2 Corintios 12 - Nuevo Testamento Tzeltal de Amatenango

Ay tutiꞌ yil y aꞌbot snaꞌ te jPabloe

¹ Ma jkꞌan te ya jtoy jba ta mismo jtukel naxe. Pero jaꞌ me ya jta ta alel te tutik a kil y la yaꞌbon jnaꞌ te Kajwaltike.

² Ya jnaꞌbe sba jtul winik te ay ta skuenta Cristoe te ayix katorse jaꞌbil te ikꞌot moel ta yoxkajal te chꞌulchane. Ma jnaꞌ me ikꞌot bael sok stiꞌbalul o xchꞌulel nax. Jaꞌ nax snaꞌoj te Diose.

³ Pero jnaꞌoj te winik abi ikꞌot bael ta utsilal, me sok stiꞌbalul o xchꞌulel nax, ma jnaꞌ. Jaꞌ nax snaꞌoj te Diose.

⁴ Teꞌ ta utsilal la yaꞌiy kꞌopetik te mukul nax te ma spas ya yal ni jtuluk winik.

⁵ Pero ma joꞌukon mismo ya jtoy jba jtukel. Jaꞌ ya jtoy jba yuꞌun te maꞌyuk jpuersae.

⁶ Pero yauk jkꞌan ya jtoy jbae, ma jowiluk nax, porke jaꞌ yipalon ta yalel te tut batsꞌi jiche. Pero ma jichuk ya jpas, skuenta yuꞌun maꞌyuk machꞌa kꞌax jich ya stoybon jkꞌoplal te tut yilel te kaꞌtele sok te tut yaꞌiyel te jkꞌope.

⁷ Para ke makꞌ jtoy jba a yuꞌun te tut lom mukꞌ a yaꞌbelon jnaꞌe, la yaꞌbelon jun wokole, pajal sok jun chꞌix te tsꞌapal ta jtiꞌbalule, te jachik tutꞌil jun yaꞌtajib pukuj te tal yilbajinone.

⁸ Oxmel a jkꞌanbe Kajwaltik te yauk slokꞌesbon te wokol to.

⁹ Pero te Kajwaltike la yalbon: “Teyatix a te slekil koꞌtan awuꞌune, porke te jpodere jich ya xchiknaj ta lek a te maꞌyuk tut ya xjuꞌ awuꞌun ta atukele”, xyuton. Jich yuꞌun ben jun koꞌtan te maꞌyuk tut ya xjuꞌ kuꞌune, yuꞌun jich me ya xchiknaj ta jkuenta a te spoder Cristoe.

¹⁰ Jaꞌ yuꞌun ben jun koꞌtan te maꞌyuk tut ya xjuꞌ kuꞌune, sok te ma xyakꞌelon ta jkuentae, sok te maꞌyuk tut ya xtuun kuꞌune, sok te ayon ta tenele y sok te ay jwokol ta skuenta te Cristoe. Porke te kꞌalal maꞌyuk jpuersa ya kaꞌiye, jaꞌ mas tulanon ya kaꞌiy a.

Yajtal yoꞌtan te jPablo yuꞌun te hermanoetik ta Corintoe

¹¹ Jicha jpasix jich tutꞌil jtul jowiyel. Pero jaꞌex la asujikon ta spasel. Porke jaꞌex ya skꞌan la awalbikon lek jkꞌoplal. Aunke ma tuton a te joꞌone, maꞌyuk machꞌa pekꞌ ayon yuꞌun ke te mukꞌul apostoletik awuꞌunik te jaꞌ atsꞌakliyejike.

¹² Ta skuenta spisil te señailetik sok te milagroetik sok seña spoder Dios te la jpasulan ta atojolike, teꞌ chikan a te batsꞌi jich te apostolone.

¹³ ¿Me ay ma jichuk a kakꞌex ta jkuenta te tutꞌil a kakꞌ ta jkuenta te yan hermanoetike? ¿O jaꞌ yuꞌun te maꞌ jkꞌanbeyex te koltayel te tuun kuꞌune? Pasbikon perdon teme ay ma lekuk la jpasbeyexe.

¹⁴ Jchapojbaix yuꞌun te ya jpas ta yoxebal buelta te ya xtal kilexe, y ma me jaꞌuk te ya xkꞌo jkꞌanbeyex koltayel. Te joꞌone ma jaꞌuk ya jle te tut ay awuꞌunike, yuꞌun jaꞌex mismo ya jleex. Porke jaꞌ te meꞌil-tatiletik te ya skꞌan ya stsobey stakꞌin yuꞌun te yuntikile. Y ma jaꞌuk te untik te ya stsobe stakꞌin te smeꞌ-state.

¹⁵ Y te joꞌone lom gano ya jlajin spisil te tutik ay kuꞌune. Y asta joꞌon mismo ya kakꞌ jba ta lajel ta akuentaik yuꞌun akoltayelik. Aunke jich ya kilex te bayal to jkꞌanojex te joꞌone, pero te jaꞌexe mas maꞌ akꞌanojikukon.

¹⁶ Anaꞌojik te maꞌ jkꞌanbeyex te tut tuun kuꞌune, pero ay machꞌa ya yal te la jloꞌlayexe.

¹⁷ ¿Me yuꞌun jaꞌ a jloꞌlayex a te ta skuenta te machꞌa la jtikonbeyex tale?

¹⁸ Jaꞌ la jkꞌanbe te jTito te ya xba yuluꞌtayex tale sok jtul hermanoe. ¿Me yuꞌun la sloꞌlayex te jTitoe? ¿Me ma jichuk ta jchebaltik te jun nax tut ya jpastike y sok te jun nax te koꞌtantik ta akuentaike?

¹⁹ ¿Meꞌn jich akuyotik te ya nax jmak jbajtik ta kꞌop ta atojolike? Pero ma jichuk. Ta stojol Dios ya xkꞌopojotik, sok jich tutꞌil te machꞌatik ay ta skuenta te Cristoe. Y spisil to, kermanotak te ben kꞌuxex ta koꞌtane, yuꞌun jich te jaꞌexe ya me xmukꞌubex ta stojol Dios.

²⁰ Porke te kꞌalal ya xba kilex, ya jxiꞌ teme ma jichuk ya xkꞌo jtaex te tutꞌ ya jkꞌane, sok teme ma jichuk ya xkꞌo ataikon te tutꞌ ya akꞌanik ekꞌa te jaꞌexe. Jaꞌ ya jxiꞌ teme ay kꞌop lijkem awuꞌunik, o il-oꞌtantawanej, o iliba, o ay dibision awuꞌunik, sok te le-mulile, sok te aꞌbiyanwaneje, sok te toybajele, y te lijkesej-kꞌope.

²¹ Jaꞌ ya jxiꞌ te kꞌalal ya xtal kilex xane ya me xkꞌexawon ta stojol Dios awuꞌunik, y ya me xꞌokꞌon yuꞌun te bayalexix te jaꞌexe te ayix tiempo lijk a le amulike, y maꞌ jilesejikuk te tut skuenta balmilale, te antsiwejele, sok te tut kꞌexlaltik sba ta pasele.