2 Corintios 13 - Nuevo Testamento Tzeltal de Amatenango

Tsitsel y spajtil yoꞌtanik

¹ Jaꞌ to jaꞌ yoxmelal a te ya xtal kilexe. Spisil me ya xchajpay jilel, jaꞌ to ya skꞌan chapel teme ay cheb o oxeb testigoe.

² Te ora to te jakal ayone, ya me kalbeyex xan te tsitsel ta apisilik sok te machꞌatik nail to mulawenike, jich tutꞌil la kalbeyex te kꞌalal a kaꞌ kilex te xchaꞌmelal ae. Teme ba jchaꞌkilexix xan tale, ma me ayukix perdon a.

³ Yuꞌun te jaꞌexe yipalex ta skꞌanel seña ya awilik teme jaꞌ Cristo te ya xkꞌopoj ta jkuentae. Y te Cristoe ma yuꞌunuk maꞌyuk spuersa te tut ya xchap ta akuentaike. Ya me yakꞌ awilik te bayal spoder ta atojolike.

⁴ Jich te la yichꞌ jijpanel ta krus te maꞌyuk spuersa yilele, pero kuxulix ta spoder te Diose. Jich mismo euk te joꞌotike pajal maꞌyuk jpuersatik sok yilel. Pero te tutꞌil jun nax ayotik soke, jich kuxulotik ta spoder Dios yuꞌun te yipalotik ta aꞌtel ta atojolike.

⁵ Aꞌiya me abaik jaꞌex mismo, yuꞌun jich me ya xchiknaj a teme batsꞌi ay te xchꞌuunel awoꞌtanike. Pasa abaik ta prewa. ¿Me ma anaꞌojikuk te ayix ta awoꞌtanik te Jesucristoe?, teme ma lomuk nax awaloj te achꞌuunejike.

⁶ Koꞌtanuk yauk anaꞌik te joꞌotike ma lomuk nax te jchꞌuunejtike.

⁷ Y ya jkꞌopontik Dios yuꞌun te jaꞌexe te manchuk ya apasik te tut ma tsaꞌamuke. Ma yuꞌunuk ya jkꞌan kakꞌtik ta ilel te joꞌotik te lek jkꞌoplaltike. Yuꞌun jaꞌ ya jkꞌantik a te lek tut ya apasik te jaꞌexe, aunke jich yilel te lom nax jchꞌuunejtik te joꞌotike.

⁸ Porke ma spas ya jkontraintik chꞌinuk te tut batsꞌi jiche. Yuꞌun jaꞌ nax ya skꞌan ya jpastik te tut batsꞌi jiche.

⁹ Jaꞌ yuꞌun ben jun koꞌtantik te kꞌalal maꞌyuk jpuersatike, teme tulanex te jaꞌexe. Y sigue ya jkꞌopontik Dios yuꞌun te yauk xtojobex ta leke.

¹⁰ La jtsꞌibabeyex te karta to antes te ya xtal kilexe, yuꞌun te kꞌalal ya xtalone ma puersauk te tulan ya jkꞌoponex te tutꞌil ay kaꞌtel te yakꞌojbon te Kajwaltike. Ma yuꞌunuk ya jimex a, jaꞌ ya kaꞌbeyex spuersa awoꞌtanik.

¹¹ Ta slajibal, kermanotak, ya jkꞌan te junuk awoꞌtanik ayexe, y te ya aleik te ya xtojob akuxlejalike. Aꞌbeya abaik spuersa awoꞌtanik y junuk awoꞌtan abaik, y bujtsꞌanuk me kꞌinal. Aꞌ me sjoyinex te Dios te ay slekil yoꞌtan y sok te ay bujtsꞌan kꞌinal yuꞌune.

¹² Patbeya aba awoꞌtanik ta juju-tulex sok sbujtsꞌ awoꞌtanik.

¹³ Spisil te hermanoetike xkoltanukex laj me.

¹⁴ A me kꞌotuk ta akuentaik te slekil yoꞌtan te Kajwaltik Jesucristoe sok te xkꞌuxul yoꞌtan te Diose, sok a me sjoyinex sil tiempo te Chꞌul Espiritue. Jichuk.