2 Corintios 10 - Nuevo Testamento Tzeltal de Amatenango

Yichꞌoj tulan yaꞌtel ta apostolil te jPabloe

¹ Joꞌon jPabloon, ya kalbeyex awokolikuk ta skuenta slekil yoꞌtan sok skꞌuxul yoꞌtan te Cristoe. Yuꞌun ya awalik te kꞌalal ayon ta awolilike lom mansoo kakꞌoj jba. Y te kꞌalal jakal ayone ya awalik: “Ya stoy sba ta kꞌop”, xchaex.

² Awokolikuk, te kꞌalal ya xtal kilexe, ma me awakꞌikon te tulan ya jkꞌoponex te jayebex ya awalik te skꞌanojel nax jtiꞌbalul spisil te tut ya jpase. Yuꞌun jich ay ta koꞌtan te ya jkꞌopon jbaj sok ta site.

³ Batsꞌi jich te tiꞌbal to ayotike. Pero ma jichuk ya kut jbajtik tutꞌil gente liꞌ ba balmilale.

⁴ Te tut ya jmak jbajtik aye, ma pajaluk sok te tut skuenta balmilale. Yuꞌun jaꞌ ta spoder te Diose te ya xjuꞌ ya jimtik a te tut wokol ta jimele. Y jich ya jimtik a te leel ta mulile.

⁵ Y spisil toybajel ya smak te tutꞌil ya xnaꞌbot sba a te Diose. Spisil te tut ya snop te skuenta nax tiꞌbale ya kakꞌtik ta skuenta Cristo, yuꞌun jich me ya xchꞌuunik a.

⁶ Y jich ayix ta koꞌtantik te ya xtal kaꞌbeytik kastigo spisil te machꞌa ma xchꞌuunik mantale yuꞌun jich me jmel nax ya xtojobex ta xchꞌuunel a.

⁷ Te jaꞌexe jaꞌ nax ayex ta yilel te tut chikan ta ilel ya awilike. Teme ay machꞌa ya yal “Jaꞌ yuꞌunon te Cristoe”, teme xchie, ya skꞌan ya snaꞌ te jich yuꞌunotik euk te Cristoe.

⁸ Y aunke ya jtoy jba ta kꞌop chꞌinuk yuꞌun te tutꞌil ay kꞌatele, maꞌyuk tut ya xkꞌexawon yuꞌun. Yuꞌun jaꞌ a yaꞌbotik kaꞌteltik te Kajwaltike yuꞌun jich ya jpastik te ya xmukꞌubex ta stojol Dios y ma yuꞌunuk ya jimtikex.

⁹ Ma jkꞌan te ya akuyik te jich ya sitꞌesex yuꞌun te jkartaetike.

¹⁰ Ay ya yalik: “Te skartaetike lom kꞌux y lom tulan, pero teme jul tal stukele, maꞌyuk ta jkuenta sok maꞌyuk ta jkuenta te tut ya xjul yale”, xchi.

¹¹ Pero te machꞌa jich ya yale, ya me skꞌan snaꞌ euk: Jich tutꞌil te ya xkꞌopojotik ta karta te jakal ayotik ta atojolik te jaꞌexe, jich me tulan ya yaꞌiy te tut ya jpas te kꞌalal ayon ta awolilike.

¹² Ma yuꞌunuk jaꞌ ya jpaj jbatik sok te machꞌatik te stukel nax ya yakꞌ sba ta akꞌel ta jkuentae. Pero te stukelike maꞌyuk spꞌijilik. Stukel nax ya spaj sbaik, y ya spaj sba sok te yan xane.

¹³ Yan te joꞌotik ma spas te joꞌotik lom jun koꞌtantik yuꞌun te ba kꞌal ay te ma jkuentatikukix aye. Dios ya yaꞌbe seña te ba kꞌalal jmakojtik te aꞌtele, y stukel a yakꞌotik te ya xkꞌootik kꞌalal ba ayex ta Corintoe.

¹⁴ Jaꞌ yuꞌun ma yauk xlokꞌotik ta mas te ba kꞌalal jmakojtike. Y te jaꞌexe, ayex nax ta jkuentatik, yuꞌun joꞌotik nail kꞌoemotik te kichꞌojbetikex kaꞌel te lek achꞌ kꞌop yuꞌun te Cristoe.

¹⁵ Ma yuꞌunuk mukꞌ ya kakꞌ jbajtik yuꞌun te ba aꞌtejemix te yane. Ma yauk xlokꞌotik bael te ba kꞌalal jmajkojtike. Jaꞌ ya jmalitik te max ya xjuꞌ xꞌaꞌtejotik ta awolilik chikan te tutꞌil yipal ta mukꞌubel te xchꞌuunel awoꞌtanike. Pero sil tiempo liꞌ ayotik ta ba kꞌalal jmakojtike.

¹⁶ Jich me ya kaltik xan bael te lek achꞌ kꞌop yuꞌun te kolel te luwaretik te kꞌaxem ba ayexe. Pero makꞌ xꞌochotikix a te ba ay aꞌtejemix te yane, yuꞌun jich makꞌ jtoy jbajtik te ba ayix spasoj yaꞌtel te yane.

¹⁷ Teme ay machꞌa mukꞌ ya yaꞌiy sbae, jaꞌuk me mukꞌ ya yaꞌiy sba ta skuenta te Kajwaltike.

¹⁸ Porke ma jaꞌuk lek ya xꞌilot yuꞌun Dios te machꞌa stukel mismo lek skꞌoplal ya yal sbae. Yuꞌun jaꞌ lek skꞌoplal te machꞌa lek ya xꞌalbot skꞌoplal yuꞌun te Kajwaltike.