2 Corintios 11 - Nuevo Testamento Tzeltal de Amatenango

Te tut ya yal Pablo yuꞌun te palso apostoletike

¹ Ayuk me tutꞌil ya xkujch awuꞌunik te ay jowil nax ya xkꞌopojone. Te tutꞌiluk ya awaꞌiyike, tsꞌikbikon me.

² Tulan akꞌoplalik ta koꞌtan, jich tutꞌil tulan akꞌoplalik ta yoꞌtan te Diose. Joꞌon a kakꞌexix ta makel kꞌoem te ya xnujpun sok te jtul nax mamlalile, jaꞌ te Cristoe. Yuꞌun jich ya kakꞌex entregal ta stojol Cristo, jich tutꞌil jtul achꞌix te maꞌyuk smule.

³ Pero ya xiꞌon yuꞌun, te jich tutꞌil te chan te ben maño la sloꞌlay te xꞌEvae, teme jich ya sloꞌlayex ekꞌa te jaꞌexe. Y teme te ya xchꞌay ta apensarik te tut lek anopojik ta stojol te Cristoe.

⁴ Porke teme ay machꞌa tal jtuluk te ya yalbey skꞌoplal yan Jesus te ma jichuk te tutꞌil la kalbetikex skꞌoplale, jun awoꞌtanik ya awaꞌiyik te skꞌope. O teme ya awikꞌik sok sbujtsꞌ awoꞌtanik te jun espíritu te ma pajaluk sok te Espíritu te awikꞌojikixe, y sok ya achꞌuunik jun skꞌoplal kolel te ma pajaluk sok te tutꞌil achꞌuunejikixe.

⁵ Te ya kale, te joꞌone maꞌyuk ba chꞌin kꞌoemon yuꞌun te mukꞌul apostoletik awuꞌunik te jaꞌex a tsꞌakliyejike.

⁶ Aunke me ma jnaꞌ lek xkꞌopojon, pero bayal te tut jnaꞌojbey sluwarile. Y jaꞌ to jaꞌ kakꞌojtikix awilik sil tiempo te jaꞌexe, y sok spisil te tut juꞌemix kuꞌuntike.

⁷ ¿Me ay wan tut ma lek a jpas te la kalbeyex skꞌoplal kolel te maꞌyuk a jkꞌan jtojol ae? ¿Me jaꞌ jmul a jta a te joꞌon chꞌin a kakꞌ jba, yuꞌun jich mukꞌ ya xlokꞌex te jaꞌexe?

⁸ Ay la kichꞌbe tal stakꞌin yan hermanoetik, la kichꞌ tal ta jkꞌab te koltayel a yaꞌbikone. Pero teꞌ jlajin a te kꞌalal la kakꞌ jba ta abatinel ta akuentaike.

⁹ Y te kꞌalal ayon ta awolilik, teme ay nesesidad a kaꞌiye, ni maꞌyuk machꞌa kaꞌbe swokol yuꞌun. Yuꞌun te hermanoetik te talemik ta Macedoniae la yaꞌbikon te tut ya xtuun kuꞌune. Jich a jpas yuꞌun ma me ayuk awijkatsik ya kaꞌbeyex, y jich sigue ya jpas bael.

¹⁰ Batsꞌi seguro ayon te jnaꞌoj te tut batsꞌi jich yuꞌun te Cristoe, yuꞌun jich maꞌyuk machꞌa ta spisil estado yuꞌun Acaya te ya spojbon te tut ben jun koꞌtan yuꞌun.

¹¹ ¿Tuꞌun te jich ya kale? ¿Me yuꞌun ma jkꞌanojukex te jaꞌexe? Dios snaꞌoj te bayal jkꞌanojexe.

¹² Pero sigue ya jpas bael te tut ya jpase, yuꞌun jich me makꞌ ya kaꞌbe permiso a te machꞌatik yipalik ta sleel te tut ya staik bujtsꞌan kꞌinal yuꞌun, jich tutꞌil joꞌotike.

¹³ Porke najka palso apostoletik ske me to y jloꞌlawanejetik yuꞌun skuyoj sbaik te jaꞌ apostoletik yuꞌun te Cristoe.

¹⁴ ¿Tuꞌun wan ma jichuk ya spasike?, yuꞌun te pukuje ya skuy sba te jaꞌ ángel yuꞌun te sakil kꞌinale.

¹⁵ Jaꞌ yuꞌun ya skuy sbaik te najka lekil gente te jꞌaꞌteletik yuꞌune. Pero ta slajibal te tut ya staike, jaꞌ chikan te tut spasojlanike.

