2 Corintios 1 - Nuevo Testamento Tzeltal de Amatenango

Spajtil-oꞌtanil

¹ Joꞌon jPabloon. Skꞌanojel yoꞌtan Dios te apostolon yuꞌun te Jesucristoe, sok te hermano jTimoteoe. Ya jtsꞌibay te karta to ta akuentaik te jayebex te achꞌuunejik Dios te ayex ta jtejklum Corintoe y sok te jtejklum yuꞌun Dios ta spisil te estado yuꞌun Acayae.

² Aꞌ yaꞌbeyex bayal bendision sok te bujtsꞌan kꞌinal yuꞌun te jTatik Diose y sok te Kajwaltik Jesucristoe.

Bayal swokol te jPabloe

³ Ben tsaꞌam te Dios te Stat te Kajwaltik Jesucristoe yuꞌun stukel Tatil te kꞌuxotik ta yoꞌtane y stukel Dios te sil tiempo ya yaꞌbotik spuersa koꞌtantike.

⁴ Jaꞌ ya yaꞌbotik spuersa koꞌtantik ta spisil te kꞌalal ayotik ta wokole, yuꞌun te joꞌotike jich me ya kaꞌbetik spuersa yoꞌtanik ekꞌa te yan te ay swokolike. Jaꞌ mismo ya kaꞌbetik spuersa yoꞌtanik jich tutꞌil te la yaꞌbotik spuersa koꞌtantike.

⁵ Porke jich tutꞌil te bayal a kꞌax swokol te Cristoe jich bayal ya xkꞌax jwokoltik euk, jich ta skuenta Cristo te bayal ya sta spuersa koꞌtantik yuꞌune.

⁶ Yuꞌun teme ay jwokoltike, jaꞌ yuꞌun jich me ay spuersa awoꞌtanik te jaꞌexe y sok ya ataik te kolele. Y teme Dios ya yaꞌbotik spuersa koꞌtantike, yuꞌun jich me ay spuersa awoꞌtanik ekꞌa. Ya skꞌan sok spuersa awoꞌtanik ya atsꞌik awokolik, te pajal sok te jwokoltik te kꞌaxem kuꞌuntike.

⁷ Jun koꞌtantik ta akuentaik, yuꞌun jnaꞌojtik sluwar te ya me ataik spuersa awoꞌtanik yuꞌun euk te Diose, yuꞌun ay me awuꞌunik ekꞌa te bayal wokole.

⁸ Kermanotak, ya jkꞌan ya kaꞌbeyex anaꞌik te jaykaj te jwokoltik a jtatik ta estado yuꞌun Asia. Jun tulan prewa a kꞌot te kꞌan ma juꞌuk kuꞌuntik aye. Y asta la kaltik te ya xchamotik ae.

⁹ Jich a kaꞌi bajtikix te ya smilelotikixe. Pero to jaꞌ a yaꞌbotik jnaꞌtik te ma joꞌukotik mismo ya xjuꞌ ya jkoltay jbajtike, si jaꞌ te Dios te ya xchaꞌkuses tal te animaetike.

¹⁰ Y Dios a skoltayotik y ya yakꞌotik ta libre yuꞌun te lajel te xibentik sbae. A me xchꞌuun koꞌtantik te sigue ya skoltayotik baele

¹¹ teme jaꞌex ya akoltayotik ta skꞌoponel Dios. Teme bayalik te machꞌatik ya skꞌoponbotik Dios ta jtojoltike, jich me bayalik ya yalbeyik kola yal Dios yuꞌun te bendisionetik te ya kichꞌtike.

Tuꞌun te ma bajt ta Corinto te jPabloe

¹² Ay tut yuꞌun te ay sbujtsꞌ koꞌtantike: jaꞌ te ya jnaꞌtik te lek kakꞌoj jbatik y stojil a kuxuyinotik liꞌ ba balmilale, y mas to xan a ta awolilik te jaꞌexe. Ma jaꞌuk pꞌijilil ta skuenta tiꞌbalulil. Jaꞌ nax ta slekil yoꞌtan Dios te skoltayejotik te jich ya xkuxuyinotike.

¹³ Te kartaetike maꞌyuk tut yan a jtsꞌibatik tal a; te jaꞌex ya xjuꞌ awuꞌunik yilel y ya awaꞌibeyik sluware. Koꞌtanuk te spisil ya awaꞌiybeyik sluware.

¹⁴ Jich tutꞌil ta ora to awaꞌiyejbeyikix sluware chꞌinuk te tut kaloje. Te kꞌalal ya xchaꞌtal te Kajwaltik Jesuse ben jun awoꞌtanik kuꞌuntik, yuꞌun jichotik euk ben jun koꞌtantik ya kaꞌi bajtik awuꞌunik.

¹⁵ Te tutꞌil jich ay te koꞌtane, jich jnopoj te nail ya xtal kilex te jaꞌexe, yuꞌun jich me ya awichꞌik chaꞌmel bendision a.

¹⁶ Jich a jnop te nail ya kꞌa kilex te ya xboon ta Macedoniae, y patil teme sujton tale, ya me xkꞌa kilex xan tal. Jich te jaꞌexe ya xjuꞌ ya akoltayikon te ya xboon xan ta Judea.

¹⁷ Te kꞌalal la jnop te jich ya jpase, ¿me ma wan batsꞌi jichuk a jnop? ¿Me yuꞌun akuyojik te jich ya jnop ta skuenta nax te jtiꞌbalule, sok te ya kal “Jich”, sok “Ma jichuk” te mismo tiempo ae?

¹⁸ Pero Dios jaꞌ ya yaꞌiyotik te makꞌ ya kaltik ta akuentaik me “Jich” sok “Ma jichuk” te mismo tiempo ae.

¹⁹ Porke te Cristo Jesuse makꞌ yal “Jich” sok “Ma jichuk” te mismo tiempo ae. Jaꞌ nax te Xnichꞌan Diose te jaꞌ ya kalbeytikex skꞌoplale, joꞌon sok te Silvanoe sok te jTimoteoe. Te Cristoe stukel batsꞌi jich ta stojol Dios,

²⁰ yuꞌun stukel ya skꞌoes ta spasel spisil te tutik yaloj te Diose. Jaꞌ yuꞌun te kꞌalal ya kalbetik slekil te Diose, ya kaltik “Jichuk” ta skuenta te Cristo Jesuse.

²¹ Y te Diose stukel jun nax ya yakꞌotik sok te jaꞌexe ta skuenta te Cristoe sok te la stꞌujotikixe.

²² La yaꞌbotikix jmarkatik sok te sello yuꞌune, y yakꞌojbotikix ta koꞌtantik te Chꞌul Espíritu te jaꞌ seña te tut ya to xba kichꞌtike.

²³ Pero ma to kꞌaxemukon ta Corinto, jich tutꞌil jnopoje. Ya kalbe ta skuenta Dios te jaꞌ yuꞌun te ma la skꞌan koꞌtan te ya kaꞌbeyex awokolike.

²⁴ Ma yuꞌunuk jaꞌ ya jkꞌantik te ya sujtikex ta xchꞌuunele, yuꞌun ben jun awoꞌtanik sok ayix xchꞌuunel awoꞌtanike. Te tut ya jkꞌantike jaꞌ te ya xꞌaꞌtejotik ta akuentaik, yuꞌun jich me ben jun awoꞌtanik a.