Ya stsalawanotik ta skuenta Cristo

¹⁴ Kola yal Dios te sil tiempo xcholetotik ta spat te Cristo Jesus te tsalawanemix stukele, y ta jkuentatik joꞌotik te ya yakꞌ chiknajuk ta bayuk te skꞌope, te pajal sok te ya xchiknaj ta bayuk nax te ben tsꞌaam yikꞌe.

¹⁵ Porke te joꞌotike yuꞌun jachik kꞌoemotik tutꞌ ben tsaꞌam kikꞌtik te ya yakꞌ ta stojol Dios te Cristoe, te pajal xkꞌepet yikꞌ sok te machꞌatik ya xkolik sok te machꞌatik ya xbajtik ta chꞌayele.

¹⁶ Yuꞌun te machꞌatik ya xbajtik ta chꞌayele, jachik kꞌoem yuꞌunik te tutꞌil yikꞌ lajele. Pero te machꞌatik ya xkolike jich pajal sok te ben tsaꞌam yikꞌ te ya xkuxuyinik yuꞌune. Te tutꞌil jich ay to, ¿machꞌa kꞌan juꞌuk yuꞌun?

¹⁷ Te joꞌotike ma jachikukotik tutꞌil yanetik te jaꞌ xchonbajelik te skꞌop Diose. Ma jichuk. Te joꞌotik tikonbilotik yuꞌun te Diose, jaꞌ yuꞌun jamal koꞌtantik ya xkꞌopojotik ta skuenta Dios, yuꞌun jun nax ayotik sok te Cristoe.