Te wokoletik a sta te Pablo yuꞌun te ay ta apostole

¹⁶ Ya kalbeyex xan te ma me ayuk machꞌa ya skuy te ayon ta jowiyele. Pero teme ay jich ya akuyike, akꞌaik te ya jkꞌoponex jich tutꞌil jtul jowiyele, yuꞌun jich me ya xjuꞌ ya jtoy jba chꞌinuk a.

¹⁷ Te toybajel to, ma jaꞌuk yipalon ta yalel te jich ay smantal te Kajwaltike, yuꞌun jachikon nax tutꞌil jtul jowiyel.

¹⁸ Yuꞌun ay bayal te ya stoy sbaik te tut snopojik ta stukelik naxe. Jich euk te joꞌone, ya me jtoy jba.

¹⁹ Te jaꞌexe ben pꞌijex. Pero junuk awoꞌtanik kujchem awuꞌunik te machꞌatik xlaj jowiye,

²⁰ sok kujchem awuꞌunik te machꞌatik ya sujex ta mantaltesele, sok te machꞌa ya slajinbeyex te tut ay awuꞌunike, sok te ya sloꞌlayexe, sok te machꞌa mukꞌ ya yakꞌ sba ta atojolike, o sok te machꞌa ya smajbeyex awelawike.

²¹ Manchuk me ya xkꞌexawon ta yalel: Te joꞌotike, yuꞌun maꞌyuk jpuersatik, ma jichuk la jpastik ta atojolike. Pero te yanetik ya skꞌan ya stoy sbaike, jich euk te joꞌone ya jkꞌan ya jtoy jba euk, aunke jich ya kal te jowil naxe.

²² Teme hebreoetik te stukelike, jichon euk. Teme israeletike, jichon euk. Teme jaꞌ stsꞌumbal te jꞌAbrahame, jichon euk.

²³ Teme jaꞌ jꞌaꞌteletik yuꞌun te Cristoe, joꞌon kꞌaxemon xan a ke te yanetike, aunke jich ya xkꞌopojon tutꞌil jtul jowiyel. Joꞌon mas aꞌtejemon ke te yanetike. Bayal buelta ochemon ta prexo, mas ke te yanetike, y ma ajtabiluk kichꞌoj majel, mas ke te yanetike. Bayal buelta ayon ta peligro yuꞌun lajel.

²⁴ Joꞌeb buelta a yaꞌbikon kastigo te juriyoetike, ay treinta y noeve ta jijts aresial.

²⁵ Oxeb buelta a yaꞌbikon teꞌ, y jmel a yaꞌbikon ton. Oxmel a mulot ta jaꞌ te barko te yipalon ta beel ae, y kꞌan smulonix. Kꞌax kuꞌun jun ajkꞌubal y sok jun kꞌaal te ba stoylejal te mare.

²⁶ Ben bayal beenemon y kiloj te peligroetik ta jaꞌe, y peligroetik yuꞌun te jꞌelekꞌetike, y peligroetik yuꞌun te jlumale, y sok te jyanlumetike. Kiloj peligroetik ta mukꞌul jtejklum, sok ta jojchol luwar, sok ta mar, y peligroetik yuꞌun te palso hermanoetike.

²⁷ Sok lubel ta aꞌtel, y bayal buelta maꞌ wayon. Beno kꞌax jwokol ta wiꞌnal y takin-tiꞌil. Bayal buelta la jkom jweꞌel. Kꞌax jwokol yuꞌun sik yuꞌun maꞌyuk lek jkꞌuꞌ-jpakꞌ.

²⁸ Ma jipuk nax a to, y ay to xan yan: Jujun kꞌaal lom al ya kaꞌiy yuꞌun te yajtal koꞌtan yuꞌun ta spisil te juju-tijkꞌ hermanoetike.

²⁹ Teme ay machꞌa ya xtaot ta chamele, jich ya staon chamel ya kaꞌiy euk. Y teme ay machꞌa ya xyal ta mulile, ya yakꞌ yajtal koꞌtan yuꞌun.

³⁰ Teme ay tut ya jtoy jba yuꞌune, ja ya jtoy jba yuꞌun te tutik ya xchiknaj te maꞌyuk tut ya xjuꞌ kuꞌune.

³¹ Te Dios te Stat te Kajwaltik Jesucristoe te jaꞌ ben tsaꞌam slekil sbajtel kꞌinale, snaꞌoj te ya kal te batsꞌi jiche.

³² Te kꞌalal ayon ta Damascoe, te gobierno te ay ta aꞌtel yuꞌun te rey Aretas la yakꞌ ta kanantayel te puertaetik yuꞌun te mukꞌul jtejklume, yuꞌun ya me stsakikon bael.

³³ Pero ay machꞌa a sjojkꞌanon koel ta jun moch ta bentana ta spajkꞌul te jtejklume, y jicha kolon bael ta kꞌabal.